ມຕ ລ້ອງແງດ ໄດ້ນຳໃຊ້ອາຄານຮຽນຫຼັງໃໝ່

  ທ້າຍເດືອນຜ່ານມາທີ່ໂຮງຮຽນມັດທະຍົມຕົ້ນລ້ອງແງດ ເມືອງໂພນໄຊ ແຂວງຫຼວງພະບາງ ໄດ້ມີພິທີມອບຮັບອາຄານຮຽນຫຼັງໃໝ່ໂດຍການກ່າວມອບຂອງທ່ານ ແດນນຽວ ຫົວໜ້າອົງການມູນນິທິເກື້ອຝັນເດັກ ແລະກ່າວຮັບໂດຍ ທ່ານ ອ່ອນຈັນ ວາຕົງລີ ຜູ້ອຳນວຍການໂຮງຮຽນ ມຕ ລ້ອງ ແງດ ເຂົ້າຮ່ວມມີທ່ານ ສີຈັນ ລັດສະໝີ ເຈົ້າເມືອງໂພນໄຊ, ທ່ານ ໂຈ, ທ່ານ ນາງ ມູນີກາ ຜູ້ໃຫ້ທຶນ, ມີຕາງໜ້າມູນນິທີ, ຕາງໜ້າພະແນກສຶກສາທິການ ແລະກີລາແຂວງ, ຫ້ອງການສຶກສາທິການ ແລະກີລາເມືອງ, ພ້ອມດ້ວຍອຳ ນາດການປົກຄອງບ້ານ, ກຸ່ມ, ຄະນະພັດທະນາການສຶກສາ, ສະມາຄົມພໍ່ແມ່ນນັກຮຽນ, ພະນັກງານ,ຄູ-ອາຈານ ແລະນ້ອງນັກຮຽນ ເຂົ້າຮ່ວມຢ່າງພ້ອມພຽງ.

ທ່ານ ອ່ອນຈັນ ວາຕົງລີ ກ່າວວ່າ: ໂຮງຮຽນມັດທະຍົມຕົ້ນລ້ອງ ແງດ ເປັນໂຮງຮຽນແຫ່ງໜຶ່ງທີ່ ຕັ້ງຢູ່ໃຈກາງຂອງກຸ່ມພັດທະນາ ເນີນສູງມີຄູ-ອາຈານທັງໝົດ 14 ຄົນ, ຍິງ 4 ຄົນ ມີນັກຮຽນທັງໝົດ 147 ຄົນ, ຍິງ 77 ຄົນ , ນັກຮຽນ ເຜົ່າລາວກວມເອົາ 0,68%, ເຜົ່າມົ້ງກວມເອົາ 77,55% ແລະເຜົ່າກຶມມຸ 22,44% ຈຳນວນນັກຮຽນ ທີ່ເຂົ້າມາຮຽນສ່ວນຫຼາຍແມ່ນຄົນຊົນເຜົ່າ ແລະມາຈາກເຂດຫ່າງໄກ ສອກຫຼີກໄລຍະຜ່ານມາໂຮງຮຽນມີອາຄານຮຽນພຽງ 1 ຫຼັງ 8 ຫ້ອງຮຽນເປັນອາຄານຮຽນແບບປະຖົມ ປະຖານ, ຫ້ອງຮຽນແອອັດ,ນັກຮຽນລົ້ນຫ້ອງເຮັດໃຫ້ການຮຽນ-ການສອນພົບຄວາມຫຍຸ້ງຍາກມາເຖິງສົກຮຽນ 2018-2019 ທາງ ໂຮງຮຽນໄດ້ຮັບທຶນຊ່ວຍເຫຼືອລ້າຈາກອົງການມູນນິທິເກື້ອຝັນເດັກປະເທດໄທໃນການກໍ່ສ້າງອາຄານ ຮຽນຫຼັງໃໝ່ 1 ຫຼັງ, 5 ຫ້ອງຮຽນມີຂະໜາດກ້ວາງ 6x7 ແມັດ, ລວງ ຍາວ 35 ແມັດ ລະບຽງ 2 ແມັດ, ເປັນອາຄານຖາວອນຊັ້ນດຽວເທດ້ວຍເບຕົງເສີມເຫຼັກ, ມຸງດ້ວຍກະເບື້ອງ ແລະມີຫ້ອງນໍ້າ 1 ຫຼັງ 4 ຫ້ອງ, ແຕ່ລະຫ້ອງຮຽນມີກະດານ ແລະໂຕະຕັ້ງຈຳນວນ 20 ຊຸດ.

ໂຄງການດັ່ງກ່າວໄດ້ເລີ່ມລົງມື ກໍ່ສ້າງແຕ່ວັນທີ 15 ເມສາ 2019 ແລະສຳເລັດລົງໃນວັນທີ 25 ຕຸລາ 2019 ໃຊ້ເວລາກໍ່ສ້າງທັງໝົດ 5 ເດືອນກວ່າລວມມູນຄ່າທັງໝົດ 483 ລ້ານກີບນອກຈາກນີ້ຍັງມີທຶນສົມທົບຈາກຊຸມຊົນພາຍໃນກຸ່ມ ບ້ານ ແລະໂຮງຮຽນຈຳນວນ 53 ລ້ານກີບ, ໂອກາດດັ່ງກ່າວທ່ານ ແດນນຽວ ຍັງໄດ້ມອບອຸປະກອນກີລາອີກຈຳນວນໜຶ່ງໃຫ້ແກ່ໂຮງຮຽນຕື່ມອີກ.

-------------------

ພາບ ແລະຂ່າຈາກໜັງສືິພິມເສດຖະກິດ-ສັງຄົມ

แชร์