ຍີ່ປຸ່ນ ໃຫ້ການຊ່ວຍເຫຼືອປັບປຸງທັກສະການອ່ານຂອງເດັກນ້ອຍ

 ວັນທີ 28 ພະຈິກ ຜ່ານມາລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອລ້າຈຳນວນ 516.347 ໂດລາ ເພື່ອປັບປຸງທັກສະການອ່ານຂອງເດັກນ້ອຍ ແລະສະພາບແວດລ້ອມດ້ານການສຶກສາ, ລວມໄປເຖິງຄວາມກ້າວໜ້າຂອງໂຮງຮຽນປະຖົມໃນ ສປປ ລາວ, ພິທີເຊັນສັນຍາໂຄງການ ໄດ້ຖືກຈັດຂຶ້ນທີ່ສະຖານທູດຍີ່ປຸ່ນ, ລະຫວ່າງພະນະທ່ານ ທາເກວາກະ ເຄໂຊ, ເອກອັກຄະລາຊະທູດຍີ່ປຸ່ນປະຈໍາ ສປປ ລາວ ແລະທ່ານ ນາງ ມິຢາອຸຈິ ມາຢຸໂກະ ຜູ້ຈັດການໂຄງການຂອງອົງການສຸພະນິມິດສາກົນແຫ່ງປະເທດຍີ່ປຸ່ນ (World Vision Japan ຫຼື WVJ) ຊຶ່ງເປັນອົງການບໍ່ຫວັງຜົນກໍາໄລຈາກປະເທດຍີ່ປຸ່ນ, ສຳລັບການເຊັນສັນຍາຊ່ວຍເຫຼືອຄັ້ງນີ້ແມ່ນການສະໜັບສະໜູນທຶນປີທຳອິດຂອງໂຄງການທີ່ມີອາຍຸ 3 ປີ.

  ໂຄງການທີ່ມີຊື່ວ່າ “ການປັບປຸງທັກສະການອ່ານຂອງເດັກ ນ້ອຍ ແລະສະພາບແວດລ້ອມດ້ານການສຶກສາລວມໄປເຖິງຄວາມກ້າວໜ້າຂອງໂຮງຮຽນປະຖົມໃນເມືອງທ່າປາງທອງ ແຂວງສະຫວັນນະເຂດໃນປີທຳອິດນີ້ເອງມີເປົ້າໝາຍທີ່ຈະຮັບປະກັນໃຫ້ນັກຮຽນທຸກຄົນໃນເມືອງທ່າປາງທອງ ແຂວງສະຫວັນນະເຂດ ບໍ່ວ່າຈະເປັນເພດໃດ, ຊົນເຜົ່າໃດ, ສະພາບທາງເສດຖະກິດ ຫຼື ມີການສູນເສຍອົງຄະ,ກໍ່ສາມາດເຂົ້າເຖິງການສຶກສາຂັ້ນປະຖົມ ແລະ ປັງປຸງການຮຽນຮູ້ໃນເບື້ອງຕົ້ນໄດ້, ທ່າປາງ ທອງແມ່ນໜຶ່ງໃນບັນຫາເມືອງທີ່ມີຄວາມສຳຄັນທີ່ສຸດໃນປະເທດລາວ, ຄວາມທຸກຍາກ,ຄວາມຫ່າງໄກທາງພູມສາດລວມໄປເຖິງການຢູ່ ໃນຊົນເຜົ່າໃດໜຶ່ງນັ້ນສາມາດສົ່ງຜົນກະທົບໃນແງ່ລົບສູ່ທັກສະການຮຽນຮູ້ ແລະການກຽມພາສາຂອງນັກຮຽນຫຼາຍຄົນ.

  ອົງການ WVJ ຈະຊ່ວຍສະໜອງຫຼັກສູດການຝຶກອົບຮົມອາຈານເພື່ອຍົກລະດັບການສອນດ້ານການຂຽນການອ່ານ, ສະໜັບສະໜູນຊື້ອຸປະກອນທີ່ຈຳເປັນຕໍ່ສຸຂາພິ ບານ ແລະໃຫ້ຄຳແນະນຳຕໍ່ຜູ້ປົກຄອງ, ຊຸມຊົນໃຫ້ການຊ່ວຍເຫຼືອເດັກນ້ອຍພັດທະນາທັກສະການອ່ານຂອງພວກເຂົາ, ເພື່ອປະກອບສ່ວນເຂົ້າໃນສ່ວນປະກອບສຳຄັນຂອງການສຶກສາທີ່ມີຄຸນນະພາບໃນໂຮງຮຽນໝູ່ບ້ານທີ່ເມືອງທ່າປາງທອງ.

----------------

 ໜັງສືພິມເສດຖະກິດ-ສັງຄົມ

• 03/12/2019