ສາລະວັນ ແຕ່ງຕັ້ງຜູ້ຮັກສາການຫົວໜ້າພະແນກ ຖວທ

   ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງສາລະວັນ (ຖວທ) ໄດ້ຈັດ ພິທີມອບ-ຮັບໜ້າທີ່ຫົວໜ້າພະແນກ ຖວທ ແຂວງ ຢ່າງເປັນທາງການໃນວັນທີ 25 ພະຈິກ ລະຫວ່າງສະຫາຍ ສົມໃຈ ອຸ່ນຈິດ ຫົວໜ້າພະແນກ ຖວທ ຜູ້ເກົ່າກັບສະຫາຍມະໄລວອນສີປະເສີດຮອງຫົວໜ້າພະແນກ ຖວທ ເປັນຜູ້ຮັກສາການ, ໂດຍຊ່ອງໜ້າສະຫາຍ ພູທົງ ຄຳມະນີວົງ ຮອງເຈົ້າແຂວງໆ ສາລະວັນ ຜູ້ຊີ້ນຳວຽກງານວັດທະນະທຳສັງຄົມ, ມີບັນດາພາກສ່ວນທີ່ກ່ຽວຂ້ອງ ແລະ ຫົວໜ້າຫ້ອງການ ຖວທ ຕະຫຼອດຮອດພະນັກງານຫຼັກແຫຼ່ງຂະແໜງການອ້ອມຂ້າງເຂົ້າຮ່ວມເປັນສັກຂີພິຍານ.

ສະໜັບສະໜຸນໂດຍ: HONDA

  ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງສາລະວັນສະບັບເລກທີ 709/ຈຂ.ສວ ລົງ ວັນທີ 12 ພະຈິກ 2019 ວ່າດ້ວຍການໂຍກຍ້າຍສະຫາຍ ສົມໃຈ ອຸ່ນຈິດ ຫົວໜ້າພະແນກ ຖວທ ຜູ້ເກົ່າໄປປະຈຳການຢູ່ບ່ອນໃໝ່ ແລະ ປະຕິບັດຕາມຂໍ້ຕົກລົງເລກທີ 710/ຈຂ. ສວ ລົງວັນທີ 12 ພະຈິກ 2019 ວ່າດ້ວຍການເຫັັນດີແຕ່ງ ຕັ້ງ: ສະຫາຍ ມະໄລວອນ ສີປະເສີດ ຮອງ ຫົວໜ້າພະແນກ ຖວທ ແຂວງເປັນຜູ້ຮັກສາການ, ຈາກນັ້ນ, ສະຫາຍ ສົມໃຈ ອຸ່ນຈິດ ກໍ່ໄດ້ກ່າວມອບໜ້າທີ່ວຽກງານໃນແຕ່ລະດ້ານໃນໄລຍະທີ່ໄດ້ຊີ້ນຳໆພາ, ທັງດ້ານດີ, ຂໍ້ຄົງຄ້າງ ແລະ ແຜນສືບຕໍ່ປະຕິບັດໃນຕໍ່ໜ້າ, ໂດຍສະເພາະແມ່ນ ວຽກງານກໍ່ສ້າງພັກ-ພະນັກງານ ເປັນຕົ້ນ: ໄດ້ປະກາດຈາກໜ່ວຍພັກເປັນຮາກຖານພັກ ແລະ ໄດ້ຈັດສົ່ງພະນັກງານໄປຍົກລະດັບທາງດ້ານທິດສະດີການ ເມືອງ-ການປົກຄອງຈຳນວນຫຼາຍສະຫາຍ, ຄຽງຄູ່ກັນກັບວຽກງານວິຊາສະເພາະກໍ່ໄດ້ຮັບຜົນສຳເລັດຫຼາຍດ້ານເປັນຕົ້ນ: ໄດ້ມີການປັບປຸງວຽກງານສື່ມວນຊົນທາງດ້ານປະລິມານ ແລະ ຄຸນນະພາບເຊັ່ນ: ຍົກລະດັບໜັງສືພິມຂອງ ແຂວງ, ລາຍການວິທະຍຸ ແລະ ລາຍການໂທລະພາບ. ນອກນັ້ນ ໄດ້ເອົາໃຈໃສ່ສ້າງສິ່ງອຳນວຍຄວາມສະດວກໃນເຂດແຫຼ່ງທ່ອງທ່ຽວຕ່າງໆ ເປັນຕົ້ນ: ໄດ້ນຳພາບຸກເບີກສະຖານທີ່ແຫຼ່ງທ່ອງທ່ຽວແຫ່ງໃໝ່ຄື: ແຫຼ່ງທ່ອງທ່ຽວອຸທິຍານພູຜາສຸກ ແລະວຽກງານອື່ນໆ ກໍ່ໄດ້ຮັບການພັດທະນາດີຂຶ້ນເປັນກ້າວໆ. ຈາກນັ້ນ, ກໍ່ໄດ້ລົງ ນາມເຊັນມອບ-ຮັບໜ້າຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສາລະວັນຢ່າງເປັນທາງການ.

  ໂອກາດດຽວກັນນັ້ນ ສະຫາຍ ພູທົງ ຄຳມະນີວົງ ຮອງເຈົ້າແຂວງໆສາລະວັນກໍ່ໄດ້ໂອ້ລົມ, ກ່ອນອື່ນທ່ານໄດ້ຍ້ອງຍໍ, ຊົມເຊີຍຕໍ່ໝາກຜົນໆງານທີ່ຄະນະພັກ, ຄະນະນຳກໍ່ຄືພະນັກງານຫຼັກແຫຼ່ງຍາດມາໄດ້, ພ້ອມທັງໄດ້ເນັ້ນໜັກໃຫ້ເອົາໃຈໃສ່ເພີ່ມທະວີຄວາມສາມັກຄີໃຫ້ເປັນປຶກແຜ່ນ, ໜັກແໜ້ນ, ເອົາໃຈໃສ່ຊີ້ນຳໆພາວຽກງານໃນຂົງເຂດຖະແຫຼງຂ່າວ, ວັດທະນະທຳ ແລະ ທ່ອງທ່ຽວໃຫ້ມີຜົນສຳເລັດດີຂຶ້ນກວ່າເກົ່າ, ຕ້ອງໄດ້ປະເມີນຄືນບັນດາໜ້າວຽກຕ່າງໆທີ່ໄດ້ຈັດຕັ້ງປະຕິບັດໃນໄລຍະຜ່ານມາດ້ານດີກໍ່ຕ້ອງສືບຕໍ່ຜັນຂະຫຍາຍ ແລະຂໍ້ຄົງຄ້າງກໍ່ຕ້ອງສືບຕໍ່ແກ້ໄຂໃຫ້ດີຂຶ້ນ. ຄຽງຄູ່ກັນນັ້ນກໍ່ໄດ້ຮຽກຮ້ອງໃຫ້ເອົາໃຈໃສ່ພັດທະນາແຫຼ່ງທ່ອງທ່ຽວແຫ່ງໃໝ່ຂອງແຂວງໃຫ້ເປັນໃບໜ້າອັນໃໝ່ ແລະໃຫ້ມີຜົນສຳເລັດເປັນກ້າວໆ.

__________

ຂຽນໂດຍ: ວິໄລວອນ ສິດທິໄຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์