5 ປີເສດຖະກິດເມືອງຮຸນ ໄດ້ຮັບການພັດທະນາຢ່າງຕໍ່ເນື່ອງ

  ທ່ານ ບຸນຕຽມ ສຸພັນທອງ ຄະນະບໍລິຫານງານພັກເມືອງຮຸນໄດ້ສະຫຼຸບຕີລາຄາການຊີ້ນຳໆພາຂອງຄະນະບໍລິຫານງານພັກເມືອງສະໄໝທີ 11 ຕໍ່ກອງປະຊຸມອົງຄະ ນະພັກເມືອງຄັ້ງທີ 12 ວ່າ: ວຽກງານພັດທະນາເສດຖະກິດໃນໄລຍະ 5 ປີຜ່ານມາຄະນະພັກເມືອງສຸມທຶນຮອນເຂົ້າໃສ່ໃນການພັດທະນາເສດຖະກິດ-ສັງຄົມ, ດ້ວຍການສົ່ງເສີມການຜະລິດກະສິກໍາເປັນສິນຄ້າ, ການປຸງແຕ່ງຂະໜາດນ້ອຍການບໍລິການ ແລະ ການທ່ອງທ່ຽວ, ເຮັດໃຫ້ເສດຖະກິດພາຍໃນເມືອງຂະຫຍາຍຕົວຢ່າງຕໍ່ ເນື່ອງສະເລ່ຍ 6% ຕໍ່ປີ, ລວມຍອດລາຍຮັບ ແລະ ບໍລິການພາຍໃນບັນລຸໄດ້ 1.002 ຕື້ກີບ, ສະເລ່ຍລາຍຮັບໄດ້ 12,16 ລ້ານກີບ ຫຼື ເທົ່າກັບ 1.439 ໂດລາຕໍ່ຄົນຕໍ່ປີເທົ່າກັບ 96% ຫຼຸດຄາດໝາຍ 61 ໂດລາ, ທຽບໃສ່ປີ 2014 ເພີ່ມຂຶ້ນ 405 ໂດລາ; ການຈັດເກັບລາຍຮັບເຂົ້າງົບປະມານພາຍໃນເມືອງໄດ້ທັງໝົດ 60 ຕື້ກວ່າກີບ ລື່ນຄາດໝາຍ 128% ເພີ່ມຂຶ້ນຈາກ 6.791 ລ້ານກີບ ໃນນີ້ປີ 2014 ມາເປັນ 14.688 ລ້ານກີບ ໃນປີ 2019 ຊຶ່ງລື່ນແຜນທຸກໆປີສາມາດກຸ້ມຕົນເອງດ້ານລາຍຈ່າຍ 31,50% ຂອງລາຍຈ່າຍທັງໝົດ.

ສະໜັບສະໜຸນໂດຍ: HONDA

  ດ້ານກະສິກໍາ ແລະປ່າໄມ້ໄດ້ສົ່ງເສີມການປູກຝັງ-ລ້ຽງສັດຂອງປະຊາຊົນເຮັດໃຫ້ການຜະລິດຂອງປະຊາຊົນຂະຫຍາຍຕົວກາຍເປັນການຜະລິດເປັນສິນຄ້າ,ອັນພົ້ນເດັ່ນແມ່ນການປູກສາລີ, ປູກກ້ວຍ, ປູກເຂົ້ານາ, ປູກໄມ້ໃຫ້ໝາກ, ປູກພືດຜັກຕ່າງໆ, ລ້ຽງປາ, ລ້ຽງງົວ, ລ້ຽງແບ້, ລ້ຽງໝູແບບເປັນກຸ່ມເປັນຟາມຫຼາຍຂຶ້ນ, ສາມາດສະ ໜອງເຂົ້າກິນ, ຊີ້ນ, ປາ, ພືດຜັກໃຫ້ທ້ອງຕະຫຼາດພາຍໃນ ແລະສົ່ງອອກຈໍານວນໜຶ່ງ, ດ້ານອຸດສາຫະກໍາ, ຫັດຖະກໍາກໍເອົາໃຈໃສ່ໃນການຄຸ້ມຄອງ ແລະປັບປຸງບັນດາຫົວໜ່ວຍທຸລະກິດພາຍໃນເມືອງເຂົ້າສູ່ລະບຽບກົດໝາຍໄດ້ຂະຫຍາຍຕະຫຼາດນັດໄປສູ່ຊົນນະບົດເພື່ອສະດວກໃນການແລກປ່ຽນ,ຊື້-ຂາຍສິນຄ້າ, ພື້ນຖານໂຄງລ່າງດ້ານຄົມມະນາຄົມຂົນສົ່ງກໍໄດ້ປັບປຸງ ແລະ ກໍ່ສ້າງເສັ້ນທາງນັບແຕ່ເທດສະບານເມືອງໄປຫາກຸ່ມບ້ານ ແລະ ບ້ານທີ່ຢູ່ຊົນນະບົດເຮັດໃຫ້ບ້ານທີ່ມີເສັ້ນທາງລົດເຂົ້າເຖິງກວມ 99% ຂອງຈໍານວນບ້ານທັງໝົດ.

