ທລຍ ດຳເນີນ 284 ໂຄງການ ແກ້ທຸກຍາກເຊກອງ

 ໃນໄລຍະຜ່ານມາກອງທຶນຫຼຸດຜ່ອນຄວາມທຸກຍາກ (ທລຍ) ໄດ້ຈັດຕັ້ງປະຕິບັດຫຼາຍໂຄງການແກ້ໄຂຄວາມທຸກຍາກຂອງປະຊາຊົນໃນຂອບເຂດທົ່ວປະເທດໂດຍສະເພາະປະຊາຊົນທີ່ຢູ່ເຂດຊົນນະບົດຫ່າງໄກສອກຫຼີກ, ສໍາລັບແຂວງເຊກອງແມ່ນໄດ້ຈັດຕັ້ງປະຕິບັດ 284 ໂຄງການມູນຄ່າ 61 ຕື້ກວ່າກີບ ແລະທຶນຊຸມຊົນສົມທົບອີກຈໍານວນໜຶ່ງໃນນັ້ນໄດ້ສຸມໃສ່ຂະແໜງສຶກສາ, ສາທາລະນະສຸກ, ກະສິກໍາ, ໂຍທາທິການ ແລະຂົນສົ່ງ.

 ໃນອາທິດຜ່ານມາຫ້ອງການປະສານງານ ທລຍ ປະຈໍາແຂວງເຊກອງ ໄດ້ຈັດກອງປະຊຸມຈັດຕັ້ງຜັນຂະຫຍາຍຈຸດສຸມພັດທະນາທີ່ເປັນບູລິມະສິດ, ຮ່າງແຜນພັດທະນາຊົນນະບົດ ແລະລຶບລ້າງຄວາມທຸກຍາກໄລຍະ 2020-2030 ຂຶ້ນທີ່ພະແນກກະສິກໍາ ແລະ ປ່າໄມ້ແຂວງໂດຍມີທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ, ທ່ານ ສົມຫວັງ ຂໍາມະວົງ ຫົວໜ້າພະແນກກະສິກໍາ ແລະປ່າໄມ້ແຂວງ; ພ້ອມນີ້ກໍມີທ່ານຮອງເຈົ້າເມືອງ, ຫົວໜ້າ-ຮອງພະແນກ, ຫ້ອງການພ້ອມດ້ວຍວິຊາການກ່ຽວຂ້ອງຂັ້ນແຂວງ ແລະເມືອງເຂົ້າຮ່ວມ.

ພາບຂ່າວ:

ໃນກອງປະຊຸມ ທ່ານ ພົມມາ ວໍລະສິງ ຫົວໜ້າຫ້ອງການປະສານງານກອງທຶນຫຼຸດຜ່ອນຄວາມທຸກຍາກປະຈໍາແຂວງເຊກອງໄດ້ລາຍງານວ່າ: ການຈັດຕັ້ງປະຕິບັດກອງທຶນຫຼຸດຜ່ອນຄວາມທຸກຍາກໄລຍະທີ 1 ຫາໄລຍະທີ 3 ແມ່ນຈັດຕັ້ງປະຕິບັດແຕ່ປີ 2010-2019 ມີທັງໝົດ 284 ໂຄງການມູນຄ່າ 61,7 ຕື້ກີບ, ທຶນຊຸມຊົນສົມ ທົບ 6,6 ຕື້ກີບ ໄດ້ຈັດສັນເຂົ້າໃສ່ການສ້າງພື້ນຖານໂຄງລ່າງທີ່ຈໍາເປັນເພື່ອແກ້ໄຂຄວາມທຸກຍາກ, ສົ່ງເສີມໃຫ້ປະຊາຊົນຢູ່ເຂດຫ່າງໄກສອກຫຼີກທີ່ທຸກຍາກໄດ້ເຂົ້າເຖິງການບໍລິການຂັ້ນພື້ນຖານ.

  ໂດຍການປະຕິບັດໂຄງການຍ່ອຍແມ່ນນອນໃນ 4 ຂະແໜງການຄື: ຂະແໜງສຶກສາທິການ ແລະກີລາ 118 ໂຄງການ ມູນຄ່າ 26,8 ຕື້ກີບ, ທຶນ ທລຍ 24,9 ຕື້ກີບ, ຊຸມຊົນປະກອບສ່ວນ 1,8 ຕື້ກີບ; ຂະແໜງສາທາລະນະສຸກ 112 ໂຄງການມູນຄ່າ 26 ຕື້ກີບ, ທຶນ ທລຍ 23,19 ຕື້ກີບ, ຊຸມຊົນປະກອບສ່ວນ 2,8 ຕື້ກີບ; ຂະແໜງກະສິກໍາ ແລະປ່າໄມ້ 29 ໂຄງການມູນຄ່າ 9,12 ຕື້ກີບ, ທຶນ ທລຍ 8,31 ຕື້ກີບ, ຊຸມຊົນປະກອບສ່ວນ 812 ລ້ານກີບ; ຂະແໜງໂຍທາທິການ ແລະຂົນ ສົ່ງ 25 ໂຄງການມູນຄ່າ 6,46 ຕື້ກີບ, ທຶນ ທລຍ 5,29 ຕື້ກີບ, ຊຸມຊົນປະກອບສ່ວນ 1,16 ຕື້ກີບ.

ສະໜັບສະໜຸນໂດຍ: HONDA

  ສໍາລັບທິດທາງແຜນການໃນປີ 2020, ທ່ານ ພົມມາ ວໍລະສິງ ກ່າວວ່າ: ຫ້ອງການປະສານງານກອງທຶນຫຼຸດຜ່ອນຄວາມທຸກຍາກປະຈໍາແຂວງເຊກອງໄດ້ປະກອບເອກະສານບົດສະເໜີໂຄງການຍ່ອຍ (ບ້ວງທຶນລັດຖະບານ) ມີທັງໝົດ 19 ໂຄງການມູນຄ່າ 3,2 ຕື້ກີບ ໂດຍຈະໄດ້ຈັດຕັ້ງປະຕິບັດຢູ່ໃນ 3 ເມືອງຄື: ລະມາມ 4 ໂຄງການ, ກະລຶມ 7 ໂຄງການ ແລະເມືອງດາກຈຶງ 8 ໂຄງການ.

__________

ຂຽນໂດຍ: ບູ້ສຸວັນ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์