ກະຊວງການຕ່າງປະເທດ-ພາກທຸລະກິດ ເຫັນດີຊ່ວຍກັນດຶງດູດການຄ້າ, ລົງທຶນ ແລະທ່ອງທ່ຽວຕ່າງຊາດ

 ກອງປະຊຸມປຶກສາຫາລືຮ່ວມກັນຄັ້ງທຳອິດລະຫວ່າງກະຊວງການຕ່າງປະເທດກັບພາກທຸລະກິດຄືການສ້າງກາລະໂອກາດໃຫ້ພາກລັດ ແລະພາກເອກະຊົນໄດ້ປຶກສາຫາ ລືແລກປ່ຽນຄໍາຄິດຄໍາເຫັນ ແລະ ມີຄວາມເປັນເອກະພາບຮ່ວມກັນໃນການຈັດຕັ້ງປະຕິບັດນະໂຍບາຍການຕ່າງປະເທດຂອງພັກ-ລັດ ຕິດພັນກັບດ້ານເສດຖະກິດແນໃສ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງລາວຂະນະທີ່ກອງປະຊຸມດັ່ງກ່າວເຫັນດີໃຫ້ມີກົນໄກການປຶກສາຫາລືຮ່ວມກັນຢ່າງເປັນປົກກະຕິ ແລະ ໃຫ້ມີ ການປະສານງານຢ່າງກົມກຽວກັນລະຫວ່າງຂະແໜງການຕ່າງປະເທດ ແລະ ພາກທຸລະກິດເພື່ອເຮັດໃຫ້ການໂຄສະນາດຶງດູດການຄ້າ-ການລົງທຶນ ແລະ ການທ່ອງ ທ່ຽວຈາກຕ່າງປະເທດມາສູ່ ສປປ ລາວ ຢ່າງມີຈຸດສຸມ ແລະຖືກເປົ້າໝາຍຂຶ້ນກວ່າເກົ່າ.

 ກອງປະຊຸມປຶກສາຫາລືຮ່ວມລະຫວ່າງກະຊວງການຕ່າງປະເທດ ແລະ ພາກທຸລະກິດ ຄັ້ງທີ I ໄດ້ຈັດຂຶ້ນຢ່າງເປັນທາງການທີ່ສູນການຮ່ວມມືສາກົນ ແລະການຝຶກອົບ ຮົມ (ICTC), ນະຄອນຫຼວງ ວຽງຈັນ ໃນວັນທີ 9 ທັນວາ 2019, ໂດຍພາຍໃຕ້ການເປັນປະທານຂອງທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ແລະ ມີບັນດາຮອງລັດຖະມົນຕີ, ຄະນະກົມ ແລະ ຄະນະພະແນກກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ, ເອກອັກຄະລັດ ຖະທູດ ແລະກົງສຸນໃຫຍ່ແຫ່ງ ສປປ ລາວ ປະຈຳຕ່າງປະເທດ, ພະນັກງານອາວຸໂສບໍານານຂະແໜງການຕ່າງປະເທດ,ຜູ້ຕາງໜ້າຈາກບັນດາກະຊວງທີ່່ກ່ຽວຂ້ອງ, ສະ ພາການຄ້າ ແລະອຸດສາຫະກໍາພ້ອມດ້ວຍບັນດານັກທຸລະກິດ ແລະຕົວແທນຈາກອົງການທ່ອງທ່ຽວເຂົ້າຮ່ວມ.

ສະໜັບສະໜຸນໂດຍ: HONDA

  ທ່ານ ສະເຫຼີມໄຊ ກົມມະສິດ ກ່າວວ່າ: ເວທີປຶກສາຫາລືຮ່ວມກັບພາກທຸລະກິດຄັ້ງນີ້ແມ່ນຂໍ້ລິເລີ່ມໃໝ່ທີ່ຈັດຂຶ້ນເປັນຄັ້ງທໍາອິດໂດຍມີຈຸດປະສົງເພື່ອສ້າງກາລະໂອກາດໃຫ້ພາກລັດ ແລະພາກເອກະ ຊົນ ໄດ້ປຶກສາຫາລືແລກປ່ຽນຄໍາຄິດຄໍາ ເຫັນ ແລະມີຄວາມເປັນເອກະພາບຮ່ວມ ກັນໃນການຈັດຕັ້ງປະຕິບັດນະໂຍບາຍການຕ່າງປະເທດຂອງພັກ-ລັດ ຕິດພັນ ກັບດ້ານເສດຖະກິດແນໃສ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ, ໂດຍສະເພາະແມ່ນ 1) ປຶກສາຫາລື ແລະຖອດຖອນບົດຮຽນທີ່ ດີຮ່ວມກັນໃນການຈັດຕັ້ງຜັນຂະຫຍາຍ ການເຄື່ອນໄຫວການທູດຮັບໃຊ້ເສດຖະ ກິດ ໃນໄລຍະຜ່ານມາ, ແລະ 2) ກໍານົດທິດທາງການຮ່ວມມືໃນຕໍ່ໜ້າ ລວມເຖິງ ຂໍ້ສະເໜີແນະຕ່າງໆ ສໍາລັບການເຄື່ອນໄຫວວຽກງານການຕ່າງປະເທດໃນໄລຍະປີ 2020-2021 ເພື່ອເຮັດໃຫ້ການເຄື່ອນໄຫວວຽກງານການຕ່າງປະເທດໃນໄລຍະໃໝ່ນໍາມາຊຶ່ງຜົນສໍາເລັດອັນໃໝ່ໃຫຍ່ຫຼວງກວ່າເກົ່າ.

