ເຜີຍແຜ່ການຄຸ້ມຄອງທຸລະກິດການທ່ອງທ່ຽວ

  ກອງປະຊຸມເຜີຍແຜ່ຂໍ້ຕົກລົງຂອງທ່ານເຈົ້າແຂວງສະບັບເລກທີ 756/ຈຂ.ຊຍ, ລົງວັນ ທີ 24 ກໍລະກົດ 2018 ວ່າດ້ວຍການຄຸ້ມຄອງວຽກງານວັດທະນະທໍາ ແລະທຸລະກິດການທ່ອງທ່ຽວແຂວງໄຊຍະບູລີ ໄດ້ຈັດຂຶ້ນໃນວັນທີ 22 ພະຈິກ ຜ່ານມາທີ່ຫ້ອງປະຊຸມພະແນກສຶກສາທິການ ແລະກີລາ ແຂວງໄຊຍະບູລີ, ໂດຍການເປັນປະ ທານຂອງທ່ານນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ, ມີບັນດາຫົວໜ້າ, ຮອງຫົວໜ້າພະແນກການອ້ອມຂ້າງແຂວງ, ອົງການ, ກົມກອງ, ຫົວໜ້າຂະ ແໜງ, ຮອງຂະແໜງ, ນັກທຸລະກິດຜູ້ປະກອບການ ແລະບັນດາພະນັກງານທີ່ກ່ຽວຂ້ອງເຂົ້າຮວ່ມ.

ສະໜັບສະໜຸນໂດຍ: HONDA

  ທ່ານ ນາງ ບຸນພັກ ອິນທະປັນຍາ ໄດ້ເຜີຍແຜ່ເນື້ອໃນຂໍ້ຕົກລົງຂອງທ່ານເຈົ້າແຂວງສະບັບເລກທີ 756/ຈຂ.ຊຍ, ລົງວັນທີ 24 ກໍລະກົດ 2018 ວ່າດ້ວຍການຄຸ້ມ ຄອງວຽກງານວັດທະນະທໍາ ແລະ ທຸລະກິດການທ່ອງທ່ຽວແຂວງ ໄຊຍະບູລີ ຊຶ່ງປະກອບມີ 6 ໝວດ, 23 ມາດຕາວ່າ: ວັດທະນະທໍາແມ່ນ ຄຸນຄ່າອັນລວມຍອດຂອງການສະສົມບັນດາຜະລິດຕະພັນທາງດ້ານວັດຖຸ ແລະຈິດໃຈທີ່ມວນມະນຸດໄດ້ປະດິດສ້າງຂຶ້ນມາໂດຍຜ່ານຂະບວນວິວັດທາງປະຫວັດສາດແມ່ນໝາກຜົນຂອງຄວາມຈະ ເລີນງອກງາມ, ຄວາມດີ, ຄວາມງາມທີ່ສັງຄົມນັ້ັນໆປະດິດສ້າງຂຶ້ນ ແລະ ສະສົມຖ່າຍທອດມາຮອດປະຈຸບັນ ແລະ ທຸລະກິດການທ່ອງທ່ຽວແມ່ນການມີສ່ວນຮ່ວມຂອງຫຼາຍພາກສ່ວນຊຶ່ງປະກອບດ້ວຍທຸລະກິດ ແຫຼ່ງທ່ອງທ່ຽວ, ທຸລະກິດນໍາທ່ຽວ, ທຸລະກິດຂົນສົ່ງນັກທ່ອງທ່ຽວ,ທຸລະກິດພັກແຮມ, ທຸລະກິດພັດຕາຄານ-ຮ້ານອາຫານ, ທຸລະກິດຝຶກອົບຮົມການນໍາທ່ຽວ, ທຸລະກິດທີ່ ປຶກສາການທ່ອງທ່ຽວ, ທຸລະກິດສະຖານບັນເທີງ ແລະທຸລະກິດເຄື່ອງທີ່ລະນຶກ ແລະທຸລະກິດອື່ນໆ ທີ່ພົວພັນເຖິງການທ່ອງທ່ຽວ.

ຈຸດປະສົງເພື່ອກໍານົດບັນດາຫຼັກການ, ລະບຽບການ, ມາດຕະການ ແລະການຄຸ້ມຄອງບັນດາຫົວໜ່ວຍທຸລະກິດທີ່ກ່ຽວຂ້ອງກັບການທ່ອງທ່ຽວພາຍໃນແຂວງໄຊຍະບູລີ ໃຫ້ເຄື່ອນໄຫວຖືກຕ້ອງຕາມມາດຕະຖານ, ເພື່ອຊຸກຍູ້ສົ່ງເສີມວຽກງານວັດທະນະທໍາ, ການອານຸລັກ, ປົກປັກຮັກສາ ແລະ ເສີມຂະຫຍາຍມູນເຊື້ອສີລະປະວັດທະນະທໍາອັນດີງາມຂອງຊາດຂອງເຜົ່າ, ແນໃສ່ຮັບປະກັນຄວາມເປັນລະບຽບຮຽບຮ້ອຍພ້ອມທັງສ້າງເງື່ອນໄຂອັນສະດວກໃຫ້ແກ່ການດໍາເນີນທຸລະກິດການທ່ອງທ່ຽວ ແລະໃຫ້ແກ່ຜູ້ມາຊົມໃຊ້ບໍລິການໄດ້ມີຄວາມປະທັບໃຈ.

---------------

 ​ໜັງສືພິມເສດຸະກິດ-ສັງຄົມ

แชร์