ມີລາຍຮັບ 177 ລ້ານກີບຕໍ່ປີ ຈາກການປຸງແຕ່ງນໍ້າແປະສະຂາຍເປັນສິນຄ້າ

  ຫຼາຍໆທ່ານກໍຄົງຈະຮູ້ ແລະໄດ້ກິນມາແລ້ວຄໍາວ່າເເປະສະ, ທັງເປັນທີ່ນິຍົມຂອງຄົນໄວໜຸ່ມ, ບ່າວ-ສາວໃນທົ່ວແຂວງໄຊຍະບູລີ, ໂດຍສະເພາະແມ່ນເມືອງປາກລາຍ ແລະ ຫຼາຍທ່ານກໍຍັງບໍ່ທັນຮູ້ຫຼືຮູ້ແຕ່ຍັງບໍ່ເຄີຍໄດ້ກິນຈຶ່ງບໍ່ຮູ່ວ່າລົດຊາດຂອງນໍ້າແປະສະນັ້ນເປັນແບບໃດ, ມື້ນີ້ບັນດາທ່ານຈະໄດ້ຮູ້ກັບນໍ້າແປະສະ ແລະ ຂັ້ນຕອນໃນການປຸງແຕ່ງ.

  ທ່ານນາງ ວິໄລພອນ ທະວີທອງ ບ້ານສີສະອາດຊົມພູ, ເມືອງປາກລາຍ ແຂວງໄຊຍະບູລີ ໄດ້ເວົ້າສູ່ຟັງວ່າ: ພາຍໃນຄອບຄົວມີ 7 ຄົນ, ຍິງ 4 ຄົນ, ອາຊີບແມ່ນສ້ອມ ແປງລົດທົ່ວໄປ, ແຕ່ລາຍຮັບບໍ່ພຽງພໍກັບລາຍຈ່າຍ, ສະນັ້ນລາວຈຶ່ງໄດ້ປຸງແຕ່ງນໍ້າແປະສະ ແລະ ແຈ່ວສຸກີຂາຍເປັນອາຊີບເສີມເພື່ອສ້າງລາຍຮັບເພີ່ມເຂົ້າຄອບຄົວ, ເພາະລາວເຫັນວ່ານໍ້າແປະສະ ແລະ ແຈ່ວສຸກີກໍາລັງເປັນທີ່ນິຍົມຂອງຜູ້ບໍລິໂພກນັບມື້ນັບຫຼາຍຂຶ້ນ, ການເຮັດນໍ້າແປະສະ ແລະ ແຈ່ວສຸກີແມ່ນເລີ່ມແຕ່ຕົ້ນປີ 2006 ເປັນຕົ້ນມາ, ໃນເບື້ອງຕົ້ນແມ່ນໄດ້ຮຽນຮູ້ນໍາຜູ້ທີ່ມີປະສົບການ, ໄດ້ລອງຜິດ, ລອງຖືກ ແລະ ໄດ້ຮັບການຕໍານິຕິຊົມຈາກຜູ້ບໍລິ ໂພກ, ລາວຈຶ່ງໄດ້ປັບປຸງຫຼາຍລົບຫຼາຍຕ່າວຈົນໄດ້ລົດຊາດທີ່ດີ ແລະ ຜະລິດຂາຍ 20 ຕຸກຕໍ່ເດືອນ, ໂດຍໃຊ້ທຶນທັງໝົດ 10 ລ້ານກີບ, ແຮງງານແມ່ນຜົວ ແລະເມຍ, ຕະຫຼາດແມ່ນສົ່ງຂາຍພາຍໃນເມືອງ, ເຫັນວ່າມີຄົນນິຍົມບໍລິໂພກນັບມື້ຫຼາຍຂຶ້ນ, ການສະໜອງແມ່ນບໍ່ພຽງພໍກັບຄວາມຕ້ອງການຂອງຜູ້ບໍລິໂພກ, ລາວຈຶ່ງໄດ້ເພີ່ມຕົ້ນທຶນເພື່ອຜະລິດໃຫ້ຫຼາຍຂຶ້ນກວ່າເກົ່າ.

