ເຈົ້າເມືອງນອງ ຊຸກຍູ້ການພັດທະນາເສດຖະກິດຢູ່ເຂດອາເລົາ

 ເມື່ອບໍ່ດົນມານີ້ ທ່ານລໍາແກ້ວ ແສງໜູທອງ ຮັກສາການເລຂາພັກເມືອງເຈົ້າເມືອງນອງພ້ອມດ້ວຍບັນດາທ່ານໃນຫົວໜ້າຫ້ອງການຈໍານວນໜຶ່ງໄດ້ລົງຊຸກຍູ້ວຽກງານການພັດທະນາເຂດອາເລົາ 7 ບ້ານ ຊຶ່ງພິທີດັ່ງກ່າວຈັດຂື້ນທີ່ໂຮງຮຽນປະຖົມບ້ານອາເລົາ.

 ທ່ານ ບຸນເລື່ອມ ໄຊຍະເສດ ເລຂາຄະນະພັກຮາກຖານເຂດອາເລົາຕາງໜ້າໃຫ້ອໍານາດການປົກຄອງພາຍໃນ 7 ໝູ່ບ້ານເຂດອາເລົາໄດ້ລາຍງານຫຍໍ້ສະພາບການຊີ້ນໍາໆພາການຈັດຕັ້ງປະຕິບັດເສດຖະກິດສັງຄົມໃນໄລຍະຜ່ານມາວ່າ: ເຂດອາເລົາປະກອບມີ 7 ບ້ານ ທີ່ຂຶ້ນກັບ ມີ 522 ຫຼັງຄາເຮືອນມີ 666 ຄອບຄົວມີພົນລະເມືອງທັງ ໝົດ 3361 ຄົນ, ຍິງ 1628 ຄົນເປັນເຜົ່າບຣູມັງກອງເຊື່ອຖືຜີປະຊາຊົນຍືດຖືອາຊີບການປູກຝັງລ້ຽງສັດເປັນຕົ້ນຕໍໃນເນື້ອທີ່ທໍາການຜະລິດ 1.520 ເຮັກຕາ, ເນື້ອທີ່ໄຮ່ປະສົມປະສານ 308 ເຮັກຕາ, ເນື້ອທີ່ນາ 65 ເຮັກຕາ, ຢາງໂບ່ງ 49 ເຮັກຕາ, ຫວາຍ 7,5 ເຮັກຕາ ແລະ ມີສວນປູກພືດປະສົມຕື່ມອີກ, ນອກນັ້ນພໍ່ແມ່ປະຊາ ຊົນກໍ່ຍັງໄດ້ເອົາໃຈໃສ່ລ້ຽງສັດປະເພດຕ່າງໆມີ 9,5 ພັນໂຕ, ຄວາຍ 190 ໂຕ, ງົວ 1 ພັນໂຕ, ແບ້, ໝູ, ສັດປີກ ຕ່າງໆ ແລະໜອງປາ 120 ໜອງ.

ສະໜັບສະໜຸນໂດຍ: HONDA

  ປະຊາຊົນໃນແຕ່ລະບ້ານກໍ່ໄດ້ມີການພັດທະນາເພື່ອຫຼຸດພົ້ນອອກຈາກຄວາມທຸກຍາກເປັນກ້າວໆມາ, ເຖິງວ່າການພັດທະນາໃນດ້ານຕ່າງໆມາຮອດປະຈຸບັນໄດ້ມີການຂະຫຍາຍຕົວຢ່າງຕໍ່ເນື່ອງແຕ່ຍັງມີປັດໄຈຫຼາຍດ້ານທີ່ຍັງຄົງຄ້າງພົບຄວາມຫຍຸ້ງຍາກສະເໜີໃຫ້ທາງເມືອງພາກສ່ວນທີ່ກ່ຽວຂ້ອງເພື່ອຊ່ວຍແກ້ໄຂເຊັ່ນ: ເສັ້ນທາງໄປມາພາຍໃນເຂດບ້ານຕໍ່ບ້ານແມ່ນຍັງພົບຄວາມຫຍຸ້ງຍາກ, ການຜະລິດຢາງໂບ່ງລາຄາຕໍ່າ, ສັດລ້ຽງຕິດພະຍາດ ແລະ ຕາຍ, ປະຊາຊົນຍັງນໍາເອົາມາເປັນອາຫານບໍ່ຮູ້ວິທີ ການຮັກສາ, ເດັກໃນເກນອາ ຍຸເຂົ້າຮຽນຍັງຄ້າງເຂົ້າຮຽນບໍ່ໝົດ ຫຼື ຮຽນບາງບ້ານກໍ່ບໍ່ເຕັມເມັດເຕັມໜ່ວຍຍ້ອນຫຍຸ້ງຍາກພາຍໃນຄອບຄົວ, ການສັກຢາຢອດຢາກັນພະຍາດຕ່າງໆພໍ່ແມ່ປະຊາຊົນຈໍານວນໜຶ່ງກໍ່ຍັງຖືເບົາເຂົ້າໃຈໄປໃນທາງທີ່ຜິດ, ປາກົດການຫຍໍ້ທໍ້ໃນສັງຄົມຈໍານວນໜຶ່ງກໍ່ຍັງເກີດມີ.

