ງານເທສະການອາຫານລາວໄດ້ຮັບຄວາມສົນໃຈຫຼາຍ

  ເທສະການອາຫານລາວເປັນອີກງານໜຶ່ງທີ່ເປີດໂອກາດໃຫ້ຜູ້ປະກອບການຂອງແມ່ຍິງລາວທົ່ວປະເທດໄດ້ນຳເອົາຜະລິດ ຕະພັນຂອງຕົນເອງ, ທັງເປັນສິນ ຄ້າເອກະລັກທີ່ຂຶ້ນຊື່ຂອງແຂວງນັບແຕ່ເໜືອຈົນເຖິງໃຕ້ມາຮ່ວມວາງສະແດງ ແລະຂາຍ, ທັງເປັນກິດຈະກຳໜຶ່ງທີ່ໄດ້ຈັດຂຶ້ນຮຽງກັນມາເປັນປີທີ 14 ແລ້ວ, ແຕ່ກໍຍັງໄດ້ຮັບຄວາມສົນໃຈຢ່າງຕໍ່ເນື່ອງທັງຜູ້ເຂົ້າຮ່ວມ ແລະຜູ້ມາທ່ຽວຊົມ.

  ທ່ານນາງ ບົວວັນ ແສງຕາວັນ ເຈົ້າຂອງຮ້ານອາຫານພື້ນເມືອງ ແຂວງຊຽງຂວາງ, ຊຶ່ງເປັນຜູ້ໜຶ່ງທີ່ໄດ້ມາຮ່ວມໃນງານເທສະການອາຫານລາວເປັນປີທີ 5 ແລ້ວໂດຍເພິ່ນໄດ້ໃຫ້ສຳພາດວ່າ: ສຳລັບຊຽງຂວາງເປັນແຂວງໜຶ່ງທີ່ໄດ້ນຳເອົາອາຫານ ແລະຜະລິດຕະພັນທີ່ເປັນເອກະລັກຂອງແຂວງເພື່ອມາຮ່ວມວາງສະແດງ ແລະ ຂາຍໂດຍສະເພາະແມ່ນຜະລິດຕະພັນຈາກຫັດຖະກຳສີມືຂອງຄົນແຂວງຊຽງຂວາງ, ເຄື່ອງຝາກຂອງຕ້ອນ ແລະອາຫານທີ່ຂຶ້ນຊື່ເຊັ່ນ: ລາບນົກແອ່ນ, ເປັນອາຫານທີ່ເຄີຍໄດ້ຮັບລາງວັນຊະນະເລີດຂອງການແຂ່ງຂັນອາຫານພາຍໃນແຂວງ ແລະພາຍໃນງານນີ້ມາແລ້ວ, ທັງກາຍເປັນອາຫານທີ່ໄດ້ຮັບຄວາມນິຍົມຈາກສັງຄົມຢ່າງຕໍ່ເນື່ອງ ແລະໃຜໆກໍຮູ້ຈັກໃນປະຈຸບັນ. ງານເທສະການອາຫານລາວເປັນງານໜຶ່ງທີ່ມີບັນຍາກາດຟົດຟື້ນດີ, ການຊື້-ຂາຍຄຶກຄັກ, ພ້ອມນັ້ນຍັງເປັນງານໜຶ່ງທີ່ໄດ້ໃຫ້ທັງຄວາມຮູ້ໃໝ່ໆ, ປະສົບການໃໝ່ເພື່ອນຳໄປພັດທະນາຜະລິດຕະພັນຂອງແຂວງໂດຍສະເພາະອາຫານທີ່ຂຶ້ນຊື່ຄື ລາບນົກແອ່ນ, ຊຶ່ງປະຈຸບັນເພື່ອເປັນການສົ່ງເສີມປະຊາຊົນໃນການປູກ-ການລ້ຽງ ແລະ ການຜະລິດເປັນສິນຄ້າສົ່ງອອກ, ເປັນສິນຄ້າຈຳໜ່າຍເພິ່ນໄດ້ຮວບ ຮວມເອົາຜະລິດຕະພັນຂຶ້ນຊື່ຂອງແຕ່ລະເມືອງພາຍໃນແຂວງມາໂຮມໄວ້ຈຸດດຽວເພື່ອໃຫ້ແຂກຄົນທີ່ເຂົ້າໄປທ່ຽວພາຍໃນແຂວງຮັບຮູ້ວ່າແຂວງຂອງພວກເຮົາມີທ່າແຮງບົ່ມຊ້ອນຫຍັງແດ່, ທັງເປັນການສົ່ງເສີມໃຫ້ເຂົາເຈົ້າມີອາຊີບ ແລະມີລາຍຮັບທີ່ໝັ້ນຄົງອີກດ້ວຍ.

