ຜົນແຂ່ງຂັນສິລະປະໂຄງການກູດເນເບີດ

  ການແຂ່ງຂັນສິລະປະ-ວັນນະຄະດີຂອງນ້ອງນ້ອຍນັກຮຽນ 13 ໂຮງຮຽນເປົ້າໝາຍຂອງໂຄງການກູດເນເບີດຢູ່ເມືອງໝອກ ແຂວງຊຽງຂວາງ ໄດ້ສຳເລັດລົງໃນເມື່ອບໍ່ດົນມານີ້ພາຍຫຼັງທີ່ດຳເນີດເປັນເວລາ 1 ວັນເຕັມທີ່ສະໂມສອນຫ້ອງການປົກຄອງເມືອງໝອກ ໂດຍໃຫ້ກຽດເຂົ້າຮ່ວມຂອງທ່ານ ຄຳແພງ ໄຊຍະຜອງ ຮອງເຈົ້າເມືອງໆໝອກ, ມີທ່ານ ໄທວ່າງ ກ່າຊົ່ວ ຫົວໜ້າຫ້ອງການສຶກສາທິການ ແລະ ກີລາເມືອງໝອກ, ມີຜູ້ຕາງໜ້າຈາກໂຄງການກູດເນເບີດ, ຜູ້ອຳນວຍການໂຮງຮຽນ, ຄູ-ອາ ຈານຕະຫຼອດຮອດນ້ອງນ້ອຍນັກຮຽນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ສຳລັບການແຂ່ງຂັນສິລະປະ-ວັນນະຄະດີຂອງນ້ອງນ້ອຍນັກຮຽນຄັ້ງນີ້ປະກອບມີ 3 ປະເພດຄື: ບົດຟ້ອນ,ຮ້ອງເພງ ແລະແຕ້ມຮູບ, ໃນນັ້ນການແຂ່ງຂັນບົດຟ້ອນມີທັງໝົດ 6 ລາຍການ, ຮ້ອງເພງ 4 ລາຍການ ແລະ ແຕ້ມຮູບ 5 ຄົນ, ຊຶ່ງມາຈາກ13 ໂຮງຮຽນເປົ້າໝາຍຂອງໂຄງການກູດເນເບີດຄື: ປະຖົມສົມບູນນາຄ່ອນ, ນໍ້າກ່ຽວ, ປ່າຄາ, ນໍ້າຢ້ຽມ, ຊຳທອງ, ຄັງວຽງ, ນໍ້າທຽງ, ຜາແດງ, ສາມແຈ, ສັນປ່າລັນ, ນໍ້າຊອງ, ນໍ້າຈາວເໜືອ ແລະນໍ້າຈາວໃຕ້.

  ຜົນການແຂ່ງຂັນປາກົດວ່າ: ປະເພດບົດຟ້ອນຊະນະເລີດໄດ້ແກ່ບົດຟ້ອນສາຍໃຈລາວ-ຫວຽດນາມ ໂຮງຮຽນປະຖົມສົມບູນນໍ້າກ່ຽວ, ຮອງຊະນະເລີດປະຖົມສົມບູນນາຄ່ອນ; ປະເພດຮ້ອງເພງຊະນະເລີດໄດ້ແກ່ທ້າວ ວ່າວ່າງ ຈາກໂຮງຮຽນປະຖົມນໍ້າທຽງ, ຮອງຊະນະເລີດໄດ້ແກ່ທ້າວ ອາຈິມ ຈາກປະຖົມສົມບູນນາຄ່ອນ; ປະເພດແຕ້ມຮູບ ຊະນະເລີດໄດ້ແກ່ທ້າວ ຕູ້ທໍ່ ຈາກປະຖົມສັນປ່າລັນ, ຮອງຊະນະເລີດ ນາງ ວຽງເພັດ ປະຖົມນາຄ່ອນ.

 ຜົນສໍາເລັດຂອງການແຂ່ງຂັນສິລະປະ-ວັນນະຄະດີຂອງ 13 ໂຮງຮຽນເປົ້າໝາຍຄັ້ງນີ້ນອກຈາກເປັນການສົ່ງເສີມວັດທະນະທໍາຮີດຄອງປະເພນີທາງດ້ານສິລະປະ-ວັນ ນະຄະດີຂອງຊາດ ແລະທ້ອງຖິ່ນໃຫ້ເປັນຂະບວນກ້ວາງຂວາງຟົດຟື້ນໃນໝູ່ນັກຮຽນແລ້ວ, ຍັງເປັນການສົ່ງເສີມຄວາມຮູ້ຄວາມສາມາດ ແລະ ພອນສະຫວັນຂອງນ້ອງນ້ອຍນັກຮຽນໄດ້ມີໂອກາດສະແດງອອກໃຫ້ສັງຄົມໄດ້ຮັບຮູ້ ແລະ ຍັງເປັນການກະຕຸກຊຸກຍູ້ທາງດ້ານທັດສະນະຄະຕິຫົວຄິດປະດິດສ້າງ ແລະ ແລກປ່ຽນບົດຮຽນປະສົບ ການໃນການຮຽນ-ການສອນລະຫວ່າງໂຮງຮຽນອີກດ້ວຍ, ແນໃສ່ສ້າງໃຫ້ໂຮງຮຽນບັນລຸຕາມ 5 ຫຼັກມູນການສຶກສາທີ່ທາງກະຊວງສຶກສາທິການ ແລະກີລາວາງອອກ ໃຫ້ປາກົດຜົນເປັນຈິງ.

-------------------

ພາບ ແລະຂ່າວ: ຈາກໜັງສືິພິມເສດຖະກິດ-ສັງຄົມ

แชร์