ຄະນະອຸປະຖຳວັດສາມັກຄີໄຊ ຕິດຕາມການສ້າງວິຫານວັດບ້ານບໍ່ເຕນ

  ວັນທີ 20 ພະຈິກ 2019 ຄະນະອຸປະຖໍາວັດສາມັກຄີໄຊ ແຂວງຫຼວງນໍ້າທາ ໄດ້ລົງຕິດຕາມການກໍ່ສ້າງວິຫານວັດບ້ານບໍ່ເຕນເມືອງຫຼວງນໍ້າທາ, ນໍາພາໂດຍ ທ່ານ ທອງແດງ ສິດທິສົນ ສະມາຊິກສະພາປະຊາຊົນແຂວງ, ມີອະດີດການນຳແຂວງ, ນັກປະຕິວັດອາວຸໂສບໍານານ, ເຖົ້າແກ່ແນວໂຮມ, ນາຍບ້ານ ແລະຄະນະຮັບຜິດຊອບການກໍ່ສ້າງວິຫານວັດບ້ານບໍ່ເຕນ.

  ທ່ານ ໄມ່ກົມແສງ ແກ້ວແກ່ນຈັນ ນາຍບ້ານໆບໍ່ເຕນໃຫ້ຮູ້ວ່າ: ສໍາລັບການກໍ່ສ້າງອາຄານວິຫານວັດ ບ້ານບໍ່ເຕນເມືອງຫຼວງນໍ້າທາໄດ້ ເລີ່ມກໍ່ສ້າງມາແຕ່ວັນທີ 1 ເດືອນ ກຸມພາ 2015, ເປັນອາຄານຖາວອນ, ສ້າງດ້ວຍຊີມັງເສີມເຫຼັກກວ້າງ 12 ແມັດ, ຍາວ 20 ແມັດ, ສູງ 14 ແມັດ, ຫຼັງຄາເຫຼັກມຸງດ້ວຍຊີແພກຄິດເປັນມູນຄ່າການກໍ່ສ້າງ ທັງໝົດ 1 ຕື້ 500 ລ້ານກີບ, ມາຮອດປະຈຸບັນການກໍ່ສ້າງໄດ້ສໍາເລັດໄປແລ້ວ 95%.

ສະໜັບສະໜຸນໂດຍ: HONDA

  ພຸດທະສາສະໜາມີບົດບາດສໍາຄັນ ແລະຕິດພັນກັບວິຖີຊີວິດຂອງປະຊາຊົນລາວ, ເວົ້າລວມ, ເວົ້າສະເພາະກໍ່ຄືປະຊາຊົນບ້ານບໍ່ເຕນຊຶ່ງບໍ່ສາມາດຕັດແຍກອອກຈາກກັນໄດ້ເພາະວ່າວັດເປັນສູນລວມທາງດ້ານຈິດໃຈ,ເປັນທັງສີລະປະວັດທະນະທຳ ແລະຮີດຄອງປະເພນີອັນດີງາມຂອງເຜົ່າ,ຂອງຊາດທີ່ໄດ້ສືບທອດກັນມາແຕ່ບູຮານນະການ, ເປັນບ່ອນທຳບຸນ, ທຳພິທີກຳຂອງ ພະສົງ ແລະ ທັງເປັນບ່ອນພັກອາໄສ, ສະຖານທີ່ປະຊຸມ ແລະ ບ່ອນຮັບຕ້ອນແຂກບ້ານແຂກເມືອງທີ່ມາຢ້ຽມຢາມ, ເປັນການຕອບສະໜອງໃຫ້ອອກຕົນຍາດໂຍມຜູ້ທີ່ມີໃຈສັດທາໃນການທຳບຸນກຸສົນ.

  ຈາກນັ້ນທ່ານ ທອງແດງ ສິດທິສົນ ສະມາຊິກສະພາປະຊາຊົນແຂວງຍັງໄດ້ນໍາພາອະດີດການນໍາແຂວງ, ນັກຮົບປະຕິວັດອາວຸໂສເຖົ້າແກ່ແນວໂຮມທ່ຽວຊົມການພັດ ທະນາ ແລະການກໍ່ສ້າງພື້ນຖານໂຄງລ່າງໂດຍສະເພາະແມ່ນການກໍ່ສ້າງເສັ້ນທາງລົດໄຟລາວ-ຈີນ, ບໍ່ເກືອ ແລະໂຄງການທົດລອງສ້າງບ້ານຊົນເຜົ່າເພື່ອການພັດທະນາແຫຼ່ງທ່ອງທ່ຽວໃນຕໍ່ໜ້າຕື່ມອີກ.

__________

ຂຽນໂດຍ: ມຸນຕີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์