ປູກໄມ້ໃຫ້ໝາກແບບປະສົມປະສານ ເຮັດໃຫ້ເສດຖະກິດຄອບຄົວດີຂຶ້ນ

  ການສ້າງເສດຖະກິດຄອບຄົວຂອງປະຊາຊົນລາວບັນດາເຜົ່າອາດຈະບໍ່ຄືກັນ ແລະມີຜົນສໍາເລັດທີ່ແຕກຕ່າງກັນເພາະວ່າຕ້ອງອີງໃສ່ສະພາບຄວາມເປັນຈິງຂອງແຕ່ລະຄອບຄົວທີ່ມີທາງເລືອກຂອງໃຜມັນໃນການສ້າງລາຍຮັບເຂົ້າຄອບຄົວເພື່ອເຮັດໃຫ້ຫຼຸດພົ້ນອອກຈາກຄວາມທຸກຍາກຄືດັ່ງຄອບຄົວ ທ່ານ ອຸພອນ ວົງວິຈິດ ບ້ານນາໂຄ້ງ ເມືອງຮຸນ ແຂວງອຸດົມໄຊ ຊຶ່ງເປັນຄອບຄົວໜຶ່ງທີ່ມີຜົນສຳເລັດໃນການສ້າງເສດຖະກິດຄອບຄົວແບບປະສົມປະສານທັງເຮັດສວນໝາກໄມ້ກິນໝາກ, ເຮັດນາ ແລະທຸ ລະກິດການບໍລິການ.

  ໃນເມື່ອກ່ອນຄອບຄົວຂອງທ່ານ ອຸພອນ ແມ່ນເຮັດນາ, ເຮັດສວນ ແລະແລ່ນລົດໂດຍສານສ່ວນເມຍກໍ່ຂາຍເຄື່ອງຍ່ອຍຈາກການເຕີບໃຫຍ່ຂະຫຍາຍຕົວຂອງເສດຖະ ກິດບວກກັບສຸຂະພາບບໍ່ແຂງແຮງໃນການທີ່ຈະໄປແລ່ນລົດໂດຍສານ ແລະ ເຫັນທ່າແຮງທີ່ຕົນເອງມີດິນເປົ່າວ່າງໃນເນື້ອທີ່ 1,5 ເຮັກ ຕາ ໃນປີ 2007 ຈຶ່ງໄດ້ເລີ່ມປູກຕົ້ນໄມ້ໃຫ້ໝາກແບບປະສົມປະສານກັນຫຼາຍຊະນິດເບື້ອງຕົ້ນແມ່ນໄດ້ນຳເອົາເບ້ຍໝາກພຸກ 70 ຕົ້ນ, ໝາກກະທັນ 300 ຕົ້ນ ແລະໝາກໄມ້ຊະນິດອື່ນມາປູກປະສົມປະສານກັນໃນໄລຍະເບື້ອງຕົ້ນແມ່ນສາມາດນຳເອົາໄປຂາຍໄດປະມານ 4-5 ແສນກີບຕໍ່ປີ, ສໍາລັບໝາກກະທັນແມ່ນສາມາດເກັບໝາກໄດ້ໃນປີທຳອິດທີ່ປູກເນື້ອງຈາກເອົາເບ້ຍທີ່ຕໍ່ກິ່ງງ່າມາປູກ, ສ່ວນໝາກພຸກແມ່ນໃຊ້ເວລາ 4-5 ປີ ຈຶ່ງສາມາດເກັບໝາກໄດ້ຕໍ່ມາໃນປີ 2009 ໄດ້ປູກໝາກມັງກອນຕື່ມຈຳນວນ 95 ຕົ້ນ ພາຍຫຼັງຕົ້ນໝາກໄມ້ເຕີບໃຫຍ່ຂະຫຍາຍຕົວເຕັມທີ່ສາມາດເກັບໝາກໄມ້ຈຳໜ່າຍພາຍໃນ ເມືອງ, ສົ່ງຂາຍພາຍໃນແຂວງ ແລະຕ່າງແຂວງຈຳນວນໜຶ່ງ ຊຶ່ງ ສາມາດສ້າງລາຍຮັບເຂົ້າຄອບຄົວ ໄດ້ສະເລ່ຍ 70 ລ້ານກວ່າກີບຕໍ່ປີ.

ສະໜັບສະໜຸນໂດຍ: HONDA

  ສຳລັບການບົວລະບັດຮັກສາໃນການປູກໝາກໄມ້ໃຫ້ໝາກແມ່ນບໍ່ມີຄວາມຫຍຸ້ງຍາກພຽງແຕ່ອະນາໄມ, ເສຍຫຍ້າພວນດິນແລ້ວໃສ່ຝຸ່ນ, ສ່ວນແຮງງານກໍ່ບໍ່ຕ້ອງການຫຼາຍສຳລັບຄອບຄົວຂອງ ທ່ານ ອຸພອນ ວົງວິຈິດ ແມ່ນໄດ້ແບ່ງງານກັນພາຍໃນຄອບຄົວໂດຍການແບ່ງໃຫ້ຜົວເປັນຜູ້ເບິ່ງແຍງສວນສຳລັບຜູ້ເປັນເມຍແມ່ນເບິ່ງແຍງການຄ້າຂາຍຍ່ອຍ ແລະ ລູກຫຼານຢູ່ທາງເຮືອນມີແຕ່ເມື່ອໃດທີ່ຕ້ອງການແຮງງານຫຼາຍໃນການອະນາໄມສວນ ແລະ ເກັບກູ້ຜົນຜະລິດ ຈຶ່ງໄດ້ນຳພາລູກຫຼານມາຊ່ວຍ, ສຳລັບດ້ານເຕັກນິກໃນເບື້ອງຕົ້ນກໍ່ປູກແບບທຳມະຊາດເຮັດໃຫ້ຜົນຜະລິດບໍ່ສູງຈາກນັ້ນກໍ່ໄດ້ຖອດຖອນບົດຮຽນນຳຄອບຄົວທີ່ມີປະສົບການໃນການປູກໝາກໄມ້ໃຫ້ໝາກ ແລະ ໄດ້ຮັບການເອົາໃຈໃສ່ຊຸກຍູ້ສົງເສີມ, ແນະນຳທາງດ້ານວິຊາການຈາກຫ້ອງການກະສິກຳ ແລະ ປ່າໄມ້ເມືອງຮຸນ ເຮັດໃຫ້ໄດ້ຮັບຜົນຜະລິດສູງຂຶ້ນ.

