ການປູກພືດລະດູແລ້ງ ກາຍເປັນທ່າແຮງໃຫ້ແກ່ການສ້າງເສດຖະກິດຄອບຄົວ

  ການສ້າງເສດຖະກິດຄອບຄົວດ້ວຍການປູກພືດຕາມລະດູການ, ບໍ່ວ່າຈະເປັນພືດລົ້ມລຸກ, ພືດຜັກຊະນິດຕ່າງໆກໍ່ແມ່ນປັດໄຈໜຶ່ງທີ່ສໍາຄັນທີ່ຕິດພັນກັບການດໍາລົງຊີວິດປະຈໍາວັນຂອງພະນັກງານ ແລະ ປະຊາຊົນບັນດາເຜົ່າດ້ວຍມູນເຊື້ອດຸໝັ່ນຂະຫຍັນພຽນທີ່ສືບທອດກັນມາແຕ່ລະຍຸກ-ແຕ່ລະສະໄໝ; ຊຶ່ງຍາມໃດພັກ-ລັດເຮົາກໍໄດ້ເອົາ ໃຈໃສ່ຊຸກຍູ້, ສົ່ງເສີມໃຫ້ຄອບຄົວພະນັກງານ ແລະປະຊາຊົນທໍາການຜະລິດໃຫ້ກາຍເປັນສິນຄ້າ, ສ້າງລາຍຮັບໃຫ້ມີຢູ່ມີກິນ, ເພື່ອສູ້ຊົນບຸກບືນພັດທະນາຄອບຄົວຂອງຕົນໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

  ຄືດັ່ງຄອບຄົວ ທ່ານ ທອງສວນ ແສນພັນສີລິ ອາຍຸ 39 ປີ ແລະ ນາງ ປ໋ອກ ຈັນທອງ ອາຍຸ 32 ປີ ອາຊີບ ຊາວກະສິກອນ, ມີສະມາຊິກພາຍໃນຄອບຄົວລວມ 7 ຄົນ , ຍິງ 2 ຄົນ, ມີແຮງງານຕົ້ນຕໍ 4 ຄົນ, ຍິງ 2 ຄົນ, ປະຈຸບັນຢູ່ໜ່ວຍ 10 ບ້ານຫາດແດງ ເມືອງແກ່ນທ້າວ ແຂວງໄຊຍະບູລີ ແມ່ນໜຶ່ງໃນຄອບຄົວຕົວແບບທີ່ໄດ້ເອົາຊີວິດຕິດພັນກັບການປູກພືດລະດູແລ້ງເປັນສິນຄ້າ, ສາມາດສ້າງລາຍຮັບເຂົ້າຄອບຄົວບັນລຸໄດ້ 145,6 ລ້ານກີບ ຕໍ່ປີ, ສະເລ່ຍໃສ່ຄົນໃນຄອບຄົວໄດ້ 20,8 ລ້ານກີບຕໍ່ຄົນຕໍ່ປີ ຫຼື ເທົ່າ ກັບ 2.447 ໂດລາສະຫະລັດ.

ສະໜັບສະໜຸນໂດຍ: HONDA

 ທ່ານ ທອງສວນ ແສນພັນສີລິ ໃຫ້ຮູ້ວ່າ: ກ່ອນໜ້ານີ້ຄອບຄົວຂອງຕົນເອງແມ່ນໄດ້ຢຶດຖືອາຊີບປູກຝັງລ້ຽງສັດແບບທໍາມະຊາດ, ລາຍຮັບພາຍໃນຄອບຄົວເມື່ອທຽບໃສ່ຄ່າຄອງຊີບໃນທ້ອງຕະຫຼາດເວລານັ້ນແມ່ນພົບຄວາມຫຍຸ້ງຍາກ, ຂາດໆເຂີນໆ; ແຕ່ພາຍຫຼັງທີ່ພັກ-ລັດ, ກໍຄືອົງການປົກຄອງເມືອງໄດ້ມີນະໂຍບາຍຈັດສັນອາຊີບຄົງທີ່, ຈັດສັນດິນທໍາການຜະລິດໃຫ້ປະຊາຊົນເພື່ອພັດທະນາຊີວິດການເປັນຢູ່ຂອງຄອບໃຫ້ດີຂຶ້ນເທື່ອລະກ້າວຕົນເອງຈຶິ່ງໄດ້ປຶກສາຫາລືກັບຄອບຄົວຫັນທິດການຜະລິດແບບທໍາ ມະຊາດ, ກາຍມາທໍາການຜະລິດເປັນສິນຄ້າ, ໃນເບື້ອງຕົ້ນຢູ່ໃນຄອບຄົວມີເນື້ອທີ່ດິນຜະລິດທັງ ໝົດ 14,62 ເຮັກຕາໃນນີ້ເນື້ອທີ່ ນາມີ 1,35 ເຮັກຕາຜົນຜະລິດໄດ້ 6,3 ໂຕນ, ເນື້ອທີ່ປູກມັນຕົ້ນເກືອບ 11 ເຮັກຕາຜົນຜະລິດໄດ້ 200 ໂຕນ, ປູກໝາກນໍ້າຜົນຜະລິດໄດ້ 12 ໂຕນ, ປູກໝາກຖົ່ວຝັກຍາວ ແລະພືດຜັກຊະນິດຕ່າງໆ, ຜົນຜະລິດໄດ້ 2 ໂຕນ, ປູກຢາງພາລາ 2,28 ເຮັກຕາ, ຈໍານວນ 1.300 ຕົ້ນທັງໝົດນີ້ໄດ້ກາຍເປັນທ່າແຮງໃຫ້ແກ່ການພັດທະນາເສດຖະກິດຄອບຄົວ.

