ເມືອງຮ້ຽມ ເປີດສູນການສຶກສານອກໂຮງຮຽນ

  ເມື່ອບໍ່ດົນມານີ້ທີ່ສະໂມສອນຂອງເມືອງຮ້ຽມ ແຂວງຫົວພັນ ໄດ້ຈັດພິທີເປີດສູນການສຶກສານອກໂຮງຮຽນຂັ້ນເມືອງ (ສນມ) ຢ່າງເປັນທາງການ, ພາຍໃຕ້ການເປັນປະທານຂອງທ່ານ ອານຸເດດ ສີຄຳໄຊ ເຈົ້າເມືອງຮ້ຽມ, ມີບັນດາທ່ານແຂກທີ່ຖືກເຊີນ, ອໍານວຍການໂຮງຮຽນມໍຕົ້ນ ແລະມໍປາຍທົ່ວເມືອງ, ມີຄູ-ອາຈານ ແລະນັກຮຽນ ສນມເຂົ້າຮ່ວມ.

  ໂດຍປະຕິບັດຕາມຄໍາສັ່ງແນະນໍາຂອງພະແນກສຶກສາທິການ ແລະກີລາແຂວງຫົວພັນສະບັບເລກທີ 53/ສກຂ ວັນທີ 18 ກຸມພາ 2015 ວ່າດ້ວຍການສ້າງຕັ້ງສູນການສຶກສານອກໂຮງຮຽນຂັ້ນເມືອງ ແລະສູນການຮຽນຮູ້ຂອງຊຸມຊົນ ແລະອີງໃສ່ຂໍ້ຕົກລົງຂອງພະແນກ ສກຂ ວ່າດ້ວຍການອະນຸມັດສ້າງຕັ້ງສູນການສຶກສານອກໂຮງ ຮຽນຂອງເມືອງຮ້ຽມສະບັບເລກທີ 659/ສກຂ ຫົວພັນ, ລົງວັນທີ 8 ຕຸລາ 2019, ຈຸດປະສົງການສ້າງຕັ້ງສູນໃນຄັ້ງນີ້ເພື່ອເປີດໂອກາດໃຫ້ພະນັກງານລັດຖະກອນ ,ທະຫານ, ຕໍາຫຼວດ, ພໍ່ຄ້າຊາວຂາຍ ແລະປະຊາຊົນທຸກເພດເຜົ່າໃນເກນອາຍຸ 15–35 ປີທີ່ພາດໂອກາດ ແລະຮຽນບໍ່ທັນຈົບຊັ້ນມັດທະຍົມຕອນປາຍໄດ້ມີໂອກາດໄດ້ສຶກສາຮໍ່າຮຽນຍົກລະດັບຄວາມຮັບຮູ້,ວິທະຍາສາດ ແລະເຂົ້າໃຈໃນສາຂາວິຊາຊີບດ້ານຕ່າງໆເຊັ່ນ:ປູກເຫັດ, ລ້ຽງປາ, ລ້ຽງໝູ. ເພື່ອເປັນການສົ່ງເສີມ ແລະພັດທະນາສີມືແຮງງານໃຫ້ເຂົາເຈົ້ານຳເອົາໄປໝູນໃຊ້ໃນການດໍາລົງຊີວິດ ແລະໄປພັດທະນາຊີວິດການເປັນຢູ່ໃຫ້ມີທ່າກ້າວຂະຫຍາຍຕົວດີຂື້ນກວ່າເກົ່າ.

ສະໜັບສະໜຸນໂດຍ: HONDA

  ທ່ານ ອະນຸເດດ ສີຄໍາໄຊ ເຈົ້າເມືອງຮ້ຽມໄດ້ກ່າວຍ້ອງຍໍຊົມເຊີຍຄວາມພ້ອມໃນການຫ້າງຫາກະກຽມທຸກດ້ານໃນການເປີດສູນ ສນມ ຄັ້ງນີ້ໄດ້ຊີ້ໃຫ້ເຫັນເຖິງຄວາມອົດ ທົນ, ພະຍາຍາມບຸກບືນ, ເອົາໃຈໃສ່ສູ້ຊົນຂອງການນໍາທຸກຂັ້ນ, ເປັນແນວທາງການນໍາພາອັນຖືກ ຕ້ອງ, ສອດຄ່ອງກັບການຊີ້ນໍາຂອງຂັ້ນເທິງຈົນສາມາດເປີດສູນຄັ້ງນີ້ ໄດ້ຢ່າງສະຫງ່າຜາເຜີຍກາຍເປັນປະຫວັດສາດໜ້າໃໝ່ຂອງເມືອງ ຮ້ຽມ ແລະເປັນສູນ ສນມ ແຫ່ງ ທີ 2 ຂອງແຂວງຫົວພັນ,ນອກນີ້ຍັງໄດ້ເນັ້ນໜັກບາງບັນຫາໂດຍ ເລັ່ງໃສ່ຜູ້ບໍລິຫານສູນ, ຄູ-ອາຈານແລະນັກຮຽນໃຫ້ມີຄວາມຮັບຜິດຊອບສູງຕໍ່ໜ້າທີ່ທີ່ຕົນເອງໄດ້ຮັບມອບໝາຍພ້ອມທັງນໍາໃຊ້ສູນ ສນມ ແຫ່ງນີ້ເປັນແຫຼ່ງການຮຽນຮູ້ຂອງຊຸມຊົນ ແລະສ້າງໃຫ້ເກີດຜົນປະໂຫຍດສູງສຸດ.

--------------

​ໜັງສືພິມເສດຸະກິດ-ສັງຄົມ

แชร์