ສກຈຮ ຈຳປາສັກ ຍົກລະດັບດ້ານການເງິນໃຫ້ລູກຄ້າ

  ເພື່ອໃຫ້ຄວາມຮູ້ທາງດ້ານການເງິນ ແລະວິທີການໃຊ້ຈ່າຍຢ່າງຖືກວິທີໃນການນໍາໃຊ້ແຫຼ່ງທຶນທີ່ໄດ້ມາໃຫ້ລູກຄ້າຊັ້ນດີດັ່ງນັ້ນເມື່ອວັນທີ 23 ພະຈິກ ຜ່ານມາ, ສະຖາ ບັນການເງິນຈຸລະພາກທີ່ຮັບເງິນຝາກຈໍາປາສັກ ( ສກຈຮ ) ຈຶ່ງໄດ້ເປີດໂຄງການຝຶກອົບຮົມປະຊາສຶກສາທາງດ້ານການເງິນໃຫ້ແກ່ລູກຄ້າຂອງສະຖາບັນຂຶ້ນທີ່ແຂວງອັດ ຕະປື, ໂດຍການເຂົ້າຮ່ວມເປັນປະທານຂອງທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງໆອັດຕະປື, ທ່ານ ໜູເຄືອບ ສິດທິເດດ ຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ, ພະນັກງານ, ວິຊາການ ແລະບັນດາລູກຄ້າຂອງສະຖາບັນເຂົ້າຮ່ວມຢ່າງພ້ອມພຽງ.

  ທ່ານ ໜູເຄືອບ ສິດທິເດດ ກ່າວວ່າ: ການຝຶກອົບຮົມໃນຄັ້ງນີ້ຈະໃຊ້ເວລາທັງໝົດ 2 ວັນຄື: ວັນທີ 23-24 ພະຈິກ 2019 ໂດຍແມ່ນຈະໄດ້ຝຶກອົບຮົມປະຊາສຶກສາທາງດ້ານການເງິນ, ຊຶ່ງເປັນການໃຫ້ຄວາມຮູ້ທາງດ້ານການເງິນ ແລະວິທີການຈ່າຍຢ່າງຖືກວິທີໃນການໃຊ້ແຫຼ່ງທຶນທີ່ໄດ້ມາໃຫ້ລູກຄ້າ, ເຮັດໃຫ້ສະຖາບັນການເງິນຈຸລະພາກໃນແຂວງອັດຕະປື ມີຄວາມເຂັ້ມແຂງໃນການບໍລິຫານຈັດການໃຫ້ກ້າວໄປສູ່ການລວມສູນແບບຄົບວົງຈອນ ຮັບປະກັນການບໍລິການທີ່ວ່ອງໄວ, ໂປ່ງໃສ ແລະເປັນທໍາ.

  ສໍາລັບໜ່ວຍບໍລິການສາຂາແຂວງອັດຕະປື, ໄດ້ເປີດໃຊ້ບໍລິການລູກຄ້າໃຫ້ເຂົ້າມາໃຊ້ບໍລິການກວມທັງໝົດ 5 ຕົວເມືອງ, ມີລູກຄ້າເງິນກູ້ເຄື່ອນໄຫວທັງໝົດ 2,185 ບັນຊີ, ມີຍອດເຫລືອເງິນກູ້ 31 ຕື້ກວ່າກີບ, ມີລູກຄ້າເງິນຝາກປະຈໍາທັງໝົດ 463 ບັນຊີ, ມີຍອດເຫຼືອເງິນຝາກປະຈໍາ  2 ຕື້ກວ່າກີບ ແລະມີລູກຄ້າເງິນຝາກປະຢັດທັງໝົດ 15.578 ບັນຊີ, ມີຍອດເຫຼືອເງິນຝາກປະຢັດທັງໝົດ 20 ຕື້ກວ່າກີບ.

 ໃນໂອກາດດັ່ງກ່າວທ່ານຮອງເຈົ້າ ແຂວງໆອັດຕະປືໄດ້ກ່າວຮຽກຮ້ອງໃຫ້ບັນດາລູກຄ້າຂອງສະຖາບັນການເງິນຈຸລະພາກຕ້ອງໄດ້ສຸມສະຕິປັນຍາເສີມຂະຫຍາຍຂຸດຄົ້ນທ່າແຮງຂອງຕົນພັດທະນາເສດຖະກິດຄອບຄົວ ຫຼືທຸລະກິດໃຫ້ມີການຂະຫຍາຍຕົວ, ສ້າງລາຍຮັບບົນພື້ນຖານຄວາມຖືກຕ້ອງ ແລະຍຸຕິທໍາໃຫ້ປະກົດຜົນເປັນຈິງ, ສຶບຕໍ່ຕັ້ງໜ້າຂະຫຍາຍການບໍລິການໄປສູ່ຊຸມຊົນທີ່ມີລາຍໄດ້ໜ້ອຍ, ໃຫ້ປະຊາຊົນໄດ້ເຂົ້າເຖິງການບໍລິການທາງດ້ານການເງິນຈຸລະພາກດ້ວຍຄວາມໂປ່ງໃສ, ວ່ອງໄວ ແລະເປັນທໍາຫຼາຍຂຶ້ນ.

__________

ຂຽນໂດຍ: ໂພທິຣາຊ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์