ປະຊາຊົນບ້ານເມືອງພັດສຸມໃສ່ປູກະພືດ ທົດແທນເຂົ້ານາປີຖືກນໍ້າຖ້ວມ

     ເນື່ອງຈາກວ່າທ້າຍປີ 2018 ຜ່ານມານີ້ເມືອງຊຳໃຕ້ແຂວງຫົວພັນໄດ້ຖືກໄພນໍ້າຖ້ວມຢ່າງໜັກ, ເຮັດໃຫ້ໄຮ່, ນາ, ຮົ້ວສວນ, ສັດລ້ຽງ ແລະອື່ນໆຂອງປະ ຊາຊົນຫຼາຍບ້ານ, ຫຼາຍຄອບຄົວມີຄວາມເສຍຫາຍຢ່າງໜັກ. ໃນນີ້ບ້ານເມືອງພັດກໍ່ເປັນບ້ານໜຶ່ງທີ່ໄດ້ຮັບຜົນກະທົບຢ່າງໜັກເຊັ່ນດຽວກັນ, ບ້ານດັ່ງກ່າວປະກອບມີ 5 ຄຸ້ມ: ຄຸ້ມພັດເໜືອ, ພັດກາງ, ພັດໃຕ້, ນາຊາງ ແລະຫາງລ້ອງ, ມີ 258 ຄອບຄົວ, ພົນລະເມືອງ 1 ພັນ 668 ຄົນ, ຍິງ 857 ຄົນ ຊຶ່ງເປັນບ້ານເປົ້າໝາຍທົດ ລອງສາມສ້າງຂອງເມືອງ.

  ຫຼັງຈາກນໍ້າຖ້ວມບົກແຫ້ງການນຳເມືອງຊຳໃຕ້ສົມທົບກັບຫ້ອງການກະສິກຳ ແລະປ່າໄມ້ເມືອງໄດ້ຫັນເອົາພະນັກງານວິຊາການປູກຝັງ-ລ້ຽງສັດຈຳນວນ 3 ສະຫາຍລົງໄປປະຈຳຢູ່ກັບບ້ານເພື່ອຊີ້ນຳ-ນຳພາປະຊາຊົນປູກພືດລະດູແລ້ງໃຫ້ເປັນຂະບວນການຟົດຟື້ນຊຶ່ງໃນປີນີ້ປະຊາຊົນໄດ້ປູກພືດລະດູແລ້ງທັງໝົດ 65 ກວ່າເຮັກຕາ. ໃນນີ້ເນື້ອທີ່ນາແຊງ 6,6 ເຮັກຕາ, ສາລີ 42 ເຮັກຕາ, ໝາກແຕງ, ຖົ່ວດິນ ແລະພືດລົ້ມລຸກອື່ນໆອີກຈຳນວນ 17 ກ່າວເຮັກຕາ. ເພື່ອເຮັດໃຫ້ເຂົາເຈົ້າມີເຂົ້າກຸ້ມກິນຕະຫຼອດປີ, ມີລາຍຮັບທົດແທນຜົນເສຍຫາຍຈາກໄຟນໍ້າຖ້ວມ ແລະ ສາມາດສ້າງທຸກເງື່ອນໄຂເຮັດໃຫ້ບ້ານດັ່ງກ່າວມີລາຍຮັບຄືກັບທຸກໆປິ.

  ມາໃນວັນທີ 24 ມັງກອນ 2019 ນີ້ ທ່ານ ບົວສີ ວິລອນນ້ອຍ ຫົວໜ້າຂະແໜງປູກຝັງພະແນກກະສິກຳ ແລະປ່າໄມ້ແຂວງຫົວພັນ, ທ່ານ ທອນ ສຸວັນໄຕ ຫົວໜ້າຫ້ອງການກະສິກຳ ແລະປ່າໄມ້ເມືອງພ້ອມທີມງານວິຊາການໄດ້ລົງຊຸກຍູ້ ແລະເບິ່ງການປູກພືດລະດູແລ້ງ ຕົວຈິງເຫັນວ່າປະຈຸບັນນີ້ປະຊາຊົນໄດ້ເອົາໃຈໃສ່ບົວລະບັດຮັກສາຜົນລະປູກຂອງເຂົາເຈົ້າໄດ້ເປັນຢ່າງດີ. ເຮັດໃຫ້ພືດກຳລັງເຕີບໂຕໄວ ແລະ ງອກງາມດີ, ຜົນລະປູກບາງຊະນິດທີ່ປູກກ່ອນເປັນຕົ້ນ: ສາລີ, ໝາກແຕງ, ຜັກຕ່າງໆກຳລັງໄດ້ຂາຍ. ນອກນີ້ປະຊາຊົນທົ່ວເມືອງຊຳໃຕ້ຍັງໄດ້ເຮັດນາແຊງໃນເນື້ອທີ່ທັງໝົດ 28 ກວ່າເຮັກຕາ, ສາລີຫວານ 65 ເຮັກຕາ, ສາລີແຂງ 68 ເຮັກຕາ, ໝາກແຕງ, ໝາກຖົ່ວ ແລະອື່ນໆ 175 ກວ່າເຮັກຕາ. ເດັ່ນກວ່າໝູ່ແມ່ນບ້ານເມືອງພັດ, ບ້ານພັນສະຫວັນ, ກຸ່ມບ້ານຊຳໃຕ້, ພັນຊຳ ແລະກຸ່ມບ້ານວຽງພັນ. ແຕ່ເຖິງຢ່າງໃດກໍ່ຕາມການປູກພືດໃຫ້ກາຍເປັນສິນຄ້າຂອງປະຊາຊົນເມືອງຊຳໃຕ້ຈະທຽບໃສ່ບ່ອນອື່ນ ແລະ ສະໜອງກັບຄວາມຮຽກຮ້ອງຕ້ອງການໃນການສ້າງລາຍຮັບມາພັດທະນາເສດຖະກິດຄອບຄົວຍັງມີໜ້ອຍ. ຍ້ອນພູມສັນຖານຂອງເມືອງເປັນເຂດພູສູງຊັນມີຄວາມຫຍຸ້ງ ຍາກໃນການຈັກສັນດິນປູກຝັງ, ລະບົບຊົນລະປະທານບໍ່ພຽງພໍ. ສະນັ້ນອຳນາດການປົກຄອງເມືອງ, ບ້ານ ແລະພາກສ່ວນທີ່ກ່ຽວຂ້ອງຈິ່ງໄດ້ຄົ້ນຄວ້າທຸກວິທີທາງ ແລະ ເປັນການລິເລີ່ມເຮັດໃຫ້ປະຊາຊົນເພີ່ມທະວີເຮັດນາສອງລະດູ ແລະ ປູກພືດລະດູແລ້ງໃຫ້ຫຼາຍກາຍເປັນສິນຄ້ານັບມື້ຫຼາຍຂຶ້ນ.

แชร์