“ບ້ານເມືອງໃນທ່າມກາງພູຂຽວນໍ້າໃສ-ເພື່ອອຸດົມການ ອັນດຽວກັນ” ຈະອອກອາກາດໃໝ່

  ສາລະຄະດີເລື່ອງ “ບ້ານເມືອງໃນທ່າມກາງພູຂຽວນໍ້າໃສ-ເພື່ອອຸດົມການອັນດຽວກັນ” ເປັນສາລະຄະດີຮ່ວມກັນຖ່າຍທຳລະຫວ່າງສະຖານີວິທະຍຸໂທລະພາບກວາງຊີຈີນ ແລະໂທລະພາບແຫ່ງຊາດລາວ, ຊຶ່ງໃນວັນທີ 1 ຕຸລາ ຜ່ານມາທັງສອງສະຖານີໄດ້ອອກອາກາດໃນເວລາດຽວກັນ, ຊຶ່ງວັນອອກອາກາດຄັ້ງທຳອິດແມ່ນໂທລະພາບແຫ່ງຊາດລາວກຳນົດໄວ້ເພື່ອມອບເປັນຂອງຂວັນໃນມື້ສະເຫຼີມສະຫຼອງວັນຊາດ ສປ ຈີນ ຄົບຮອບ 70 ປີ, ພ້ອມທັງອັບໂຫຼດລົງສື່ອອນລາຍເຊັ່ນ: YouTube ແລະສື່ອື່ນໆ ແລະຫວ່າງບໍ່ດົນມານີ້ໂທລະພາບແຫ່ງຊາດລາວຍັງໄດ້ຈັດອອກອາກາດຄືນໃໝ່ຕື່ມອີກ.

  ສາລະຄະດີ “ບ້ານເມືອງໃນທ່າມກາງພູຂຽວນໍ້າໃສ-ເພື່ອອຸດົມການອັນດຽວກັນ” ໄດ້ພັນລະນາກ່ຽວກັບການພັດທະນາ ແລະ ການປ່ຽນແປງຂອງລາວເນື່ອງຈາກການຮ່ວມມືລະຫວ່າງລາວ-ຈີນ ໃນໂຄງການສ້າງທາງລົດໄຟ ລາວ-ຈີນ, ເຂື່ອນໄຟຟ້ານໍ້າຕົກ, ການພັດທະນາກະສິກຳ, ຫຼຸດຜ່ອນຄວາມທຸກຍາກ,ການທ່ອງທ່ຽວ ແລະການອະນຸລັກສິ່ງແວດລ້ອມເປັນຕົ້ນ, ໃຊ້ພຶດຕິກຳຕົວຈິງທີ່ປະຊາຊົນສອງຊາດລາວ-ຈີນ ຮ່ວມກັນສ້າງບ້ານເມືອງທີ່ສວຍງາມໃນທ່າມກາງພູຂຽວນໍ້າໃສດ້ວຍອຸດົມການອັນດຽວ ກັນ, ຊຶ່ງໄດ້ສະແດງໃຫ້ເຫັນເຖິງຈິດໃຈປະຊາຊົນສອງຊາດເຊື່ອມໂຍງກັນ ແລະ ໄດ້ສ້າງພື້ນຖານດ້ານຈິດໃຈປະຊາຊົນຢ່າງໜັກແໜ້ນໃຫ້ແກ່ການສ້າງຄູ່ຮ່ວມຊາຕາກຳລາວ-ຈີນ.

ສະໜັບສະໜຸນໂດຍ: HONDA

  ອີງຕາມຄຳຊີ້ນຳຂອງກະຊວງຖະແຫຼງຂ່າວວັດທະນະທຳ ແລະທ່ອງທ່ຽວລາວ, ໂທລະພາບແຫ່ງຊາດລາວໄດ້ອອກອາກາດສາລະຄະດີ “ບ້ານເມືອງໃນທ່າມກາງພູຂຽວນໍ້າໃສ-ເພື່ອອຸດົມການອັນ ດຽວກັນ” ຫຼາຍເທື່ອ, ເຮັດໃຫ້ປະ ຊາຊົນບັນດາເຜົ່າໃນທົ່ວປະເທດ ລາວໄດ້ເບິ່ງໄດ້ຊົມສາລະຄະດີດັ່ງກ່າວ,ຮໍ່າຮຽນເອົາວິທີ ແລະຮູບແບບທີ່ດີເພື່ອນຳມາປັບປຸງຊີວິດການເປັນຢູ່ໃຫ້ດີຂຶ້ນ, ຫຼຸດຜ່ອນຄວາມທຸກຍາກ ແລະສ້າງຄວາມຮັ່ງມີ, ນອກຈາກນີ້ໃນເດືອນທັນວາທີ່ຈະມາເຖິງນີ້ໂທລະພາບແຫ່ງຊາດລາວຊ່ອງ 1ຈະຈັດການອອກອາກາດຄືນໃໝ່ອີກ 3 ເທື່ອຄື: ວັນທີ 4 ເວລາ 08:45 ໂມງ, ວັນທີ 12 ເວລາ 14:05 ໂມງ ແລະ ວັນທີ 22 ເວລາ 15:20 ໂມງ.

