ໃນວັນທີ 5 ທັນວາ 2019 ທີ່ສູນການຮ່ວມມືສາກົນ ແລະການຝຶກອົບຮົມ (ICTC) ນະຄອນຫຼວງວຽງຈັນ ໄດ້ຈັດກອງປະຊຸມປຶກສາຫາລືພາຍໃນວຽກງານການຕ່າງປະເທດຂັ້ນພາຍໃຕ້ເປັນປະທານຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແລະ ມີບັນດາຮອງລັດຖະມົນຕີ, ຄະນະກົມ ແລະ ຄະນະພະແນກໃນກະຊວງການຕ່າງປະເທດ, ເອກອັກຄະລັດຖະທູດ ແລະກົງສຸນໃຫຍ່ແຫ່ງ ສປປ ລາວ ປະຈໍາຕ່າງປະເທດພ້ອມດ້ວຍພະນັກງານອາວຸໂສບໍານານເຂົ້າຮ່ວມ.

   ກອງປະຊຸມຄັ້ງນີ້ຈະດໍາເນີນໄປເປັນເວລາ 2 ວັນ ແຕ່ວັນທີ 5-6 ທັນວາ 2019 ເພື່ອສະຫຼຸບຕີລາຄາການຈັດຕັ້ງປະຕິບັດນະໂຍບາຍຕ່າງປະເທດຂອງພັກ-ລັດເຮົາ ແລະການເຄື່ອນໄຫວການຕ່າງປະເທດຂອງ ສປປ ລາວ ໃນໄລຍະ 3 ປີ ຜ່ານມານັບແຕ່ກອງປະຊຸມວຽກງານການຕ່າງປະເທດຄັ້ງທີ 13 ໄດ້ກໍານົດອອກໃນປີ 2016 ເປັນຕົ້ນມາພ້ອມທັງກໍານົດທິດທາງແຜນການວຽກງານການຕ່າງປະເທດຂອງ ສປປ ລາວ ສໍາລັບ 3 ປີ ຕໍ່ໜ້າແຕ່ປີ 2020-2022 ຊື່ງສຸມໃສ່ສໍາຫຼວດກວດກາ ແລະແລກປ່ຽນຄໍາຄິດຄໍາເຫັນປິ່ນອ້ອມ 3 ຫົວຂໍ້ ໃຫຍ່ສໍາຄັນຄື: 1) ວຽກງານຈັດຕັ້ງພັກ ແລະພະນັກງານໂດຍຈະເນັ້ນໃສ່ວຽກງານອົບຮົມການເມືອງ-ແນວຄິດ, ການຂັ້ນແຜນການກໍ່ສ້າງພະນັກງານທີ່ສາມາດຕິດຕາມ ແລະ ປະເມີນຜົນໄດ້ໃນແຕ່ລະໄລຍະ, ການກໍ່ສ້າງພະນັກງານກັບທີ່, ການຄ້ົນຄວ້ານະໂຍບາຍຕ່າງໆ, ສະຫວັດດີການ ແລະການຍ້ອງຍໍໃຫ້ແກ່ພະນັກງານ, ການກໍ່ສ້າງຫນ່ວຍພັກປອດໄສເຂັ້ມແຂງໜັກແໜ້ນ, ການຂະຫຍາຍສະມາຊິກພັກ, ການປັບປຸງກົງຈັກການຈັດຕັ້ງ ແລະການຊັບຊ້ອນພະນັກງານທັງພາຍໃນ ແລະຢູ່ຕ່າງປະເທດຕາມທິດກະທັດຮັດ ແລະສາມາດຮັບຜິດຊອບໄດ້ຫຼາຍຫນ້າວຽກ; 2) ວຽກງານວິຊາສະເພາະໂດຍຈະສຸມໃສ່ປຶກສາຫາ ລືກ່ຽວກັບການຈັດຕັງປະຕິບັດຫນ້າທີ່ໃຫ້ມີຄຸນນະພາບຄວາມເປັນເຈົ້າການໃນການປະຕິບັດຫນ້າທີ່ການເມືອງ-ການທູດ, ການຄົ້ນຄວ້າ ແລະເປັນເສນາທິການໃຫ້ວ່ອງ ໄວ, ທັນການ ແລະຮັບປະກັນ, ປັບປຸງກົນໄກການປະສານງານ ແລະການຄຸ້ມຄອງການເຄື່ອນໄຫວວຽກງານການຕ່າງປະເທດຢ່າງລວມສນູ ແລະມີປະສິດທິພາບ ;3) ວຽກງານບໍລີິຫານ-ການເງິນ ແນໃສ່ປຶກສາຫາລືກ່ຽວກັບການຄຸ້ມຄອງຊັບສິນຂອງກະຊວງການຕ່າງປະເທດໃຫ້ມີປະສິດທິຜົນກວ່າເກົ່າ, ການພັດທະນາພື້ນຖານໂຄງລ່າງທີ່ຈໍາເປັນ ແລະປັບປຸງວຽກບໍລິຫານໃຫ້ຫັນ ໄປສູ່ທັນສະໄຫມ, ການຂັ້ນແຜນງົບປະມານ ແລະການນໍາໃຊ້ງົບປະມານຢ່າງມີປະສິດທິພາບຖືກຕ້ອງຕາມກົດຫມາຍ ແລະວິໄນການເງິນລວມທັງການຈັດສັນງົບປະມານໃຫ້ສອດຄ່ອງກັບການເຄື່ອນໄຫວວຽກງານບູລິມະສິດຂອງຂະແຫນງການຕ່າງປະເທດ.