ນາຍົກເຂົ້າຮ່ວມກອງປະຊຸມສຸດຍອດຂອບການຮ່ວມມືແມ່ນໍ້າຂອງ-ສ.ເກົາຫຼີ ຄັ້ງປະຖົມມະລຶກ

  ວັນທີ 27 ພະຈິກ 2019, ພະນະ ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ນໍາພາຄະນະຜູ້ແທນ ສປປ ລາວເຂົ້າຮ່ວມກອງປະຊຸມສຸດຍອດຂອບການຮ່ວມມືແມ່ ນໍ້າຂອງ-ສ.ເກົາຫຼີ ຄັ້ງປະຖົມມະລຶກທີ່ນະຄອນປູຊານ, ສ.ເກົາຫຼີ ຊຶ່ງມີບັນດາຜູ້ນຳຈາກປະເທດສະມາຊິກແມ່ນໍ້າຂອງ-ສ.ເກົາຫຼີ ເຂົ້າຮ່ວມຢ່າງພ້ອມພຽງ,ໂດຍກອງປະ ຊຸມໄດ້ດຳເນີນໄປພາຍໃຕ້ການເປັນປະທານຮ່ວມຂອງທ່ານປະທານາທິບໍດີສາທາລະນະລັດ ເກົາຫຼີ ແລະທ່ານນາຍົກລັດຖະມົນຕີແຫ່ງຣາຊະອານາຈັກໄທ.

  ຂອບການຮ່ວມມືແມ່ນໍ້າຂອງ-ສ.ເກົາຫຼີ ໄດ້ຖືກສ້າງຕັ້ງຂຶ້ນໃນປີ 2011 ໂດຍມີປະເທດສະມາຊິກທັງໝົດ 6 ປະເທດຄື: ກໍາປູເຈຍ, ລາວ, ມຽນມາ, ໄທ, ຫວຽດ ນາມ ແລະ ສ.ເກົາຫຼີ ຈຸດປະສົງຂອງການສ້າງຕັ້ງກົນໄກການຮ່ວມມືດັ່ງກ່າວແມ່ນເພື່ອຮັດແໜ້ນການພົວພັນ ແລະ ຮ່ວມມືທາງດ້ານເສດຖະກິດລະຫວ່າງບັນດາປະ ເທດແມ່ນໍ້າຂອງກັບ ສ.ເກົາຫຼີ ກໍຄືເພີ່ມທະວີການຮ່ວມມືລະຫວ່າງອາຊຽນ ແລະ ສ.ເກົາຫຼີ ແລະຢູ່ໃນກອງປະຊຸມລັດຖະມົນຕີຕ່າງປະເທດຄັ້ງທີ 8 ໃນປີ 2018 ຜ່ານມາ, ໄດ້ຕົກລົງຍົກລະດັບກົນໄກການຮ່ວມມືໄປສູ່ລະດັບສຸດຍອດຊຶ່ງ ສ.ເກົາຫຼີ ໄດ້ຮັບເປັນເຈົ້າພາບຈັດກອງປະຊຸມຄັ້ງປະຖົມມະລຶກໃນຄັ້ງນີ້.

  ກອງປະຊຸມສຸດຍອດແມ່ນໍ້າຂອງ-ສ.ເກົາຫຼີ ຄັ້ງປະຖົມມະລຶກໃນປີນີ້ແມ່ນເປັນຂີດໝາຍປະຫວັດສາດອັນສໍາຄັນໃນການຍົກລະດັບກົນໄກການຮ່ວມມືຂຶ້ນສູ່ລະດັບສູງສຸດ ພ້ອມທັງເປັນໂອກາດອັນດີໃນການຮ່ວມກັນວາງທິດທາງແຜນການຮ່ວມມືໃນຕໍ່ໜ້າສໍາລັບຂອບການຮ່ວມມືແມ່ນໍ້າຂອງ-ສ.ເກົາຫຼີ ເພື່ອກະຕຸກຊຸກຍູ້ການເຕີບໂຕໃຫຍ່ຂະ ຫຍາຍຕົວເສດຖະກິດໃນພາກພື້ນແມ່ນໍ້າຂອງ.

  ກອງປະຊຸມໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມລັດຖະມົນຕີຕ່າງປະເທດແມ່ນ້ຳຂອງ-ສ.ເກົາຫຼີ ຄັ້ງທີ9 ຊຶ່ງໄດ້ຈັດຂຶ້ນໃນເດືອນ ສິງຫາ 2019 ຜ່ານມາ ກອງປະຊຸມໄດ້ ທົບທວນຄືນຄວາມຄືບໜ້າຂອງການຈັດ ຕັ້ງປະຕິບັດວຽກງານຕ່າງໆພາຍໃຕ້ ຂອບການຮ່ວມມືດັ່ງກ່າວໃນໄລຍະ 1 ປີ ຜ່ານມາໂດຍສະເພາະການຈັດຕັ້ງປະຕິບັດແຜນປະຕິບັດງານ 3 ປີແມ່ນໍ້າຂອງ-ສ.ເກົາຫຼີ (2017-2020) ແລະຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ສ.ເກົາຫຼີ ຄັ້ງທີ 8, ຊຶ່ງບັນດາຜູ້ນໍາແມ່ນໍ້າຂອງ-ສ.ເກົາຫຼີ ໄດ້ສະແດງຄວາມຊົມເຊີຍຕໍ່ໝາກຜົນຂອງການຮ່ວມມືໃນໄລຍະຜ່ານມາ ແລະເຫັນວ່າຂອບການຮ່ວມມືດັ່ງກ່າວມີການຂະຫຍາຍຕົວຢ່າງຕໍ່ເນື່ອງ, ໂຄງການຕ່າງໆ ພາຍໃຕ້ກອງທຶນຮ່ວມມືແມ່ນໍ້າຂອງ- ສ.ເກົາຫຼີ ໄດ້ຮັບການຈັດຕັ້ງປະຕິບັດຢູ່ ໃນບັນດາປະເທດສະມາຊິກຢ່າງເປັນຮູບປະທໍາ ແລະໄດ້ປະກອບສ່ວນຢ່າງສໍາຄັນເຂົ້າໃນການພັດທະນາເສດຖະກິດ-ສັງຄົມ ຢູ່ໃນພາກພື້ນແມ່ນໍ້າຂອງ.

