ສະຫວັນເຜີຍແຜ່ນິຕິກຳກໍ່ສ້າງຮາກຖານການເມືອງ

  ກອງປະຊຸມເຜີຍແຜ່ນິຕິກຳກ່ຽວກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ ແລະວຽກງານ 3 ສ້າງຂອງແຂວງສະຫວັນນະເຂດໄດ້ຈັດຂຶ້ນຫວ່າງບໍ່ດົນຜ່ານມານີ້, ທີ່ຫ້ອງວ່າການປົກຄອງແຂວງໂດຍເປັນປະທານຂອງສະຫາຍ ສັນຕິ ພາບ ພົມວິຫານ ເລຂາພັກແຂວງເຈົ້າແຂວງສະຫວັນນະເຂດ, ມີຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ເລຂາພັກນະຄອນ-ເມືອງ, ເຈົ້າເມືອງ, ຄະນະພັກຮາກຖານ ແລະ ພາກສ່ວນກ່ຽວ ຂ້ອງເຂົ້າຮ່ວມ.

ສະໜັບສະໜຸນໂດຍ: HONDA

ໃນກອງປະຊຸມໄດ້ຜ່ານຫຼາຍເອກະສານສຳຄັນຄື: ມະຕິຂອງຄະນະປະຈຳພັກແຂວງສະບັບ ເລກທີ 1304/ຄປພຂ, ລົງວັນທີ 11 ກັນຍາ 2019 ວ່າດ້ວຍການແຕ່ງ ຕັ້ງຄະນະຮັບຜິດຊອບຊີ້ນຳໆພາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ ແລະວຽກງານ 3 ສ້າງ, ຜ່ານແຜນດຳເນີນງານຂອງຄະນະຮັບຜິດຊອບຊີ້ນຳໆພາການຈັດຕັ້ງປະຕິບັດວຽກງານດັ່ງກ່າວ, ເຜີຍແຜ່ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 1862/ຫສນຍ, ລົງວັນທີ 18 ຕຸລາ 2019 ເລື່ອງ ການສືບຕໍ່ຊີ້ນຳຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະຜັນຂະຫຍາຍວຽກງານ 3 ສ້າງເຂົ້າສູ່ລວງເລິກໃນຂອບເຂດທົ່ວປະເທດ.

ພ້ອມນີ້, ສະຫາຍເລຂາພັກແຂວງຍັງໄດ້ຊີ້ນຳ ແລະ ໃຫ້ກຽດເຜີຍແຜ່ເຊື່ອມຊຶມຄຳສັ່ງຂອງ ທ່ານເຈົ້າແຂວງສະຫວັນນະເຂດ ສະບັບເລກທີ 1710/ຈຂ.ສຂ, ລົງວັນທີ 8 ຕຸລາ 2019 ວ່າດ້ວຍການເພີ່ມທະວີໃນການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດແກ້ໄຂຄວາມທຸກຍາກ ແລະວຽກ ງານ 3 ສ້າງຂອງແຂວງ,ຈາກນັ້ນບັນດາສະຫາຍທີ່ເຂົ້າຮ່ວມໃນພິທີໄດ້ມີການປະກອບຄຳຄິດເຫັນຕໍ່ກັບວຽກງານດັ່ງກ່າວຕື່ມອີກເພື່ອເຮັດໃຫ້ການຈັດຕັ້ງປະຕິບັດວຽກ ງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງຂອງແຂວງ ມີປະສິດທິພາບ ແລະ ປະສິດທິຜົນດີຍິ່ງໆຂຶ້ນໄປອີກ.

----------------

ໜັງສືພີມເສດຖະກິດ-ສັງຄົມ

แชร์