  ທ່ານ ບຸນເຈົ້າ ພິຈິດ ຄະນະພັກປະຈຳກະຊວງຖະແຫຼງຂ່າວວັດທະນະທຳ ແລະທ່ອງທ່ຽວລາວທັງເປັນຜູ້ອຳນວຍການໃຫຍ່ໂທລະພາບແຫ່ງຊາດລາວເຫັນວ່າ, ສາລະ ຄະດີດັ່ງກ່າວເປັນຜົນງານທີ່ດີ ເດັ່ນໃນການຮ່ວມມືລະຫວ່າງໂທ ລະພາບລາວ-ຈີນ, ໄດ້ບັນທຶກສະພາບຄວາມເປັນຈິງຂອງລາວ,ແລະສ່ອງແສງໃຫ້ເຫັນເຖິງການຮ່ວມມືລາວ-ຈີນ ທີ່ໄດ້ສ້າງຜົນປະໂຫຍດໃຫ້ແກ່ສັງຄົມ ແລະ ປະຊາຊົນລາວ, ຊຶ່ງເຊື່ອວ່າຜ່ານການຮັບຊົມສາລະຄະດີດັ່ງກ່າວ, ຜູ້ຊົມຈະເຫັນເຖິງການປ່ຽນແປງທີ່ຕັ້ງໜ້າຂອງພະເອກນາງເອກໃນສາລະຄະດີ ແລະຮັບຮູ້ຜົນສຳເລັດອັນຈົບງາມ ແລະຄວາມໝາຍທີ່ສຳຄັນຂອງການຮ່ວມມືລາວຈີນ.

 ຫວ່າງມໍ່ໆມານີ້,ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວລາວ,ໂທລະພາບແຫ່ງຊາດລາວໄດ້ສົ່ງຈົດໝາຍເຖິງຫ້ອງການຖະແຫຼງຂ່າວຄະນະລັດຖະບານຈີນກ່ຽວກັບເລື່ອງນີ້, ໂດຍລະບຸວ່າ, ສາລະຄະດີ “ບ້ານເມືອງໃນທ່າມ ກາງພູຂຽວນໍ້າໃສ-ເພື່ອອຸດົມການອັນດຽວກັນ” ເປັນ “ໝາກຜົນທີ່ທີມງານໂທລະພາບສອງປະເທດລາວຈີນຮ່ວມມືກັນດ້ວຍຄວາມໄວ້ເນື້ອເຊື່ອໃຈ ແລະມີຄວາມຈິງໃຈໃນລະດັບສູງ”, “ຂອບໃຈສະຖານີວິທະຍຸໂທລະພາບກວາງຊີຈີນທີ່ໄດ້ທຸ້ມເທເຫື່ອແຮງເຂົ້າໃນໂຄງການນີ້, ຫວັງວ່າບົນພື້ນຖານຂອງການຖ່າຍທຳ ແລະອອກອາກາດສາລະຄະດີດັ່ງກ່າວຢ່າງສຳເລັດຜົນນັ້ນ, ທີມງານໂທລະພາບສອງ ປະເທດລາວ-ຈີນ ຈະສືບຕໍ່ຮ່ວມມືກັນ ແລະເຮັດຄວາມພະຍາຍາມຢ່າງບໍ່ລົດລະ, ຊຸກຍູ້ໃຫ້ທັດສະນະທີ່ຄູ່ຮ່ວມຊາຕາກຳລາວ-ຈີນ ເຂົ້າເຖິງຈິດໃຈຂອງປະຊາຊົນ, ເຮັດໃຫ້ມິດຕະພາບລາວ-ຈີນນັບມື້ນັບແໜ້ນ ແຟ້ນຍິ່ງຂຶ້ນ”.

--------------------

ໜັງສືພິມເສດຖະກິດ-ສັງຄຸົມ

แชร์