  ນັບແຕ່ປີ 2015 ເປັນຕົ້ນມາພາຍຫຼັງໄດ້ມີມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງ ແລະມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກເມືອງແກ່ນ ທ້າວ; ກໍຄືແຜນພັດທະນະເສດຖະກິດ-ສັງຄົມຂອງບ້ານວາງອອກ, ຄອບຄົວຂອງ ທ່ານ ທອງສວນ ແສນພັນສີລິ ຈຶິ່ງເກີດມີແນວຄິດ ຢາກພັດທະນາເສດຖະກິດຄອບຄົວໃຫ້ມີຊີວິດການເປັນຢູ່ດີຂຶ້ນຄືກັບຄອບຄົວອື່ນໆຈຶ່ງໄດ້ຫັນມາຜະລິດກະສິກໍາປູກພືດລະດູແລ້ງເປັນສິນຄ້າເຊັ່ນ: ປູກໝາກນໍ້າ, ໝານຖົ່ວຝັກຍາວ, ພືດຜັກຊະນິດຕ່າງໆ, ເບື້ອງຕົ້ນໄດ້ທົດລອງປູກໃນເນື້ອທີ່ບໍ່ເຖິງເຮັກຕາເຫັນວ່າໄດ້ຮັບຜົນຜະລິດດີ ແລະ ມີຕະຫຼາດຮອງຮັບດີຂຶ້ນ; ຕໍ່ມາກໍໄດ້ຂະຫຍາຍເນື້ອທີ່ກວ້າງອອກຕື່ມໂດຍໃຊ້ທຶນເບື້ອງຕົ້ນປະມານ 1,5 ລ້ານກີບ, ເນື່ອງຈາກການປູກພືດສ່ວນຫຼາຍແມ່ນອາໄສແຮງງານຄົນເປັນຫຼັກຈຶ່ງບໍ່ໄດ້ນໍາໃຊ້ແຫຼ່ງທຶນຫຼາຍສ່ວນຂັ້ນຕອນການປູກ, ບົວລະ ບັດຮັກສາ ແລະ ການສະໜອງຜົນຜະລິດໃຫ້ທ້ອງຕະຫຼາດ.

ພາບຂ່າວ:

