ມສ ກ້ອນຕື່ນ ປາຖະກະຖາວັນສາກົນລຶບລ້າງ ການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ

 ວັນ 22 ພະຈິກຜ່ານມາ ທີ່ໂຮງຮຽນ ມສ ກ້ອນຕື່ນ ເມືອງ ປາກທາ ແຂວງບໍ່ແກ້ວໄດ້ຈັດພິທີລະນຶກວັນສາກົນລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ 25 ພະຈິກຂຶ້ນໂດຍເປັນກຽດເຂົ້າຮ່ວມຂອງທ່ານ ສາລີ ວັນນະສານ ຮອງເຈົ້າເມືອງ ປາກທາ ມີບັນດາເລຂາຄະນະພັກຮາກຖານ,ອຳນາດການປົກຄອງບ້ານ, ອົງການແພນສາກົນປະຈຳ ເມືອງປາກທາ, ແຂກເຊີນຂັ້ນ ເມືອງ, ຕະຫຼອດຮອດຄູ-ອາຈານ ແລະນ້ອງນ້ອຍນັກຮຽນເຂົ້າຮ່ວມ.

ທ່ານ ສາລີ ວັນນະສານ ໄດ້ໃຫ້ກຽດປາຖະກະຖາລະນຶກວັນສາກົນລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍຊຶ່ງໄດ້ຍົກໃຫ້ເຫັນຄວາມຮຸນແຮງໃນຄອບຄົວ,ຄວາມຮຸນແຮງທາງດ້ານຮ່າງກາຍຕໍ່ແມ່ຍິງ,ມີຫຼາຍຮູບການເປັນຕົ້ນການທຸບຕີ,ການກັກຂັງການທໍລະມານໃນຮູບການຕ່າງໆ ຄວາມຮຸນແຮງທາງດ້ານຈິດໃຈຄວາມຮູ້ສຶກ,ການດູໝິ່ນກຽດສັກສີ,ການປ້ອຍດ່າການເມີນເສີຍການປ່ອຍປະລະເລີຍການນອກໃຈ,ການຂົ່ມຂືນກະທຳຊຳເລົາ,ການລວງລະເມີດທາງເພດການເອົາລັດເອົາປຽບ,ການກົດຂ່ີຂູດຮີດທາງເສດຖະການປະຕິເສດບໍ່ໃຫ້ແມ່ຍິງມີສ່ວມຮ່ວມໃຫ້ໃນການຄຸ້ມຄອງການເງິນຂອງຄອບຄົວບໍ່ໃຫ້ອະນຸຍາດໃຫ້ແມ່ຍິງໄປເຮັດວຽກເອົາເງິນຂອງແມ່ຍິງໄປ ໃຊ້ຈ່າຍເພື່ອຜົນປະໂຫຍດສ່ວນຕົວ.

ທ່ານ ສາລີ ວັນນະສານ ຍັງຮຽກຮ້ອງມາຍັງຂະແໜງການ ແລະພາກສ່ວນທີ່ກ່ຽວຂ້ອງພາກລັດ,ພາກເອກະຊົນພ້ອມດ້ວຍປະຊາຊົນຈົ່ງພ້ອມກັນເອົາໃຈໃສ່ໃຫ້ ຄວາມສຳຄັນໃນການຕ້ານສະກັດກັ້ນການທຳຄວາມຮຸນແຮງຕໍ່ແມ່ຍິງ ແລະເດັກນ້ອຍທຸກຮູບແບບ ແລະບໍ່ໃຫ້ອະໄພຕໍ່ການໃຊ້ຄວາມຮຸນແຮງຕໍ່ແມ່ຍິງຕ້ອງເປັນເອກະພາບກັນວ່າຄວາມຮຸນແຮງຕໍ່ແມ່ຍິງເປັນສິ່ງທີ່ສຳຄັນຮັບບໍ່ໄດ້ພ້ອມກັນເອົາໃຈໃສ່ຊ່ວຍເຫຼື່ອຜູ້ເຄາະຮ້າຍຈາກການໃຊ້ຄວາມຮຸນແຮງ,ຈາກການຄ້າມະນຸດໃຫ້ການປຶກສາທາງດ້ານຈິດໃຈສຸຂະພາບທາງດ້ານທີ່ພັກເຊົາທີ່ປອດໄພລວມເຖິງການສ້າງເງື່ອນໄຂໃຫ້ແມ່ຍິງເຂົ້າເຖິງການສຶກສາ,ການຝຶກອົບຮົມດ້ານເຕັກນິກວິຊາຊີບວິຊາການຕ່າງໆ,ມີວຽກເຮັດງານທຳທີ່ດີ,ໄດ້ເຂົ້າເຖິງການທຳມາຫາກິນເປັນຕົ້ນແຫຼ່ງທຶນເພື່ອດຳເນີນການບໍລິການ,ການຜະລິດເປັນສິນຄ້າສ້າງລາຍຮັບໃຫ້ຕົນເອງເພື່ອສ້າງຄວາມເຂັ້ມແຂງໃຫ້ແກ່ແມ່ຍິງ, ຄອບຄົວ, ຍົກສູງຊີວິດຄຸນນະພາບຊີວິດການເປັນຢູ່ໃຫ້ດີຂຶ້ນ ແລະຫຼຸດພົ້ນອອກຈາກທຸກຍາກເທື່ອລະກ້າວ.

ພິທີດັ່ງກ່າວຍັງມີການຖາມ-ຕອບວິທະຍາສາດຄວາມຮູ້ພື້ນຖານກ່ຽວກັບການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ,ຮັບຊົມການສະແດງລະຄອນອານາຊັບຮັບຊົມການສະແດງສິລະປະ-ວັນນະຄະດີ ແລະກິດຈະກຳອື່ນໆ ພ້ອມທັງແຈກເຂົ້າໜົມ, ໃຫ້ກັບນ້ອງນ້ອຍນັກຮຽນອີກຕື່ມ.

--------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 27/11/2019