ສະໜັບສະໜຸນໂດຍ: HONDA

  ຮອດປະຈຸບັນລາວມີແຮງງານໃນການຜະລິດ 4 ແຮງງານ, ສາມາດຜະລິດນໍ້າແປະສະໄດ້ 1 ພັນຕຸກຕໍ່ເດືອນ, ມີການບັນຈຸອັດຮ່າຍດ້ວຍເຄື່ອງຈັກທີ່ອັດຝາແໜ້ນໜາດີ ແລະ ໄດ້ຈໍາໜ່າຍພາຍໃນເມືອງ, ຕ່າງເມືອງພາຍໃນແຂວງ, ຕ່າງແຂວງ, ປະເທດເພື່ອນບ້ານ ແລະ ວາງຂາຍຢູ່ໜ້າເຮືອນຂອງຕົນເອງ, ຂາຍໃນລາຄາ 20 ພັນກີບຕໍ່ຕຸກ,ສ່ວນແຈ່ວສຸກີແມ່ນຜະລິດໄດ້ 34 ກິໂລກຣາມຕໍ່ເດືອນ,ຂາຍໃນລາຄາ 30 ພັນກີບຕໍ່ກິໂລ, ສັງລວມແລ້ວມີລາຍຮັບຈາກການປຸງແຕ່ງນໍ້າແປະສະ ແລະ ແຈ່ວສຸກີຂາຍທັງໝົດ 260 ລ້ານກີບຕໍ່ປີ, ຫັກຄ່າຕົ້ນທຶນ ແລະຄ່າຫຼຸ້ຍຫ້ຽນອອກຈະມີກໍາໄລປະມານ 177 ລ້ານກີບຕໍ່ປີ, ນອກນີ້ລາວຍັງໄດ້ປຸງແຕ່ງນໍ້າແຈ່ວລູກຊີ້ນ, ແຈ່ວພັນປາ ແລະເຄື່ອງກິນສຸກຢູ່ໜ້າບ້ານຕື່ມອີກ,ສາມາດສ້າງລາຍຮັບເຂົ້າຄອບຄົວລວມທັງໝົດ 200 ລ້ານກີບ,ປະຈຸບັນຄອບຄົວລາວໄດ້ກາຍເປັນຄອບຄົວຕົວແບບໃນການຜະ ລິດສິນຄ້າເພື່ອບໍລິໂພກດ້ວຍພູມປັນຍາຂອງຄອບຄົວ.

  ທ່ານ ນາງ ວິໄລພອນ ທະວີທອງ ໄດ້ໃຫ້ຮູ້ຕື່ມອີກວ່າ: ຂັ້ນຕອນໃນການປຸງແຕ່ງ ແລະວັດຖຸດີບທີ່ນໍາມາປຸງແຕ່ງນໍ້າແປະສະປະກອບມີ: ຫົວກະຊາຍ, ຫອມບົ່ວແຫ້ງ, ໝາກເຜັດແຫ້ງ, ໝາກຂາມປຽກສົ້ມ ແລະເຄື່ອງປຸງຈໍານວນໜຶ່ງ, ວິທີປຸງແຕ່ງແມ່ນນໍາສ່ວນປະສົມທຸກຢ່າງມາປັ່ນເຂົ້າກັນໃຫ້ລະອຽດ, ເຕີມນໍ້າລົງໃສ່ພໍປະມານແລ້ວນໍາໄປຕົ້ມ,ໃຊ້ເວລາ 1 ຊົ່ວໂມງໂດຍບໍ່ຕ້ອງປິດຝາ, ສ່ວນແຈ່ວສຸກີປະກອບມີ: ຖົ່ວດິນ, ກະທິໝາກພ້າວ, ເຕົ້າຮູ້ຢີ້, ຜັກທຽມແຫ້ງ ແລະເຄື່ອງປຸງລົດຊາດ, ວິທີປຸງແມ່ນນໍາເອົາກະທຽມມາຈຽວໃຫ້ຫອມແລ້ວໃສ່ເຕົ້າຮູ້ຢີ້, ກະທິໝາກພ້າວ, ເຄື່ອງປຸງທັງໝົດ, ສຸດທ້າຍແມ່ນເອົາໝາກຖົ່ວດິນທີ່ປັ່ນແລ້ວລົງໃສ່, ກວນໃຫ້ເຂົ້າກັນ, ໃຊ້ເວລາປະມານ 30 ນາທີກໍຈະໄດ້ແຈ່ວສຸກີທີ່ໄດ້ມາດຕະຖານ.

  ທ່ານ ນາງ ວິໄລພອນ ທະວີທອງ ບອກຕື່ມອີກວ່າ: ຖ້າທ່ານໃດສົນໃຈວິທີ ແລະຂັ້ນຕອນການປຸງແຕ່ງເປັນລາຍລະອຽດຫຼືຢາກຈະຊື້ໄປກິນ ແລະ ຈໍາໜ່າຍຂາຍກໍສາ ມາດຕິດຕໍ່ພົວພັນນໍາລາວໄດ້ທີ່ບ້ານສີສະອາດຊົມພູ ເມືອງປາກລາຍ ແຂວງໄຊຍະບູລີ ຫຼືຕິດຕໍ່ທາງໂທລະຊັບໄດ້ໝາຍເລກ 020 2236 8097.

------------------

ຂຽນໂດຍ: ອຸ່ນເຮືອນ ໂພທິລັກ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์