ສະໜັບສະໜຸນໂດຍ: HONDA

  ໃນນັ້ນ, ລວມມີ 3 ໂຄງການທີ່ກໍາລັງຈັດຕັ້ງປະຕິບັດຢູ່ ສປປ ລາວ ຄື: 1. ໂຄງ ການເພີ່ມຄວາມອາດສາມາດຂອງປະຊາຊົນ ແລ ະບັນດາເມືອງທຸກຍາກຂອງ ສປປ ລາວ ໃນການເຂົ້າເຖິງນິຕິກໍາຂອງຂະແໜງອຸດສາຫະກໍາ ແລະການຄ້າເພື່ອເປັນການກະກຽມໃຫ້ແກ່ການເຊື່ອມໂຍງ, ການຮ່ວມມືເສດຖະກິດ, ສະຖາບັນ ແລະ ການເປີດກວ້າງທາງດ້ານການຄ້າ; 2. ໂຄງການສ້າງແຜນແມ່ບົດ ແລະຄວາມອາດສາມາດເພື່ອພັດທະນາພື້ນຖານໂຄງລ່າງດ້ານອຸຕຸນິຍົມ ແລະອຸທົກກະສາດໃນອ່າງແມ່ນໍ້າຂອງຢູ່ ສປປ ລາວ ໃຫ້ທັນສະໄໝ ແລະ 3. ໂຄງການພັດທະນາລະບົບຕິດຕາມການຈັດຕັ້ງປະຕິບັດໂຄງການໃນຂົງເຂດພາກພື້ນແມ່ນໍ້າຂອງລວມມູນຄ່າທັງໝົດ 3 ໂຄງການ 1.263.494 ໂດລາ.

  ພ້ອມດຽວກັນນັ້ນ, ບັນດາຜູ້ນໍາປະເທດແມ່ນໍ້າຂອງຍັງໄດ້ສະແດງຄວາມຊົມເຊີຍ ແລະຂອບໃຈຕໍ່ ສ.ເກົາຫຼີ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນຂອບການຮ່ວມມືດັ່ງກ່າວໂດຍສະເພາະການເພີ່ມງົບປະມານຊ່ວຍເຫຼືອເຂົ້າໃນກອງທຶນຮ່ວມມືແມ່ນໍ້າຂອງ-ສ.ເກົາຫຼີ ຈາກ 1,12 ລ້ານໂດລາ ໃນປີ 2018 ມາເປັນ 2 ລ້ານໂດລາ ໃນປີ 2019 ແລະມີແຜນຈະເພີ່ມຂຶ້ນເປັນ 3 ລ້ານໂດລາ ໃນປີ 2020.

 ຜູ້ນໍາ ສ.ເກົາຫຼີ ກໍໄດ້ຢໍ້າຄືນເຖິງນະໂຍບາຍຫັນສູ່ທິດໃຕ້ໃໝ່ຂອງ ສ.ເກົາຫຼີ ຊຶ່ງຖືເປັນຂໍ້ລິເລີ່ມໜຶ່ງທີ່ຖືກກັບກາລະໂອກາດແຫ່ງການສົ່ງເສີມການຮ່ວມມືເພື່ອການພັດ ທະນາດ້ານເສດຖະກິດບົນຫຼັກການຕ່າງຝ່າຍຕ່າງມີຜົນປະໂຫຍດ, ກອງປະຊຸມໄດ້ຮັບຮອງເອົາເອກະ ສານສໍາຄັນຈໍານວນ 1 ສະບັບຄື: ຖະແຫຼງການແມ່ນໍ້າຂອງ-ແມ່ນໍ້າຮັນວ່າດ້ວຍການສ້າງຄູ່ຮ່ວມມືເພື່ອປະຊາຊົນ, ວັດທະນາຖາວອນ ແລະ ສັນຕິພາບຊຶ່ງປະກອບມີ 3 ເສົາຄໍ້າຄື: 1) ປະຊາຊົນໃນສັງຄົມທີ່ມີສ່ວນຮ່ວມ; 2) ຄວາມວັດທະນາຖາວອນຈາກການແບ່ງປັນປະສົບການ; 3) ສັນຕິພາບເພື່ອການພັດທະນາທີ່ຍືນຍົງ.

__________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์