  ທ່ານນາງ ຫັດສະດີ ເພັດຄຳໃບ ເຈົ້າຂອງຮ້ານຂາຍຊີ້ນສະຫວັນໃຫ້ສຳພາດວ່າ: ຊີ້ນສະຫວັນເປັນຜະລິດຕະພັນໜຶ່ງຂອງແຂວງສະຫວັນນະເຂດທີ່ໄດ້ຮັບກາໝາຍສິນຄ້າໂອດັອບ ແລະຕະຫຼອດໄລຍະ 6 ປີທີ່ໄດ້ເຂົ້າຮ່ວມງານວາງສະແດງສິນຄ້າໃນງານເທສະການອາຫານລາວແມ່ນຄຶກຄື້ນດີ, ສິນຄ້າທີ່ນຳມາຈຳໜ່າຍແມ່ນໄດ້ຂາຍໝົດ, ແຕ່ສຳລັບປີນີ້ກໍຍັງຈະເບິ່ງຕໍ່ໄປຕື່ມວ່າຈະບັນລຸຄືກັບປີຜ່ານໆມາ ຫຼື ບໍ່, ເນື່ອງຈາກສະພາບເສດຖະກິດມີການຝຶດເຄືອງອາດສົ່ງຜົນເຮັດໃຫ້ການຊື້-ຂາຍຂັດຂ້ອງຕາມໆກັນ, ສ່ວນວ່າສິນຄ້າທີ່ນຳມາວາງຈຳໜ່າຍໃນປີນີ້ແມ່ນຍັງປະລິມານເທົ່າເດີມກັບປີຜ່ານມາ, ໂດຍຫຼັກໆຈະເປັນປະເພດຊີ້ນສະ ຫວັນ, ໝໍ່າສະຫວັນ, ໄສ້ກອກ, ແຈ່ວ, ປາ ແລະຜະລິດຕະພັນອື່ນໆທີ່ມີຈຳໜ່າຍຢູ່ພາຍໃນແຂວງ, ຊຶ່ງຈະຂາຍໃນລາຄາເລີ່ມຕົ້ນ 50 ພັນກີບຈົນເຖິງ 1,5 ແສນກີບ.

  ຮ້ານແມ່ໃບອາຫານເພື່ອສຸຂະພາບຈາກສະມາຄົມນັກທຸລະກິດແຂວງຈຳປາສັກໃຫ້ສຳພາດວ່າ: ເພິ່ນກໍເປັນຜູ້ໜຶ່ງທີ່ໄດ້ມາຮ່ວມງານວາງເທສະການອາຫານລາວ, ຊຶ່ງໄດ້ນຳເອົາສິນຄ້າທີ່ເປັນເອກະລັກຂອງແຂວງຈຳປາສັກມາວາງສະແດງໃຫ້ສັງຄົມຮັບຮູ້ໃນງານດັ່ງກ່າວໂດຍສະເພາະແມ່ນປາແດກ, ປາເຄັມໄຂ່, ໄສ້ກອກ, ແຈ່ວປາກະເຕົາ, ນ້ຳຕານຫ້ອນດອນໂຂງ, ເສັ້ນເຝີ ແລະຜະລິດຕະພັນອື່ນໆທີ່ຂຶ້ນຊື່ຂອງແຂວງເພື່ອມາວາງຈຳໜ່າຍ, ຜ່ານການມາວາງໃນງານດັ່ງກ່າວເຫັນໄດ້ວ່າສິນຄ້າຂອງແຂວງແມ່ນໄດ້ຮັບຄວາມສົນໃຈດີ, ເຫັນໄດ້ຈາກການມາວາງໃນແຕ່ລະປີຈະມີລູກຄ້າໃໝ່ໆເພີ່ມຂຶ້ນທຸກຄັ້ງ, ຊຶ່ງນັບວ່າເປັນໂອກາດອັນດີທີ່ຈະເຮັດໃຫ້ເພີ່ນໄດ້ມີການພັດທະນາສິນຄ້າເພື່ອຕອບສະໜອງຄວາມຕ້ອງການຂອງຕະຫຼາດກໍຄືກຸ່ມຜູ້ບໍລິໂພກໃນອະນາຄົດ ແລະໃນນາມຜູ້ປະກອບການແມ່ຍິງກໍຂໍຊື່ນຊົມການຈັດງານຂອງຄະນະຈັດງານທີ່ໄດ້ເປີດໂອກາດໃຫ້ນັກທຸລະກິດແມ່ຍິງລາວໄດ້ມີບ່ອນຮຽນຮູ້ ແລະແລກປ່ຽນບົດຮຽນເພື່ອນຳໄປປັບປຸງຜະລິດຕະພັນໃຫ້ມີຄວາມເຂັ້ມແຂງຂຶ້ນ ແລະສອດຄ່ອງກັບຄວາມຕ້ອງການຂອງຕະຫຼາດຫຼາຍຂຶ້ນ.

แชร์