  ທ່ານ ທອງສວນ ແສນພັນສີລິ ໃຫ້ຮູ້ວ່າ: ກ່ອນອື່ນໝົດແມ່ນໄດ້ໄປຊອກຈັດຊື້ແນວພັນຊະນິດຕ່າງໆຕາມທ້ອງຕະຫຼາດທົ່ວໄປ, ການປູກແຕ່ລະຊຸດແມ່ນໃຊ້ແກ່ນໝາກນໍ້າ 2 ກິໂລ; ແກ່ນໝາກຖົ່ວຝັກຍາວ 1 ກິໂລ ແລະແກ່ນຜັກຊະນິດຕ່າງໆເຄິ່ງກິໂລ; ພາຍຫຼັງທີ່ຈັດຊື້ແກ່ນແນວພັນມາໄວ້ແລ້ວ, ກໍໄດ້ ກະກຽມເນື້ອທີ່ດິນ, ຂຸດຮ່ອງໃສ່ຝຸ່ນເພື່ອຢອດເມັດພັນ,ໃນນີ້ວິທີການປູກໝາກນໍ້າແມ່ນປູກໄລຍະຫ່າງ 3x3 ແມັດ,ໝາກຖົ່ວຝັກຍາວໄລຍະຫ່າງ 1x1 ແມັດ,ສ່ວນພືກຜັກຕ່າງໆແມ່ນຂຸດເປັນໜານ, ແລ້ວປົກຫຸ້ມດ້ວຍຝຸ່ນຄອກ,ຊຶ່ງແຕ່ລະຊຸດໃຊ້ຝຸ່ນຄອກປະມານ 1 ໂຕນ, ພາຍຫຼັງປູກສຳເລັດແລ້ວ, ໃນແຕ່ລະມື້ໄດ້ເອົາໃຈໃສ່ລົງຕິດຕາມ, ກວດກາບົວລະບັດຮັັັກສາ, ອະນາໄມເສຍຫຍ້າເປັນປະຈໍາ; ພາຍຫຼັງ ເບ້ຍໝາກຖົ່ວມີອາຍຸ 15 ມື້; ແລ້ວ ຈິ່ຶງປັກຄ້າງເພື່ອຮັກສາຝັກໃຫ້ມີຄວາມຍາວ, ພໍອາຍຸພືດຊະນິດ ຕ່າງໆໄດ້ 45 ວັນກໍເລີ່ມໃຫ້ໝາກ ແລະຮອດໄລຍະ 90 ກໍ່ສາມາດເກັບກູ້ຜົນຜະລິດ, ສົ່ງຂາຍອອກສູ່ທ້ອງຕະຫຼາດ, ໂດຍມີຕະຫຼາດພາຍໃນເມືອງ, ຕ່າງເມືອງ ແລະຕ່າງແຂວງຮອງຮັບ; ບາງຄັ້ງກໍມີແມ່ຄ້າໄປຊື້ຢູ່ກັບທີ່, ບາງຄັ້ງກໍໄປຂາຍເອງຢູ່ຕະຫຼາດພາຍໃນເມືອງ ແລະ ຂາຍສົ່ງໃຫ້ຕະຫຼາດເມືອງປາກລາຍ ແຂວງໄຊຍະບູລີ ແລະຕະຫຼາດນະຄອນ-ຫຼວງພະບາງ ແຂວງຫຼວງພະບາງ.

  ທ່ານ ທອງສວນ ແສນພັນສີລິ ກ່າວຕື່ມວ່າ: ຈາກຜົນສໍາເລັດໃນການສ້າງເສດຖະກິດ ແລະ ພັດທະນາຊີວິດການເປັນຢູ່ຂອງຄອບຄົວທີ່ກ່າວມາຂ້າງເທິງນັ້ນແມ່ນຍ້ອນການນໍາເອົາແນວທາງນະໂຍບາຍ ຂອງພັກ-ລັດມາຈັດຕັ້ງປະຕິບັດໂດຍມີວິຊາການຈາກຫ້ອງການທີ່ກ່ຽວຂ້ອງລົງໃກ້ຊິດຕິດແທດ, ກະຕຸກຊຸກຍູ້, ບວກໃສ່ມູນເຊື້ອດຸໝັ່ນຂະຫຍັນພຽນ ແລະ ຄວາມເປັນເອກະພາບພາຍໃນຄອບຄົວໂດຍເລີ່ມເຮັດແຕ່ນ້ອຍຫາປານກາງແຕ່ຮັບປະກັນຜົນຜະລິດສູງຈິ່ຶງສາ ມາດກ້າວໄປສູ່ຄວາມສໍາເລັດໄດ້, ສໍາລັບທິດທາງໃນຕໍ່ໜ້ານີ້ຈະສືບຕໍ່ປັບປຸງທາງດ້ານເຕັກນິກການຜະລິດ, ເຮັດໃຫ້ຜົນຜະລິດກາຍເປັນສິນຄ້າທີ່ມີຄຸນນະພາບ ແລະ ປອດສານພິດເພື່ອສາມາດປ້ອນຕະຫຼາດພາຍໃນ ແລະ ຕ່າງເມືອງໃຫ້ໄດ້ທັງສອງລະດູ.

__________

ຂຽນໂດຍ: ສີເມືອງ ໄຊຍະເວດ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์