ຜົນກອງປະຊຸມໃຫ່ຍຜູ້ແທນອົງຄະນະພັກເມືອງເມືອງວຽງພູຄາ

  ກອງປະຊຸມໃຫຍ່ຜູ້ແທນອົງຄະນະພັກເມືອງວຽງພູຄາ ຄັ້ງທີ IX ໄດ້ດຳເນີນມາເປັນເວລາ 2 ວັນ, ແຕ່ວັນທີ 20-21 ພະຈິກ 2019  ຢູ່ທີ່ສະໂມສອນຂອງເມືອງ, ມີຜູ້ແທນສົມບູນເຂົ້າຮ່ວມ 132 ສະຫາຍ, ຍິງ 09 ສະຫາຍທີ່ເປັນຕົວແທ່ນໃຫ້ແກ່ສະມາຊິກພັກ 1.254 ສະຫາຍໃນທົ່ວເມືອງ ແລະ ມີແຂກຖືກເຊີນເຂົ້າຮ່ວມ 47 ສະຫາຍ.

ກອງປະຊຸມໃຫຍ່ຄັ້ງນີ້ໄດ້ຕີລາຄາສູງ ແລະ ໄດ້ເປັນເອກະພາບຮັບຮອງເອົາບົດລາຍງານການເມືອງຂອງຄະນະບໍລິຫານງານພັກເມືອງສະໄໝທີ VIII ທີ່ສະເໜີຕໍ່ກອງປະຊຸມໃຫຍ່ຄັ້ງທີ IX ໂດຍໄດ້ ສະແດງຄວາມເຫັນດີເຫັນພ້ອມນຳການສະຫຼຸບຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງວຽງພູຄາບັນດາຜົນງານອັນພົ້ນເດັ່ນທີ່ຍາດມາໄດ້ໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາ ເສດຖະກິດ-ສັງຄົມ, ວຽກງານກໍ່ສ້າງພັກ-ພະນັກງານ ແລະ ການປັບປຸງກົງຈັກໃນລະບົບການເມືອງ, ຂົງເຂດນິຕິບັນຍັດ, ຕຸລາການ ແລະ ຍຸຕິທຳ, ວຽກງານພົວພັນຮ່ວມມືກັບຕ່າງປະເທດ, ບັນດາຜົນສຳເລັດໃນ 5 ປີຜ່ານມາໄດ້ສ້າງພື້ນຖານສຳຄັນເຮັດໃຫ້ເມືອງວຽງພູຄາມີຄວາມໜັກແໜ້ນທາງດ້ານ ການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ; ກອງປະຊຸມໄດ້ຮັບຟັງລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຜ່ານມາ (2014-2019) ແລະ ໄດ້ເຫັນດີເປັນເອກະພາບ, ຢັ້ງຢືນເສດຖະກິດ-ສັງຄົມຂອງເມືອງວຽງພູຄາໄດ້ມີການພັດທະນາດີຂຶ້ນ, ເຮັດໃຫ້ເສດຖະກິດຂະຫຍາຍຕົວຕໍ່ເນື່ອງ, ການຜະລິດເປັນສິນຄ້າໄດ້ຮັບການຊຸກຍູ້ສົ່ງເສີມ, ພື້ນຖານໂຄງລ່າງໄດ້ຮັບການປັບປຸງ ແລະ ກໍ່ສ້າງ, ຕາໜ່າງການສຶກສາ ແລະ ສາທາລະນະສຸກໄດ້ຮັບການຂະຫຍາຍໄປສູ່ເຂດຊົນນະບົດຫ່າງໄກສອກຫຼີກ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການພັດທະນາດີຂຶ້ນ.

ສະໜັບສະໜຸນໂດຍ: HONDA

  ກອງປະຊຸມໄດ້ເປັນເອກະພາບຮັບຮອງເອົາບັນດາຄາດໝາຍສູ້ຊົນໃນ 5 ປີຕໍ່ໜ້າເພື່ອນຳພາເມືອງວຽງພູຄາໃຫ້ຫຼຸດຜົນອອກຈາກຄວາມທຸກຍາກ ແລະຮອດປີ 2024 ຈະປະກາດເປັນເມືອງພັດທະນາສູ້ຊົນເຮັດໃຫ້ເສດຖະກິດຂະຫຍາຍຕົວຕໍ່ເນື່ອງ ແລະຖືກທິດໃນລະດັບສະເລ່ຍ 7% ຕໍ່ປີຮອດປີ 2024 ລວມຍອດຜະລິດຕະພັນພາຍ ໃນໃຫ້ບັນລຸໄດ້ 383,15 ຕື້ກີບ, ສະເລ່ຍລາຍຮັບຕໍ່ຫົວຄົນໃຫ້ໄດ້ 1.592 ໂດລາສະຫະລັດ ຫຼື ເທົ່າກັບ 13,37 ລ້ານກີບ, ເກັບລາຍຮັບເຂົ້າງົບປະມານໃຫ້ໄດ້ຕາມຄາດໝາຍ, ປະຕິບັດລາຍຈ່າຍໃຫ້ຖືກຕ້ອງຕາມລະບຽບການ ແລະ ກົດໝາຍ; ຊຸກຍູ້ສົ່ງເສີມນັກລົງທຶນເອກະຊົນພາຍໃນ ແລະຕ່າງປະເທດມາລົງທຶນຢູ່ພາຍໃນເມືອງໃຫ້ຫຼາຍຂຶ້ນ, ສົ່ງເສີມການຜະລິດເປັນສິນຄ້າໃຫ້ກວ້າງຂວາງ, ສ້າງສິນຄ້າໜຶ່ງເມືອງໜຶ່ງຜະລິດຕະພັນໃຫ້ໄດ້ 2 ລາຍການ, ສືບຕໍ່ແກ້ໄຂຄວາມທຸກຍາກ, ຈຳນວນຄອບ ຄົວທຸກຍາກໃຫ້ຫຼຸດລົງຍັງເຫຼືອບໍ່ເກີນ 20% ຂອງຈຳນວນຄອບຄົວໃນທົ່ວເມືອງ,ເອົາໃຈໃສ່ກໍ່ສ້າງ ແລະຂະຫຍາຍພັກ,ສູ້ຊົນສ້າງໜ່ວຍພັກປອດໃສເຂັ້ມແຂງໜັກແໜ້ນໃຫ້ໄດ້ 85% ຂຶ້ນໄປ ແລະ ຮັບຮອງເອົາບົດສຳຫຼວດການນຳພາລວມຂອງຄະນະບໍລິຫານງານພັກເມືອງສະໄໝທີ VIII.

