ແບລກແຟນເທີຄວ້າ2ລາງວັນໃຫຍ່ຈາກແຊກອະວອດສ

   ທີມນັກສະແດງຈາກຮູບເງົາເລື່ອງແບລກແຟນເທີຄ້ວາ 2 ລາງວັນໃຫຍ່ດ້ານກຸ່ມນັກສະແດງດີເດັ່ນໃນຮູບເງົາໃນເວທີສະກຣີນແອັກເຕີສກິລຫຼືແຊກ ອະວອດສປະຈຳປີນີ້.

   ສະມາຄົມນັກສະແດງຮູບເງົາ, ໂທລະພາບ ແລະສື່ສານມວນຊົນຂອງອາເມລິກາ (ແຊກ-ແອຟຕຣາ) ຈັດງານປະກາດຜົນ ແລະມອບລາງວັນສະກຣີນແອັກເຕີສກິລຫຼືແຊກອະວອດສຄັ້ງທີ 25 ສຳລັບຜູ້ມີຜົນງານການສະແດງດີເດັ່ນທັງໃນດ້ານຮູບເງົາ ແລະໂທລະພາບໃນປີທີ່ຜ່ານມາທີ່ສູນປະຊຸມຊະໄຣໃນ   ນະຄອນລອສແອນເຈລິສໃນວັນທີ 27 ມັງກອນທີ່ຜ່ານມາ, ສຳລັບລາງວັນໃຫຍ່ທີ່ສຸດຂອງງານຄືກຸ່ມນັກສະແດງດີເດັ່ນໃນຮູບເງົາທີ່ທຽບເທົ່າກັບລາງວັນຮູບເງົາດີເດັ່ນຊຶ່ງເປັນຂອງທີມນັກສະແດງຈາກຮູບເງົາເລື່ອງແບລກແຟນເທີທີ່ຍັງຄ້ວາລາງວັນໃຫຍ່ຄືກຸ່ມນັກສະແດງດີເດັ່ນ, ຂະນະທີ່ລາງວັນນັກສະແດງ ນໍາຊາຍດີເດັ່ນເປັນຂອງຣາມີມາເລກທີ່ຮັບບົດເປັນເຟຣດດີເມີຄີວຣີນັກຮ້ອງນໍາວົງຄະວິນໃນຮູບເງົາເລື່ອງໂບຮີມຽນແຣບໂຊດີ, ສ່ວນເກລນໂຄລນັກສະແດງຍິງຄ້ວາລາງວັນນັກສະແດງນໍາຍິງດີເດັ່ນຈາກຮູບເງົາເລື່ອງເດີໄວຟ.

แชร์