ຖີບລົດ ເພື່ອຫຼຸດຜ່ອນມົນລະພິດ ແລະສົ່ງເສີມການທ່ອງທ່ຽວຫຼວງພະບາງ

  ທ່າມກາງບັນຍາກາດຕ້ອນຮັບລະດູໜາວ, ລະດູການແຫ່ງການທ່ອງທ່ຽວລາວ-ຈີນ 2019 ຫຼວງພະບາງໄດ້ຈັດກິດຈະກຳສົ່ງເສີມການຖີບລົດເພື່ອຫຼຸດຜ່ອນມົນລະພິດທາງດ້ານສິ່ງແວດລ້ອມແລະຂັບຂີ່ປອດໄພເພື່ອສົ່ງເສີມການທ່ອງທ່ຽວໄດ້ຈັດຂຶ້ນໃນວັນທີ 23 ພະຈິກ 2019 ທີ່ໜ້າເດີ່ນໂຮງແຊກສີ່ແຍກຕະຫຼາດມືດຕົວເມືອງນະ ຄອນຫຼວງພະບາງ ໂດຍໃຫ້ກຽດເປັນປະທານເປີດງານໂດຍ ທ່ານ ສຸກັນ ບຸນຍົງ ຮອງເຈົ້າແຂວງຫຼວງພະບາງ ພ້ອມດ້ວຍບັນດາການນຳຂອງແຂວງ, ຜູ້ປະກອບການທຸລະກິດການທ່ອງທ່ຽວແຂກພາຍໃນ ແລະຕ່າງປະເທດໃຫ້ກຽດເຂົ້າຮ່ວມເປັນຈຳນວນຫຼວງຫຼາຍ.

 ທ່ານ ສຸກັນ ບຸນຍົງ ກ່າວວ່າ: ກິດຈະກຳສົ່ງເສີມການຖີບລົດເພື່ອຫຼຸດຜ່ອນມົນລະພິດທາງດ້ານສິ່ງແວດລ້ອມ ແລະຂັບຂີ່ປອດໄພເພື່ອສົ່ງເສີມການທ່ອງທ່ຽວແມ່ນໄດ້ຈັດຂຶ້ນເປັນຄັ້ງທີ 2 ທີ່ແຂວງຫຼວງພະບາງ, ຮູບແບບການທ່ອງທ່ຽວຖີບລົດຊົມຕົວເມືອງໃນຄັ້ງນີ້ແມ່ນຈະໄດ້ຮັບຟັງປະຫວັດຄວາມເປັນມາຂອງບັນດາສະຖານທີ່ທ່ອງ ທ່ຽວ ໂດຍການແວະຊົມຈຸດສຳຄັນຕ່າງໆ ຕະຫຼອດໄລຍະເສັ້ນທາງຖີບລົດ 7 ກິໂລແມັດອ້ອມຕົວເມືອງ ເຊັ່ນ: ປະຫວັດຂອງສະເດັດເຈົ້າ ສຸພານຸວົງ, ປູ່ເຍີຍ່າເຍີ ແລະ ຕຳນານພະຍານານ 15 ຕະກຸນຂອງນະຄອນຫຼວງພະບາງ ຊຶງລ້ວນແລ້ວແຕ່ມີຄວາມສຳຄັນ ແລະກ່ຽວຂ້ອງກັບຮີດຄອງປະເພນີອັນດີງາມຂອງຊາວນະຄອນຫຼວງພະບາງ.

ສະໜັບສະໜຸນໂດຍ: HONDA-------------

 

 ໃນກິດຈະກຳຄັ້ງນີ້ທ່ານ ທະວີເພັດ ອຸລາ ຮອງຫົວໜ້າກົມພັດທະນາທ່ອງທ່ຽວໄດ້ມອບເງິນລາຍໄດ້ຈາກການລົງທະບຽນຄັ້ງນີ້ຈຳນວນ 14 ລ້ານກວ່າກີບ, ທ່ານ ປອ ຊູວິດ ມິຊອບ ຮອງຜູ້ອໍານວຍການອົງການບໍລິຫານການພັດທະນາພື້ນທີ່ພິເສດເພື່ອການທ່ອງທ່ຽວແບບຍືນຍົງແຫ່ງປະເທດໄທມອບເງິນສົດ 12.889 ບາດ ແລະ 105.000 ກີບ, ຕ່າງໜ້າໃຫ້ສະມາຊີກເຄືອຂ່າຍ 4 ຫຼ່ຽມວັດທະນະທຳລ້ານຊ້າງ (ຝ່າຍໄທ) ຂຶ້ນມອບຢາ ແລະອຸປະກອນການແພດ, ຈຳນວນເງິນ ແລະ ອຸປະກອນການແພດດັ່ງກ່າວແມ່ນມອບໃຫ້ແກ່ໜ່ວຍກູ້ໄພອົງການກາແດງລາວເພື່ອນໍາໃຊ້ເຂົ້າໃນການຊ່ວຍເຫຼືອຜູ້ປະສົບໄພ ແລະ ນັກທ່ອງທ່ຽວຢູ່ໃນແຂວງຫຼວງພະບາງ, ໂດຍທ່ານ ຄຳສິງ ມິ່ງບຸນຕາ ຮອງຫົວໜ້າອົງການກາແດງລາວ ແຂວງຫຼວງພະບາງ ເປັນຜູ້ຂຶ້ນຮັບ.

__________

ຂຽນໂດຍ: ສອນມະນີ ໄຊສະຫວັດ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

 

แชร์