  ກອງປະຊຸມຍັງໄດ້ປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ຄັ້ງທີ IX ຊຶ່ງມີຜູ້ສະໝັກເລືອກຕັ້ງ 25 ສະຫາຍ, ຍິງ 04 ສະຫາຍ, ເລືອກເອົາ 21 ສະຫາຍ,ກອງປະຊຸມໄດ້ເປັນເອກະພາບເລືອກຕັ້ງສະຫາຍຕຽງສະໜອນພອນປະເສີດເປັນເລຂາພັກເມືອງ, ເລືອກຕັ້ງສະຫາຍ ບູນຊົງ ວາໄຊຍີ ແລະສະຫາຍ ນາງ ຈັນຄຳ ທອງມີໄຊ ເປັນຮອງເລຂາພັກເມືອງ ແລະ ໄດ້ເລືອກເອົາສະຫາຍປະທານ, ຮອງປະທານກວດກາພັກປະກອບມີ 3 ສະຫາຍ, ໂດຍ ແມ່ນສະຫາຍ ບູນຊົງ ວາໄຊຍີ ເປັນປະທານ; ກອງປະຊຸມຍັງໄດ້ປ່ອນບັດຄັດເລືອກເອົາຜູ້ແທນສົມບູນເຂົ້າຮ່ວມກອງປະຊຸມໃຫຍ່ຂອງອົງຄະນະພັກແຂວງສະໄໝທີ VIII ຈໍານວນ 24 ສະຫາຍ, ສະ ຫາຍ ເພັດຖາວອນ ພິລະວັນ ກໍາມະການສູນກາງພັກເລຂາພັກແຂວງເຈົ້າ ແຂວງໆຫຼວງນ້ຳທາ ໄດ້ຍ້ອງຍໍຊົມເຊີຍມາຍັງພະນັກງານ-ສະມາຊິກພັກ, ທະຫານ, ຕໍາຫຼວດ, ຜູ້ປະກອບການຜະລິດ-ທຸລະກິດ, ບໍລິການ ແລະພໍ່ແມ່ປະຊາຊົນທຸກຊັ້ນຄົນໃນເມືອງວຽງພູຄາ ທີ່ໄດ້ສາມັກຄີເປັນຈິດໜຶ່ງໃຈດຽວກັນເສີມຂະຫຍາຍມູນເຊື້ອອາດ ຫານ, ນໍ້າໃຈຮັກຊາດ, ຮັກບ້ານເກີດເມືອງນອນ, ປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດ,ເວົ້າລວມເວົ້າສະເພາະແມ່ນຢູ່ເມືອງວຽງພູຄາຕາມຈິດໃຈມະຕິກອງປະຊຸມຄັ້ງທີ VIII ຕະຫຼອດໄລຍະ 5 ປີທີ່ຜ່ານມາ ແລະຮຽກຮ້ອງມາຍັງຄະນະພັກ, ສະມາຊິກພັກທຸກສະຫາຍຈົ່ງເຊີດຊູຄວາມເປັນແບບຢ່າງນໍາໜ້າທີ່ດີໃນທຸກດ້ານ,  ພ້ອມກັນນີ້ຮຽກຮ້ອງມາຍັງ ພະນັກງານ, ສະມາຊິກພັກ, ທະຫານ, ຕຳຫຼວດ, ປະຊາຊົນບັນດາເຜົ່າ ແລະ ທຸກຊັ້ນຄົນທີ່ດຳລົງຊີວິດ ແລະທຳມາຫາກິນຢູ່ເມືອງວຽງພູຄາຈົ່ງພ້ອມກັນສືບຕໍ່ຂະຫຍາຍມູນເຊື້ອຄວາມສາມັກຄີເປັນປຶກແຜ່ນແໜ້ນໜາ, ເຊີດຊູຈິດໃຈຮັກຊາດ,ຮັກລະບອບປະຊາທິປະໄຕປະຊາຊົນ, ຕັດສິນໃຈຜ່ານຜ່າຂໍ້ຫຍຸ້ງຍາກ ແລະນຳໃຊ້ທຸກທາແຮງບົ່ມຊ້ອນຢ່າງມີປະສິດທິຜົນເພື່ອພ້ອມກັນພັດທະນາເມືອງວຽງພູຄາໃຫ້ຈະເລີນຮຸ່ງເຮືອງຂຶ້ນເລື້ອຍໆ.

 __________

ຂຽນໂດຍ: ກິ່ນນາລົມ ແອ່ນຖ່າຍໄທ   
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

 

แชร์