ເຊີນສໍາຜັດບໍ່ນໍ້າປຸ່ນ ເມືອງພຽງ ແຂວງໄຊຍະບູລີ

  ສາຍນໍ້າແມ່ນແຫຼ່ງຊັບພະຍາກອນທໍາມະຊາດທີ່ຫຼໍ່ລ້ຽງປະຊາຊົນລາວແຕ່ເໜືອຮອດໃຕ້ ແລະເປັນເສັ້ນທາງຄົມມະນາຄົມທີ່ອໍານວຍຄວາມສະດວກໃຫ້ປະຊາຊົນເຂດຫ່າງໄກໃຫ້ສາມາດໄປ-ມາຫາສູ່ກັນໄດ້ຕະຫຼອດປີ,ຕາມແມ່ນໍ້າກໍ່ມີເກາະດອນນ້ອຍໃຫຍ່ແຈກຢາຍແຕ່ ເໜືອເຖິງໃຕ້, ເປັນບ່ອນອາໄສຂອງ ສັດນໍ້າຫຼາຍຊະນິດ ຊຶ່ງສະແດງໃຫ້ເຫັນເຖິງຄວາມອຸດົມສົມບູນຂອງປະເທດເຮົາ.

ບໍ່ນໍ້າປຸ່ນເປັນສະຖານທີ່ທ່ອງທ່ຽວທຳມະຊາດທີ່ສວຍສົດງົດ ງາມຊຶ່ງຕັ້ງຢູ່ບ້ານໂພນໄຊ ຫ່າງຈາກຕົວເມືອງພຽງໄປຫາທິດໃຕ້ປະມານ 68 ກິໂລແມັດ ຫ່າງຈາກຖໍ້າຜາຫວາຍ 200 ແມັດ, ລົງມາທາງເບື້ອງຂວາ ຫ່າງຈາກເສັ້ນທາງຫຼວງປະມານ 10 ແມັດ, ເປັນຕີນຜາ ທີ່ຕິດກັບຖໍ້າຜາຫວາຍຈະມີນໍ້າອອກບໍ່ທີ່ມີນໍ້າໄຫຼຕະຫຼອດປີ ໄຫຼລົງໃສ່ນໍ້າຍາມ,ບໍ່ນໍ້າປຸ້ນ ເປັນສະຖານທີ່ທາງທໍາມະຊາດທີ່ສວຍງາມ ແລະມີບັນຍາກາດທີ່ຫາເບິ່ງ ໄດ້ຍາກໃນແຫຼ່ງອື່ນເພາະໃນສະຖານທີ່ແຫ່ງນີ້ໃນເມື່ອກ່ອນບໍລິເວນນໍ້າປຸ່ນອອກມາມີແຜ່ນຫີນໃຫຍ່,ດຳ, ເປັນພັກໆມີລັກສະນະຄ້າຍ ຄືກັບ “ເຫືອກຄວາຍ” ປິດຢູ່, ມີ ນໍ້າໄຫຼອອກມາຄ່ອຍໆຫຼັງຈາກບຸກເບີກເສັ້ນທາງຫຼວງແຫ່ງຊາດມີນັກສຳຫຼວດຂຸດຄົ້ນບໍ່ແຮ່ໄດ້ມາຕັ້ງແຄມຢູ່ທີ່ນັ້ນແລ້ວໄດ້ເອົາແຜ່ນຫີນນັ້ນອອກໄປເຮັດໃຫ້ມີນໍ້າໄຫຼອອກມາຫຼາຍ ແລະແຮງກວ່າເກົ່າຈົນ ເຖິງທຸກວັນນີ້.

ປະຈຸບັນສະຖານທີ່ແຫ່ງນີ້ ຈຶ່ງກາຍເປັນແຫຼ່ງທ່ອງທ່ຽວທີ່ສາມາດດຶງດູດນັກທ່ອງທ່ຽວພາຍໃນ ແລະຕ່າງປະເທດເຂົ້າຊົມເປັນຈຳ ນວນຫຼາຍ ແລະອາບນໍ້າບໍ່ຂາດ ໂດຍສະເພາະໃນງານບຸນຕ່າງໆ ມີເສັ້ນທາງເຂົ້າສະດວກສະບາຍ ແລະ ເປັນແຫຼ່ງທ່ອງທ່ຽວທາງທຳມະຊາດ,ວັດທະນະທຳອັນເປັນເອກະລັກສະເພາະຂອງຊາວເມືອງພຽງ ທີ່ສວຍສົດງົດງາມ ແລະເໝາະສຳລັບນັກທ່ອງທ່ຽວຜູ້ທີ່ມັກທ່ຽວຊົມທຳມະຊາດພູຜາປ່າໄມ້, ຫ້ວຍນໍ້າ ລຳເຊ, ວິຖີການດຳລົງຊີວິດຂອງ ປະຊາຊົນເຂດຊົນນະບົດ.

--------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์