ປູກຫຍ້າ-ລ້ຽງສັດຂາຍ ພາໃຫ້ຄອບຄົວພົ້ນທຸກ

   ຄວາມດຸໝັ່ນຂະຫຍັນພຽນເປັນບາດກ້າວສຳຄັນໃນການດຳລົງຊີວິດຊຶ່ງນຳພາໃຫ້ຄອບຄົວມີຄວາມຜາສຸກຫຼຸດພົ້ນອອກຈາກຄວາມທຸກຍາກຕາມແນວທາງ ຂອງພັກ-ລັດວາງອອກຄືດັ່ງຄອບຄົວຂອງລຸງເຂັມມະລີ ສີວິໄລທອງ ອາຍຸ 59 ປີ ປະຊາຊົນບ້ານເມືອງຮໍາ ເມືອງບໍ່ແຕນ ແຂວງໄຊຍະບູລີ ໂດຍຢຶດຖືການປູກ ຝັງລ້ຽງສັດເປັນອາຊີບ.

  ລຸງເຂັມມະນີ ສີວິໄລທອງ ໃຫ້ຮູ້ວ່າ: ພາຍໃນຄອບຄົວລຸງມີນຳກັນທັງໝົດ 9 ຄົນ, ຍິງ 5 ຄົນ ເປັນຄອບຄົວໜຶ່ງທີ່ຍຶດຖືເອົາການເຮັດນາປູກເຂົ້າ ແລະລ້ຽງ ສັດເປັນອາຊີບ, ກ່ອນປີ 2010 ທາງຄອບຄົວໄດ້ເຮັດນາປູກເຂົ້າເປັນອາຊີບຜະລິດແຕ່ລະດູດຽວໃນເນື້ອທີ່ 1,15 ເຮັກຕາ, ຜົນຜະລິດໄດ້ 3,5 ໂຕນຕໍ່ປີ ແລະລ້ຽງສັດເປັນອາຊີບເສີມແຕ່ເມື່ອທຽບໃສ່ຄົນໃນຄອບຄົວ ແລະລາຍໄດ້ແລ້ວພໍແຕ່ກຸ້ມຢູ່ກຸ້ມກິນ, ພໍມາຮອດປີ 2012 ພາຍຫຼັງທີ່ພັກ ແລະລັດໄດ້ມີແນວທາງນະໂຍບາຍສົ່ງເສີມໃຫ້ພໍ່ແມ່ປະຊາຊົນປູກ, ລ້ຽງສັດໃຫ້ຫຼາຍກາຍເປັນສິນຄ້າຕາມເງື່ອນໄຂ ແລະທ່າແຮງຂອງຄອບຄົວ. ດັ່ງນັ້ນຄອບຄົວຂອງລຸງຈິ່ງໄດ້ຊື້ງົວເຂົ້າມາເພີ່ມຕື່ມ 10 ກວ່າໂຕມາລ້ຽງແຕ່ໄລຍະນັ້ນຍັງມີການລ້ຽງແບບທຳມະຊາດຕາມທົ່ງນາ ແລະຮົ້ວສວນຕ່າງໆ. ເຮັດໃຫ້ສັດກິນບໍ່ອີ່ມໂຕຈ່ອຍ ແລະສ່ຽງເກີດພະຍາດໄດ້ງ່າຍ, ຂາຍກໍ່ບໍ່ໄດ້ລາຄາດີ. ຕົກມາຮອດປີ 2014 ເປັນຕົ້ນມາຄອບຄົວຂອງລຸງຈິ່ງໄດ້ຫັນເອົາດິນທຳການຜະລິດປູກພືດຈຳນວນໜຶ່ງມາປູກຫຍ້າລ້ຽງງົວ-ຄວາຍ ນຳໃຊ້ແກ່ນຫຍ້າພັນຊະນິດຫຍ້າລູຊີປູກຕາມການແນະນຳຂອງຫ້ອງການກະສິກຳເມືອງບໍ່ແຕນໃນເນື້ອທີ່ 5 ເຮັກຕາຕໍ່ມາເຫັນວ່າສັດໄດ້ຈະເລີນເຕີບໂຕຕຸ້ຍສົມບູນແຂງແຮງດີການປ້ອງກັນພະຍາດກໍ່ໄດ້ງ່າຍບໍ່ຄ່ອຍຈະມັກເກີດພະຍາດແຕ່ເຖິງຢ່າງໃດກໍ່ຕາມມາເບິ່ງລາຍຮັບຈາກການຂາຍສັດໃນແຕ່ລະປີຍັງບໍ່ສູງມາຮອດປີ 2016 ຈິ່ງໄດ້ມີແນວຄິດຂະຫຍາຍເນື້ອທີ່ປູກຫຍ້າອີກ 3 ເຮັກຕາມາເປັນ 8 ເຮັກຕາ ໂດຍຕິດພັນກັບການລ້ຽງສັດເປັນຝູງ. ໃນແຕ່ລະປີຈະໄດ້ຄັດເອົາງົວໂຕຜູ້ ແລະໂຕແມ່ທີ່ບໍ່ສາມາດຂະຫຍາຍພັນໄດ້ຂາຍອອກບໍ່ຫຼຸດ 10 ໂຕ. ໃນລາຄາໂຕໜຶ່ງບໍ່ຫຼຸດ 5-7 ລ້ານກີບ ໂດຍແມ່ນພໍ່ຄ້າຄົນກາງທີ່ມາຈາກແຂວງວຽງຈັນ ແລະແຂວງຫຼວງພະບາງມາຮັບເອົາພ້ອມດຽວກັນນີ້ຄອບຄົວຂອງລຸງຍັງໄດ້ຮັບຊື້ງົວ-ຄວາຍຢູ່ພາຍໃນເມືອງມາລ້ຽງໄວ້ສວນຫຍ້າຕື່ມອີກ. ລ້ຽງຮອດ 1-2 ປີ ແລ້ວກໍ່ຈະຂາຍອອກປະຈຸບັນມີງົວ-ຄວາຍ ທັງໝົດ 40 ກວ່າໂຕໃນນີ້ມີຄວາຍ 10 ໂຕ.

  ນອກຈາກການລ້ຽງສັດແລ້ວຄອບຄົວລຸງຍັງໄດ້ປະກອບອາຊີບຮັບຈ້າງໄຖສວນ, ໄຖນາ ແລະ ບໍລິການກໍ່ສ້າງພື້ນຖານໂຄງລ່າງ, ເພາະວ່າຄອບຄົວຂອງເພີ່ນມີລົດໄຖນາໃຫຍ່. ສັງລວມແລ້ວລາຍຮັບຂອງເພິ່ນຈາກການປູກ-ການລ້ຽງສັດຂາຍ, ການບໍລິການອື່ນໆປີຜ່ານມາໄດ້ເຖິງ 200 ລ້ານກີບເມື່ອຫັກຕົ້ນທຶນອອກ.

แชร์