  ຜົນໄດ້ຮັບໃນການປູກໄມ້ໃຫ້ໝາກຂາຍເປັນສິນຄ້າແມ່ນສາມາດສົ່ງລູກຮໍ່າຮຽນຈົນສຳເລັດການສຶກສາ, ມີເງິນເກັບເງິນທ້ອນພາຍໃນຄອບຄົວ ແລະ ເປັນຕົ້ນທຶນຕໍ່ຍອດໃນການສ້າງເສດຖະກິດຄອບຄົວດ້ວຍການຊື້ລົດໄຖສວນຈຳນວນ 2 ຄັນ ເພື່ອບໍລິການຮັບເໝົາໄຖສວນໃຫ້ແກ່ຊາວກະຊິກອນໃນເຂດເມືອງຮຸນ, ສ້າງຕັ້ງໂຮງງານຜະລິດນ້ຳດື່ມບໍລິສຸດຈຳໜ່າຍໃຫ້ແກ່ປະຊາຊົນພາຍໃນເທສະບານເມືອງຮຸນ ແລະ ກິດຈະການອື່ນໆ ອີກພ້ອມທັງປຸກເຮືອນຖາວອນ 1 ຫຼັງ ແລະ ຊື້ພາຫະນະຮັບໃຊ້ພາຍໃນຄອບຄົວເນື່ອງຈາກເນື້ອທີ່ດິນຍັງວ່າງບວກກັບຄວາມຕ້ອງການບໍລິໂພກໝາກໄມ້ຫຼາຍຂຶ້ນມາໃນປີ  2018 ຈິ່ງໄດ້ຂະຫຍາຍປູກໝາກມັງກອນຈຳນວນ 85 ຕົ້ນເພາະ ວ່າໝາກໄມ້ຊະນິດນີ້ເປັນທີ່ນິຍົມຈາກທ້ອງຕະຫຼາດດີຜູ້ຄົນນິຍົມ ແລະ ລາຄາກໍ່ດີອີກພ້ອມທັງປູກໝາກພຸກຕື່ມ 60 ຕົ້ນ, ໝາກ ຂຽບ 150 ຕົ້ນ ແລະ ພືດລົ້ມລຸກ ອື່ນໆ.

ຜົນສຳເລັດຂອງຄອບຄົວທ່ານ ອຸພອນ ວົງວິຈິດ ແມ່ນຍ້ອນເຫັນທ່ານແຮງໃນການພັດທະນາເສດຖະກິດຄອບຄົວດ້ວຍການຫັນຈາກການຜະລິດຈາກທຳມະຊາດມາເປັນການຜະລິດເພື່ອເປັນສິນຄ້າບວກກັບຄວາມດຸໝັ່ນຂະຫຍັນ ພຽນ, ຄອບຄົວມີຄວາມສາມັກຄີ, ຮູ້ຈັກແບ່ງໜ້າທີ່ຄວາມຮັບຜິດຊອບພາຍໃນຄອບຄົວຮູ້ປະຢັດມັດທະຍັດນຳໃຊ້ເງິນຖືກເປົ້າໝາຍໃນ ການຜະລິດ ແລະຍ້ອນແນວທາງ ນະໂຍບາຍອັນຖືກຕ້ອງຂອງພັກ-ລັດໃນການຊຸກຍູ້ສົ່ງເສີມໃຫ້ພໍ່່ແມ່ປະຊາຊົນບັນດາເຜົ່າຫັນຈາກການຜະລິດທຳມະຊາດມາຜະລິດເປັນສິນຄ້າເພື່ອແແກ້ໄຂຄວາມທຸກຍາກ, ອີກບັນຫາໜື່ງທີ່ສຳຄັນຂອງ ຄອບຄົວທ່ານ ອຸພອນ ວົງວິຈິດ ແມ່ນໄດ້ຍົກສູງສະຕິເປັນເຈົ້າຕົນເອງເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງຈິ່ງເຮັດໃຫ້ເປັນຄອບຄົວທີ່ປະສົບຜົນສຳເລັດຊຶ່ງເປັນບົດຮຽນໜຶ່ງໃນການພັດທະນາຄອບຄົວເຮັດໃຫ້ຊີວິດການເປັນຢູ່ດີຂຶ້ນກ້າວໄປເປັນຄອບຄົວພັດທະນາຮັ່ງມີຜາສຸກຊຶ່ງເປັນປັດໄຈເຮັດໃຫ້ເສດຖະກິດຂອງເມືອງມີຄວາມເຂັ້ມແຂງ.

__________

ຂຽນໂດຍ: ແສງອາທິດ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

 

แชร์