  ໃນໂອກາດນີ້, ທ່ານ ລໍາແກ້ວ ແສງໜູທອງ ກໍ່ໄດ້ພົບປະໂອ້ລົມໃຫ້ທິດຊີ້ນໍາແກ່ອໍານາດການປົກຄອງພໍ່ແມ່ປະຊາຊົນທີ່ໄດ້ເຂົ້າຮ່ວມເປັນຕົ້ນກໍ່ແມ່ນວຽກງານເສດຖະກິດການຜະລິດແມ່ນໃຫ້ເອົາໃຈໃສ່ປູກພືດທີ່ຕະຫຼາດມີຄວາມຕ້ອງການເຊັ່ນ: ກ້ວຍ, ມັນຕົ້ນ, ພືດກະສິກໍາອື່ນໆສັດລ້ຽງກໍ່ແມ່ນໃຫ້ເອົາໃຈໃສ່ລ້ຽງພ້ອມສັກຢາປ້ອງກັນພະ ຍາດໃຫ້ຖືກຕາມຫຼັກວິຊາການໃນເມື່ອສັດຖືກພະຍາດບໍ່ຄວນເອົາມາກິນຄວນລາຍງານໃຫ້ພາກສ່ວນກ່ຽວຂ້ອງໂດຍດ່ວນ, ຄົ້ນຄວ້າລະອຽດຕື່ມບ່ອນໃດທີ່ມີເງື່ອນໄຂເພື່ອບຸກເບີກຂະຫຍາຍເນື້ອທີ່ນາ, ເອົາໃຈໃສ່ທາງດ້ານວຽກງານສຶກສາໃນແຕ່ລະບ້ານໃຫ້ສົ່ງລູກຫຼານໃນເກນອາຍຸເຂົ້າຮຽນໃຫ້ທົ່ວເຖິງຮຽນໃຫ້ຈົບໃນແຕ່ລະຊັ້ນຮຽນເພື່ອສຶບຕໍ່ເຂົ້າຮຽນວິຊາອາຊີບຕ່າງໆ, ເອົາໃຈໃສ່ຮັກສາສຸຂະພາບໃຫ້ແຂງແຮງເປັນຕົ້ນກໍ່ແມ່ນການຮັກສາອະນາໄມສາມສະອາດໃຫ້ດີເອົາໃຈໃສ່ຮ່ວມມືເຂົ້າຮ່ວມຂະບວນການສັກຢາຢອດຢາກັນພະຍາດໃຫ້ທົ່ວເຖິງເຈັບເປັນກໍ່ຕ້ອງໄປກວດຢູ່ສຸກສາລາ ຫຼືໂຮງໝໍຕື່ມ, ໃຫ້ຫຼຸດພົ້ນການເຊື່ອຖືງົມງວາຍລົງ, ເອົາໃຈໃສ່ສະກັດກັ້ນປາກົດການຫຍໍ້ທໍ້ທີ່ເກີດຂຶ້ນພາຍໃນເຂດຂອງຕົນໃຫ້ມີຄວາມສະຫງົບແກ້ໄຂຢ່າງທັນການ, ເອົາໃຈໃສ່ສ້າງຂະບວນການຕ້ອນຮັບວັນສໍາຄັນຂອງຊາດກໍ່ຄືກອງປະຊຸມໃຫຍ່ຄັ້ງທີ 11 ຂອງເມືອງທີ່ຈະ ມາເຖິງນີ້ໃຫ້ເປັນຂະບວນ.

 ໃນຕອນທ້າຍກໍ່ຍັງໄດ້ມອບເຄື່ອງຊ່ວຍເຫຼືອຈໍານວນໜຶ່ງໃຫ້ແກ່ອໍານາດການປົກຄອງພໍ່ແມ່ປະຊາຊົນຊຶ່ງປະກອບມີເຂົ້າສານຈ້າວ-ເຂົ້າໜຽວຈໍານວນ 1,1 ພັນກິໂລ ແລະ ເຄື່ອງອຸປະໂພກ-ບໍລິໂພກຈໍານວນໜຶ່ງອີກ.

__________

ຂຽນໂດຍ: ສະເຫຼີມໄຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์