ຈຳປາສັກເສດຖະກິດສືບຕໍ່ຂະຫຍາຍຕົວເພີ່ມຂື້ນ

   ອີງຕາມການລາຍງານຂອງ ທ່ານ ສາຍທອງ ໄຊຍະວົງ ຫົວໜ້າພະແນກແຜນການ ແລະ ການລົງທຶນແຂວງຈຳປາສັກກ່ຽວກັບການຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມປີ 2018 ແລະແຜນພັດທະນາເສດ ຖະກິດ-ສັງຄົມປີ 2019 ຕໍ່ກອງປະຊຸມຄົບຄະນະບໍລິຫານງານພັກ ແຂວງຈຳປາສັກຄັ້ງທີ 9 ສະໄໝ ທີ VII ທີ່ຈັດຂຶ້ນເມື່ອບໍ່ດົນມານີ້ໃຫ້ຮູ້ວ່າ: ໃນປີ 2018 ເສດຖະກິດຂອງແຂວງຈໍາປາສັກ ໂດຍລວມແລ້ວເຫັນວ່າຍັງສືບຕໍ່ຂະຫຍາຍຕົວເພີ່ມຂຶ້ນໃນລະດັບ 8,15%, ລວມຍອດຜະລິດຕະພັນພາຍໃນ GDP ປະຕິບັດໄດ້ 19.142 ຕື້ກີບ, ສະເລ່ຍຕໍ່ຫົວຄົນໄດ້ 3.153 ໂດລາຕໍ່ຄົນຕໍ່ປີ,ໃນນັ້ນຂະແໜງກະສິກຳກວມ 22,9%, ຂະແໜງອຸດສາຫະກຳກວມ 22,94% ແລະຂະແໜງບໍລິການກວມ 54,16% ຂອງGDP, ສາເຫດທີ່ພາໃຫ້ລວມຍອດຜະລິດ ຕະພັນພາຍໃນເພີ່ມຂຶ້ນແມ່ນຍ້ອນຜົນຜະລິດການປູກພືດເປັນສິນຄ້າເພີ່ມສູງຂຶ້ນໂດຍສະເພາະແມ່ນມັນຕົ້ນປະຕິບັດໄດ້ 16,58 ພັນເຮັກຕາ, ຜົນຜະລິດ 8,79 ແສນໂຕນເພີ່ມຂຶ້ນ 19% ແລະລື່ນແຜນປີ 19%, ປະເພດສິນຄ້າຜູກພັນສອງສົ້ນ (ຜັກກະລໍ່າ, ຜັກກາດຍໍ່, ຂິງ) ເພີ່ມຂຶ້ນຫຼາຍເທົ່າຕົວ, ນອກນັ້ນພືດທ່າແຮງຂອງແຂວງເຊັ່ນ: ກາເຟຜົນຜະລິດກໍ່ເພີ່ມຂຶ້ນ 9,5% ໃນເນື້ອທີ່ໃຫ້ໝາກ 46,77 ພັນເຮັກຕາ, (ຜົນຜະລິດໝາກແດງໄດ້ 469.822 ໂຕນ) ຖ້າທຽບໃສ່ແຜນປີປະຕິບັດໄດ້ 100%. ຢາງພາລາມີເນື້ອທີ່ 28,82 ພັນເຮັກຕາຜົນຜະລິດໄດ້ 51,92 ພັນໂຕນ, ທຽບໃສ່ໄລຍະດຽວກັນເພີ່ມຂຶ້ນ 11,39%, ທຽບໃສ່ແຜນປະຕິບັດ ໄດ້ 98%.

  ທ່ານ ສາຍທອງ ໄຊຍະວົງ ໃຫ້ຮູ້ຕື່ມວ່າ: ສຳລັບດ້ານການລົງທຶນທົ່ວແຂວງມີມູນຄ່າລົງທຶນທັງໝົດ 7.814 ຕື້ກີບ ທຽບໃສ່ປີກ່ອນເພີ່ມຂຶ້ນ 10,7% ແລະລື່ນແຜນປີ 80%, ການສົ່ງອອກສິນຄ້າປະຕິບັດໄດ້ 267,98 ລ້ານໂດລາທຽບໃສ່ແຜນການລື່ນ 6,3%, ທຽບໃສ່ໄລຍະດຽວຂອງປີກ່ອນເພີ່ມຂຶ້ນ 10,6%, ດ້ານງົບປະມານສາມາດຈັດເກັບລາຍຮັບໄດ້ 1.352 ຕື້ກີບ, ທຽບໃສ່ໄລຍະດຽວເພີ່ມຂຶ້ນ 8,58%, ທຽບໃສ່ແຜນປີປະຕິບັດໄດ້ 90,66%, ບັນຍາກາດການປ່ອຍສິນເຊື່ອທົ່ວລະບົບທະນາຄານພາຍໃນແຂວງໄດ້ 3.232 ຕື້ກີບ ຫຼື ເທົ່າກັບ 16,88% ຂອງ GDP, ຖ້າທຽບໃສ່ໄລຍະດຽວເພີ່ມຂຶ້ນ 78,7% ແລະຖ້າທຽບໃສ່  ແຜນການປີລື່ນ 3,61 ເທົ່າຕົວ. ສຳລັບແຜນພັດທະນາເສດຖະກິດ-ສັງຄົມຂອງແຂວງຈຳປາສັກປີ 2019 ຈະສູ້ຊົນໃຫ້ອັດຕາການຂະຫຍາຍຕົວຂອງຜະລິດຕະພັນພາຍໃນສະເລ່ຍເພີ່ມຂຶ້ນ 8,16%, ສ້າງມູນຄ່າເພີ່ມໃຫ້ໄດ້ 20.160 ຕື້ກີບ.

 

แชร์