 ພາຍຫຼັງການສະເໜີບົດພາຍໃຕ້ຫົວຂໍ້: ເພີ່ມທະວີການເຄື່ອນໄຫວການທູດຮັບໃຊ້ເສດຖະກິດຂອງ ສປປ ລາວ ໃນໄລຍະໃໝ່ໂດຍທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດແລ້ວ, ທ່ານປະທານກອງປະຊຸມກໍໄດ້ຕັ້ງຄໍາຖາມເຈາະຈີ້ມຕໍ່ຫົວຂໍ້ດັ່ງກ່າວຕະຫຼອດໄລຍະການດໍາເນີນກອງປະຊຸມ ແລະບັນດາຜູ້ ແທນກອງປະຊຸມກໍໄດ້ເອົາໃຈໃສ່ແລກປ່ຽນຄວາມຄໍາຄິດເຫັນ, ຖອດຖອນບົດຮຽນ ແລະ ຫາລືກັນຢ່າງກົງໄປກົງມາ, ຊຶ່ງເຮັດໃຫ້ການດໍາເນີນກອງປະຊຸມຄັ້ງນີ້ເຕັມໄປດ້ວຍບັນຍາກາດແຫ່ງໄມຕີຈິດມິດຕະພາບ ແລະປະສົບຜົນສໍາເລັດໄປດ້ວຍດີ.

ພາບຂ່າວ:

  ກອງປະຊຸມໄດ້ເຫັນດີໃຫ້ມີກົນໄກການປຶກສາຫາລືຮ່ວມກັນຢ່າງເປັນປົກກະຕິລະຫວ່າງພາກລັດ ແລະພາກເອກະຊົນເພື່ອຮ່ວມກັນຖອດຖອນບົດຮຽນການເຄື່ອນໄຫວວຽກງານການທູດເສດຖະກິດແຕ່ລະໄລຍະເພື່ອວາງທິດທາງການຮ່ວມມື ແລະ ແຜນວຽກໃນຕໍ່ໜ້າຢ່າງມີຈຸດສຸມ ແລະ ມີປະສິດທິພາບກວ່າເກົ່າ ແລະເຫັນດີໃຫ້ມີການປະສານງານຢ່າງກົມກຽວກັນລະຫວ່າງຂະແໜງການຕ່າງປະເທດ ແລະພາກທຸລະກິດເພື່ອເຮັດໃຫ້ການໂຄສະນາດຶງດູດການຄ້າ-ການລົງທຶນ ແລະການທ່ອງທ່ຽວຈາກຕ່າງປະເທດມາສູ່ ສປປ ລາວ ຢ່າງມີຈຸດສຸມ ແລະຖືກເປົ້າໝາຍ.

 ນອກນັ້ນ,ກະຊວງການຕ່າງປະເທດຈະນຳເອົາເນື້ອໃນຈິດໃຈ ແລະໝາກຜົນຂອງການປຶກສາຫາລືດັ່ງກ່າວນີ້ໄປລາຍງານຂັ້ນເທິງເພື່ອໃຫ້ທິດຊີ້ນຳໃນການຜັນຂະຫຍາຍວຽກງານການທູດເສດຖະກິດ ໃນຕໍ່ໜ້າໃຫ້ເປັນຮູບປະທຳໂດຍສະເພາະ ແມ່ນການປັບປຸງກົນໄກການປະສານງານ ລະຫວ່າງກະຊວງການຕ່າງປະເທດ, ບັນດາກະຊວງຂະແໜງການ ແລະພາກທຸລະກິດໃຫ້ເປັນລະບົບລວມສູນ ແລະມີການປຶກສາຫາລືຢ່າງເປັນປົກກະຕິເພື່ອເຮັດໃຫ້ການເຄື່ອນໄຫວການທູດເສດຖະກິດໃຫ້ໄດ້ຮັບປະສິດທິຜົນດີກວ່າເກົ່າໃນຕໍ່ໜ້າ.

__________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

App: 020 58707444

แชร์