ການນໍາໄຊຍະມອບເຄື່ອງບັນເທົາໜາວໃຫ້ເມືອງໄຊຊະຖານ

   ໃນວັນທີ 8 ທັນວາ 2019 ການນໍາແຂວງໄຊຍະບູລີນໍາໂດຍ ທ່ານ ພົງສະຫວັນ ສິດທະວົງ, ເຈົ້າແຂວງໄຊຍະບູລີ, ພ້ອມດ້ວຍບັນດາຫົວໜ້າ, ຮອງຫົວໜ້າພະແນກການອ້ອມຂ້າງແຂວງ ແລະ ບໍລິສັດຈໍາປາຄໍາໄດ້ນໍາເອົາເຄື່ອງຊ່ວຍເຫຼືອບັນເທົາໜາວມອບໃຫ້ຄອບຄົວທຸກຍາກເມືອງໄຊຊະຖານ, ໃຫ້ການຕ້ອນຮັບໂດຍທ່ານ ກອງສີ ວົງສີ ເຈົ້າເມືອງໄຊຊະຖານ.

ເຄື່ອງບັນເທົາໜາວທີ່ນໍາມາມອບຄັ້ງນີ້ປະກອບມີ: ຜ້າຮົ່ມ, ຜ້າຊົວ, ໂສ້ງ-ເສື້ອກັນໜາວເດັກ ແລະຜູ້ໃຫຍ່, ຜ້າພັນຄໍ ແລະອຸປະ ກອນການຮຽນ-ການສອນຈໍາ ນວນໜຶ່ງລວມມູນຄ່າທັງໝົດເກືອບ 100 ລ້ານກີບ, ໂດຍໄດ້ມອບຢູ່ 3 ຈຸດຄື: ຈຸດກຸ່ມບ້ານສະແມດໃຫຍ່, ຈຸດກຸ່ມບ້ານກໍ່-ສະປິ ແລະ ຈຸດບ້ານປາກລອງ, ນອກນີ້ຍັງໄດ້ນໍາເອົາເຄື່ອງອຸປະໂພກ-ບໍລິໂພກເປັນຕົ້ນແມ່ນອາຫານແຫ້ງມອບໃຫ້ອ້າຍນ້ອງທະຫານທີ່ປະຕິບັດໜ້າທີ່ປ້ອງກັນຊາຍແດນ, ໂດຍ ແມ່ນທ່ານ ພົງສະຫວັນ ສິດທະ ວົງ, ເຈົ້າແຂວງໄຊຍະບູລີ, ພ້ອມດ້ວຍທີມງານໃຫ້ກຽດມອບ ແລະ ນຸ່ງເຄື່ອງກັນໜາວໃຫ້ເດັກນ້ອຍ, ທັງນີ້ກໍເພື່ອເຮັດໃຫ້ກຸ່ມຄົນທີ່ທຸກຍາກໃນຂອບເຂດທົ່ວເມືອງດັ່ງກ່າວໄດ້ມີເຄື່ອງນຸ່ງຮົ່ມກັນໜາວ, ປາສະຈາກໂລກໄພໄຂ້ເຈັບຕ່າງໆທີ່ມາກັບອາກາດໜາວປີນີ້, ໂດຍສະເພາະແມ່ນຜູ້ເຖົ້າ ແລະ ເດັກນ້ອຍທີ່ມີພູມຕ້ານທານຕໍ່າ, ເພາະເມືອງດັ່ງກ່າວຍັງມີຄອບຄົວທຸກຍາກປະມານ 920 ກວ່າຄອບຄົວ, ເປັນເຂດທີ່ມີຄວາມສູງຈາກລະດັບໜ້ານໍ້າທະເລ 1.300 ກວ່າກິໂລແມັດ, ມີອາກາດໜາວຈັດ ແລະ ມີລົມພັດແຮງຕະຫຼອດປີ.

ໂອກາດດັ່ງກ່າວ ທ່ານ ພົງສະ ຫວັນ ສິດທະວົງ ໄດ້ຮຽກຮ້ອງໃຫ້ພໍ່ແມ່ປະຊາຊົນຈົ່ງພ້ອມກັນເອົາໃຈໃສ່ເບິ່ງແຍງສຸຂະພາບໃຫ້ດີ, ໂດຍສະເພາະແມ່ນຜູ້ເຖົ້າ ແລະ ເດັກນ້ອຍ, ໃນຊ່ວງໄລຍະທີ່ໜາວຈັດນີ້, ພ້ອມດຽວກັນຈົ່ງສືບຕໍ່ເກັບກູ້ຜົນຜະລິດໃຫ້ສໍາເລັດແລະທ່ວງທັນກັບລະດູການ, ສືບຕໍ່ປູກພືດລະດູແລ້ງຕາມຄວາມເໝາະສົມຂອງທ້ອງຖິ່ນ.

-----------------

ຂ່າວ: ອຸ່ນເຮືອນ ໂພທິລັກ

แชร์