ຟາມພູຕາເວັນ ກຽມເປີດລະດູການທ່ອງທ່ຽວ 2020

  ແຫຼ່ງທ່ອງທ່ຽວຟາມພູຕາເວັນ ເປັນສະຖານທີ່ທ່ອງທ່ຽວທາງດ້ານກະສິກຳທີ່ມີຄວາມຫຼາກຫຼາຍທາງດ້ານພືດຜັກ, ສັດລ້ຽງ ແລະອື່ນໆທີ່ເປີດໃຫ້ນັກທ່ອງທ່ຽວໄດ້ເຂົ້າທ່ຽວຊົມປະຈຸບັນເຈົ້າຂອງຟາມພູຕາເວັນກຳລັງກະກຽມເປີດງານເທສະການທ່ອງທ່ຽວປະຈຳປີ 2020 ໂດຍຈະມີຫຼາຍກິດຈະກຳເປັນຕົ້ນການສະແດງສິລະປະ, ງານຄອນເສີດ, ທ່ຽວຊົມສິນຄ້າຂອງປະຊາຊົນ, ຊົມສວນກະສິກຳ ແລະອື່ນໆ ຂະນະນີ້ການກະກຽມປະດັບປະດາແມ່ນສຳເລັດແລ້ວກວ່າ 80% ແລະຈະເປີດງານຢ່າງເປັນທາງການໃນວັນທີ 13 ທັນວາ 2019.

 ທ່ານ ນາງ ດາລຸນ ນີດວງປະເສີດ ເຈົ້າຂອງຟາມພູຕາເວັນໃຫ້ສຳພາດວ່າ: ຟາມພູຕາເວັນເປັນແຫຼ່ງທ່ອງທ່ຽວກະສິກຳເປັນໂຄງການທີ່ສ້າງຂຶ້ນບົນພື້ນຖານຄວາມຮຽກ ຮ້ອງຕ້ອງການຂອງຊາວກະສິກອນ ແລະຜູ້ບໍລິໂພກທີ່ຕ້ອງການພືດຜັກຊະນິດຕ່າງໆທີ່ມີຄຸນນະພາບສະອາດ,ປອດສານພິດປະກອບມີຟາມສັດລ້ຽງ, ພືດໄມ້ປະດັບ, ພືດຜັກກິນໃບ, ສວນໝາກນາວ, ດອກຕາເວັນ, ໝາກເລັ່ນ ແລະອື່ນໆ ໂດຍຈະເນັ້ນໃສ່ການປະຕິບັດວຽກງານກະເສດການສົ່ງເສີມການຜະລິດສົ່ງເສີມການຄົ້ນຄວ້າວັດຖຸດິບຈົນມາເປັນຜະລິດຕະພັນສຳເລັດຮູບ.

ສະໜັບສະໜຸນໂດຍ: HONDA

  ທ່ານ ນາງ ດາລຸນນີ ດວງປະເສີດ ກ່າວວ່າ: ສຳລັບງານເທສະການການທ່ອງທ່ຽວຟາມພູຕາເວັນໃນປີ 2020 ແມ່ນກະກຽມມາຫຼາຍເດືອນເນື່ອງຈາກການຈັດປີຜ່ານມາສຳເລັດກໍໄດ້ເກີດມີ ພາຍຸເຮັດໃຫ້ຟາມໄດ້ຮັບຜົນເສຍຫາຍ, ເຮັດໃຫ້ໄດ້ມີການຈັດສວນໃໝ່ທີ່ມີລັກ ສະນະແຕກຕ່າງຈາກປີຜ່ານມາ, ປີນີ້ຈະເນັ້ນເລື່ອງການເຮັດກະເສດເປັນຫຼັກໂດຍສະເພາະການປູກຝັງ, ການປູກເຂົ້າ, ດອກໄມ້ຫຼາກຫຼາຍຊະນິດ, ພືດໄລຍະສັ້ນ ແລະໄລຍະຍາວ, ນອກນັ້ນຍັງມີສິນຄ້າຫັດຖະກຳ, ສິນຄ້າກະເສດຂອງຊຸມຊົນຊາວບ້ານ, ອາຫານຕ່າງໆຂອງປະຊາຊົນເຂົ້າຮ່ວມບໍລິການນັກທ່ອງທ່ຽວ, ໂດຍການກະກຽມງານມາຮອດປະຈຸບັນໄດ້ກວ່າ 80% ຄາດວ່າປີນີ້ນັກທ່ອງທ່ຽວຈະເຂົ້າມາທ່ອງທ່ຽວເພີ່ມຂຶ້ນຈາກປີຜ່ານມາສ່ວນລາຄາແມ່ນ 15 ພັນກີບ ຕໍ່ຄົນ.

  ນອກນັ້ນຍັງຈະມີກິດຈະກຳຕ່າງໆ ໃນປີ 2020 ພາຍຫຼັງທີ່ເປີດງານເທສະການທ່ອງທ່ຽວເປັນທາງການແລ້ວຈະມີກິດຈະກຳເຄົ້າດາວສົ່ງທ້າຍປີເກົ່າຕ້ອນຮັບປີໃໝ່, ງານບຸນກອງເຂົ້າ ແລະ ງານປະກວດຮຸ່ນເຟືອງໃນຊ່ວງເດືອນມັງກອນ, ງານປະກວດຄົມໄຟເດືອນມີນາ, ການປະກວດບຸນບັ້ງໄຟໃນເດືອນພຶດສະພາແລະການປະກວດແຕ້ມຮູບໃນເດືອນມິຖຸນາ, ຟາມພູຕາເວັນຕັ້ງຢູ່ເຂດບ້ານທ່ານາໄຊ ເມືອງທ່າພະບາດ ແຂວງບໍລິຄຳໄຊ.

__________

ຂຽນໂດຍ: ສະເຫຼີມໄຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์