ງານສະແດງສຽງແຄນເຊື້ອຊາດລາວ ມໍລະດົກໂລກ ຈະຈັດຂຶ້ນໄວໆນີ້

  ສະມາຄົມສິລະປະແຄນລາວຮ່ວມກັບກົມສິລະປະການສະແດງກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ ແລະກອງເລຂາແຫ່ງຊາດເພື່ອອຸຍເນສໂກກະຊວງສຶກສາທິການ ແລະກີລາຈະຈັດງານສະແດງສຽງແຄນເຊື້ອຊາດລາວມໍລະດົກໂລກເພື່ອສະເຫຼີມສະຫຼອງຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 99 ປີ , ພິທີຖະແຫຼງຂ່າວໄດ້ຈັດຂຶ້ນໃນວັນທີ 3 ທັນວາ 2019 ທີ່ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວໂດຍການຖະແຫຼງຂອງທ່ານ ຈະເລີນ ເຢຍປ່າວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ ໂຄສົກລັດຖະບານທັງເປັນປະທານສະມາຄົມສິລະປະແຄນລາວ, ມີຄະນະສະມາຄົມ ແລະ ພາກສ່ວນກ່ຽວຂ້ອງເຂົ້າ ຮ່ວມ.

  ທ່ານ ຈະເລີນ ເຢຍປ່າວເຮີ ກ່າວວ່າ: ງານຄັ້ງນີ້ຈະຈັດຂຶ້ນໃນ ຄໍ່າຄືນວັນທີ 13 ທັນວາ 2019 ທີ່ຫໍວັດທະນະທຳແຫ່ງຊາດເລີ່ມ ແຕ່ເວລາ 18:30 ເປັນຕົ້ນໄປໂດຍຈະມີການສະແດງດ່ຽວແຄນ, ເປົ່າແຄນວົງສະຫຼັບກັບດົນຕີພື້ນເມືອງປະເພດອື່ນໆລວມທັງການຂັບການລຳທ້ອງຖິ່ນ ແລະການຟ້ອນຕ່າງໆ ຂອງນັກສິລະປະຫຼາຍຮຸ່ນ ຄື: ຮຸ່ນສິລະປິນອາວຸໂສ, ຮຸ່ນກາງ, ຮຸ່ນໜຸ່ມ, ເຍົາວະຊົນທີ່ເປັນຮຸ່ນສືບທອດໃນອະນາຄົດທີ່ມາຈາກສຳ ນັກງານ, ກົມກອງ, ນັກຮຽນ, ນັກສຶກສາ ແລະປັນຍາຊົນ, ທັງນີ້ກໍ່ເພື່ອ ສະເຫຼີມສະຫຼອງຄ້າຍວັນເກີດປະທານ ໄກສອນ ພົມວິຫານ ຄົບຮອບ 99 ປີ, ວັນສ້າງຕັ້ງສະມາຄົມສິລະປະແຄນລາວຄົບຮອບ 14 ປີ ແລະ ຄົບຮອບ 2 ປີ ທີ່ສຽງແຄນເຊື້ອ ຊາດລາວເປັນມໍລະດົກໂລກ ທັງ ເປັນການສ້າງບັນຍາກາດເບີກບານມ່ວນຊື່ນຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 44 ປີ, ຊຸກ ຍູ້ຂະບວນການຄຳນັບຮັບຕ້ອນກອງປະຊຸມໃຫຍ່ 3 ຂັ້ນ, ກອງປະຊຸມ ໃຫຍ່ຄັ້ງທີ XI ຂອງພັກ, ວັນສຳຄັນຕ່າງໆຂອງພັກ ແລະຂອງຊາດເຮົາ.

ສະໜັບສະໜຸນໂດຍ: HONDA

  ດັ່ງນັ້ນຈຶ່ງຂໍເຊື້ອເຊີນທຸກພາກສ່ວນຕະຫຼອດຮອດພໍ່ແມ່ປະຊາຊົນເພື່ອເຂົ້າຮ່ວມຊົມການສະແດງໂດຍບໍ່ໄດ້ເສຍຄ່າເພື່ອປູກຈິດສຳນຶກສັນລະເສີນສະດຸດີຄຸນງາມຄວາມດີຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຜູ້ນຳສູງສຸດທີ່ເອົາໃຈໃສ່ເປັນພິເສດຕໍ່ການອະນຸຮັກຮັກສາເສີມຂະຫຍາຍສຽງແຄນລາວສູ່ມໍລະດົກໂລກເພື່ອເຊີດຊູກຽດຊື່ສຽງຂອງ ສປປ ລາວ ຢູ່ໃນພາກພື້ນສາກົນ ແລະໃນໂລກ.

----------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์