  ການແກ້ໄຂຄວາມທຸກຍາກຂອງປະຊາຊົນກໍໄດ້ຮັບການແກ້ໄຂຢ່າງຕໍ່ເນື່ອງໂດຍການພັດທະນາພື້ນຖານໂຄງລ່າງໃຫ້ແກ່ບ້ານ, ສ້າງເງື່ອນໄຂໃຫ້ປະຊາຊົນເຂົ້າເຖິງການບໍລິການສາທາລະນະສຸກ, ການບໍລິການດ້ານການສຶກສາ, ຜ່ານການຈັດຕັ້ງປະຕິບັດເຮັດໃຫ້ຫຼາຍຄອບຄົວ, ຫຼາຍບ້ານຫຼຸດພົ້ນອອກຈາກຄວາມທຸກຍາກ, ສາມາດແກ້ໄຂຄວາມທຸກຍາກຂອງປະຊາຊົນໄດ້ 62 ບ້ານ,ກວມເອົາ 65%, ແລະຍັງບໍ່ທັນພົ້ນທຸກ 32 ບ້ານ, ກວມເອົາ 35% ໃນນັ້ນປະກາດບ້ານພັດທະນາໄດ້ 43 ບ້ານ, ກວມເອົາ 45%.

ພາບຂ່າວ

   ສຸມໃສ່ຍົກລະດັບໃນການຮຽນ-ການສອນສາຍສາມັນ,ເຮັດໃຫ້ເມືອງຮຸນສາມາດປະກາດຊັ້ນ ມ.ຕົ້ນ ບໍາລຸງສໍາເລັດທົ່ວເມືອງ, ໄດ້ປັບປຸງອາຄານຮຽນແຕ່ລະຊັ້ນຮຽນ, ສະໜອງອຸປະກອນການຮຽນໃຫ້ແຕ່ລະໂຮງຮຽນໂດຍພື້ນຖານແມ່ນພຽງພໍ, ອັນໄດ້ເຮັດໃຫ້ອັດຕາເຂົ້າຮຽນລວມຊັ້ນປະຖົມໄດ້ບັນລຸ 99,34%, ຂະຫຍາຍ ແລະ ປັບ ປຸງຕາໜ່າງສາທາລະນະສຸກ, ສ້າງບ້ານສາທາລະນະສຸກແບບຢ່າງ, ດ້ານສຸຂະສຶກສາໄປສູ່ເຂດຊົນນະບົດ, ໃນນັ້ນໄດ້ສ້າງ ແລະ ປັບປຸງນໍ້າລິນສະອາດ, ວິດຖ່າຍ, ສັກຢາກັນພະຍາດໃຫ້ແມ່ ແລະເດັກເຮັດໃຫ້ອັດຕາການຕາຍຂອງເດັກນ້ອຍ ແລະແມ່ຫຼຸດລົງ, ໄດ້ປັບປຸງຍົກລະດັບໂຮງໝໍເມືອງເປັນໂຮງໝໍຊຸມຊົນ, ສຸກສາລາກາຍເປັນໂຮງໝໍນ້ອຍ, ປັບປຸງລະບົບສື່ມວນຊົນແຕ່ຂັ້ນເມືອງລົງຮອດຂັ້ນບ້ານ, ສາມາດດໍາເນີນລາຍການລະບົບກະຈາຍສຽງວິທະຍຸຊຸມຊົນເປັນປົກກະຕິ, ສ້າງບ້ານວັດທະນະທໍາໄດ້ 38 ບ້ານ, ຕ້ານສະກັດກັ້ນການຫຼິ້ນກິນຟຸມເຟືອຍຂອງສັງຄົມຢ່າງແຂງແຮງ.

 ນອກນັ້ນເອົາໃຈໃສ່ປັບປຸງຄຸ້ມຄອງການບໍລິການໂຮງແຮມ, ເຮືອນພັກ, ຮ້ານອາຫານ ແລະເຮັດໃຫ້ນັກທ່ອງທ່ຽວພາຍໃນ ແລະຕ່າງປະເທດມາທ່ອງທ່ຽວຫຼາຍຂຶ້ນ,ການຄຸ້ມຄອງແຮງງານພາຍໃນ ແລະຕ່າງປະເທດ, ການປະຕິບັດນະໂຍບາຍຕ່າງໆຕໍ່ສັງຄົມແມ່ນໄດ້ຮັບການຈັດຕັ້ງປະຕິບັດ ແລະປັບປຸງແກ້ໄຂດີຂຶ້ນເທື່ອລະກ້າວ.

-----------------

ໜັງສືພີມເສດຖະກິດ-ສັງຄົມ

แชร์