ຜະລິດລູກໝູຂາຍສ້າງລາຍຮັບໄດ້ 120 ລ້ານກີບຕໍ່ປີ

  ຄອບຄົວທ່ານ ຈັນໄທ ພົມມະວົງສາ ບ້ານກຸດຈັບເມືອງໜອງບົກແຂວງຄຳມ່ວນມີສະມາຊິກພາຍໃນຄອບຄົວ 6 ຄົນ ໃນນັ້ນແຮງງານຕົ້ນຕໍ 3 ຄົນເປັນຄອບຄົວທີ່ຢຶດຖືອາຊີບລ້ຽງໝູເພື່ອສ້າງເສດຖະກິດຄອບຄົວມາຫຼາຍປີຊຶ່ງ ທ່ານ ຈັນໄທ ເລົ່າໃຫ້ຟັງວ່າ: ຄອບຄົວຂອງລາວເອງໄດ້ເລີ່ມລ້ຽງໝູມາແຕ່ປີ 2006 ເບື້ອງຕົ້ນແມ່ນລ້ຽງໝູລາດ (ໝູພື້ນບ້ານ) ພໍລ້ຽງມາໄດ້ໄລຍະໜຶ່ງເຫັນວ່າໝູພັນຊີ້ນແມ່ນຕະຫຼາດມີຄວາມຕ້ອງການຫຼາຍຈຶ່ງໄດ້ຫັນມາລ້ຽງໝູພັນຊີ້ນເພື່ອຈຳໜ່າຍໂດຍໄດ້ນຳລູກໝູຈາກປະເທດເພື່ອບ້ານມາລ້ຽງເມື່ອລ້ຽງໃຫຍ່ແລ້ວກໍຂາຍອອກແລ້ວກໍ່ນຳເຂົ້າມາໃໝ່ເປັນຊຸດຕໍ່ຊຸດ, ເມື່ອນຳເຂົ້າລູກໝູມີຄວາມຫຍຸ້ງຍາກ ແລະມີລາຄາສູງໃນປີ 2006 ຈຶ່ງ

ຕັດສິນໃຈນຳເອົາພໍ່-ແມ່ພັນໝູມາລ້ຽງເພື່ອຜະລິດລູກໝູຈຳໜ່າຍສ່ວນທີ່ເຫຼືອກໍ່ລ້ຽງໄວ້ເປັນໝູຊີ້ນຈຳໜ່າຍເອງ, ການຜະລິດລູກໝູໃນເບື້ອງຕົ້ນກໍພົບຄວາມຫຍຸ້ງຍາກຫຼາຍເນື່ອງຈາກຄວາມຮູ້ທາງດ້ານເຕັກນິກແມ່ນຍັງມີໜ້ອຍ, ພາຍຫຼັງທີ່ທາງຂະແໜງການທີ່ກ່ຽວຂ້ອງກໍ່ຄືຂະແໜງກະສິກຳ ແລະປ່າໄມ້ເມືອງ, ແຂວງໄດ້ລົງມາຊຸກຍູ້, ແນະນຳທາງດ້ານເຕັກນິກພ້ອມທັງໄດ້ເຂົ້າຮ່ວມຝຶກອົບ ຮົມໃນໂຄງການຕ່າງໆ ແລະ ຄວາມຮູ້ອີກສ່ວນໜຶ່ງກໍ່ໄດ້ມາຈາກຕຳລາເຮັດໃຫ້ຕົນເອງເຂົ້າໃຈໄດ້ຫຼາຍຂຶ້ນບໍ່ວ່າຈະເປັນຄວາມຮູ້ທາງດ້ານເຕັກນິກ, ການບົວລະບັດຮັກສາ, ການສັກຢາປ້ອງກັນຕ່າງໆ.

  ໃນຊ່ວງທຳອິດແມ່ນໄດ້ນຳແມ່ພັນເຂົ້າມາລ້ຽງຈຳນວນ 7 ແມ່ຊຶ່ງໝູ 1 ແມ່ພັນຜະລິດລູກໝູໄດ້ 2 ຊຸດຕໍ່ປີໂດຍສະເລ່ຍໃນ 1 ແມ່ນສາມາດຜະລິດລູກໝູໄດ້ 10 ໂຕ ຕໍ່ 1 ຊຸດ ຊຶ່ງລູກໝູໃນແຕ່ລະຊຸດແມ່ນໃຊ້ເວລາລ້ຽງປະມານ 45 ວັນກໍ່ຈຳໜ່າຍອອກ, ເນື່ອງຈາກຕະຫຼາດມີຄວາມຕ້ອງການຫຼາຍລູກໝູທີ່ຜະລິດອອກໃນແຕ່ລະຊຸດແມ່ນບໍ່ພຽງພໍກັບຄວາມຕ້ອງການຈຶ່ງໄດ້ນຳແມ່ພັນເຂົ້າມາເພີ່ມຂຶ້ນໃນແຕ່ລະປີຕາມທ່າແຮງ ແລະ ຄວາມອາດສາມາດຂອງແຮງງານພາຍໃນຄອບຄົວ.

ສະໜັບສະໜຸນໂດຍ: HONDA

 ປະຈຸບັນແມ່ນມີແມ່ພັນໝູຈຳນວນ 22 ແມ່, ສາມາດຜະລິດລູກໝູໄດ້ປະມານ 400-500 ໂຕຕໍ່ ປີ ແລະສ້າງລາຍຮັບໄດ້ປະມານ 120 ລ້ານກີບຕໍ່ປີຫຼັງຈາກຫັກຕົ້ນທຶນອອກແລ້ວ, ໂດຍລາຍຮັບດັ່ງກ່າວແມ່ນເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນ, ເປັນທຶນຮອນໃນການສ້າງເຮືອນຢູ່ຈຳນວນ 2 ຫຼັງ, ຊື້ລົດໃຫຍ່ 2 ຄັນ, ເປັນທຶນຮອນສົ່ງລູກຮຽນ, ໃຊ້ຈ່າຍໃນຊີວິດປະຈຳວັນ ແລະ ອື່ນໆ.

  ທ່ານ ຈັນໄທ ໃຫ້ຮູ້ຕື່ມວ່າ: ສຳລັບກິດຈະການລ້ຽງໝູໃນປະຈຸບັນແມ່ນຍັງມີຄວາມຫຍຸ້ງຍາກດ້ານຕະຫຼາດການຈຳໜ່າຍໝູຊີ້ນ (ໝູຂຸນ) ເນື່ອງຈາກມີຕະຫຼາດຈາກບ່ອນອື່ນ ຫຼືບໍລິສັດໃຫຍ່ທີ່ເຂົ້າມາແຊກແຊງທາງດ້ານລາຄາຈຶ່ງຂໍຮຽກຮ້ອງມາຍັງພາກລັດກໍ່ຄືຂະແໜງການທີ່ກ່ຽວຂ້ອງເອົາໃຈໃສ່ໃນການຄຸ້ມຄອງຕະຫຼາດເພື່ອເບິ່ງແຍງ ແລະ ຊຸກຍູ້ທຸລະກິດແບບຄອບຄົວໃຫ້ຫຼາຍຂຶ້ນ.

__________

ຂຽນໂດຍ: ກອງຄຳ ລໍອິນສານ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

 

แชร์