ທ່າແຕງ ມອບສະໜາມຂີ້ເຫຍື້ອໃຫ້ບໍລິສັດແກ້ວທະວີຊັບ

 ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງທ່າແຕງ ແຂວງເຊກອງ ຈັດພິທີມອບ-ຮັບສະໜາມຂີ້ເຫຍື້ອໃຫ້ກັບບໍລິສັດແກ້ວທະວີຊັບເປັນຜູ້ຮັບເຊົ່າ ແລະຄຸ້ມຄອງ, ກຳຈັດສິ່ງເສດເຫຼືອໃນຂອບເຂດສະທາລະນະຊຸມຊົນພາຍໃນເມືອງທ່າແຕງ ໂດຍການເປັນປະທານຂອງທ່ານ ທອງແກ້ວ ລັດອຳນວຍ ຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງທ່າແຕງ ທ່ານ ນາງ ແກ້ວລາວັນ ແກ້ວລາດສະວົງໄຊ ເປັນຕົວແທນຜູ້ອຳນວຍການບໍລິສັດແກ້ວທະວີຊັບ, ມີຄະນະກຳມະການ ແລະ ພະນັກງານວິຊາການພາຍໃນຫ້ອງການເຂົ້າຮ່ວມ.

  ທ່ານ ຄຳເຜີຍ ຕະນະວົງ ຮອງຫົວໜ້າຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມເມືອງທ່າແຕງ ໄດ້ຜ່ານບົດບັນທຶກສັນຍາວ່າດ້ວຍການຄຸ້ມຄອງ ແລະ ເຊົ່າສະໜາມຂີ່ເຫຍື້ອ ແລະ ກົດໝາຍວ່າດ້ວຍການປົກປັກຮັກສາສິ່ງແວດລ້ອມເລກທີ 29/ສພຊ ລົງວັນທີ 18 ທັນວາ 2012 ແລະ ຂໍ້ກຳນົດຂອງທ່ານ ເຈົ້າເມືອງໆທ່າແຕງ ສະບັບເລກທີ 01/ຈມ,ທຕ ລົງວັນທີ 20 ມີນາ 2019 ວ່າດ້ວຍການຄຸ້ມຄອງ ແລະການພັດທະນາຕົວເມືອງ-ຕິດພັນກັບ 5 ສ ສະນັ້ນຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມຈຶ່ງມອບໃຫ້ຜູ້ອຳນວຍການບໍລິສັດແກ້ວທະວີຊັບ, ເປັນຜູ້ຮັບເຊົ່າ, ຄຸ້ມຄອງນຳໃຊ້ ແລະບູລະນະສ້ອມແປງ ແລະ ເກັບມ້ຽນສິ່ງເສດເຫຼືອ, ເສັ້ນທາງຊອຍສະໜາມເກັບມ້ຽນສິ່ງເສດເຫຼືອໃຫ້ມີຄວາມຍືນຍົງໂດຍສະເພາະການຄຸ້ມຄອງສິ່ງເສດເຫຼືອທົ່ວໄປໃຫ້ຖືກວິທີພ້ອມນຳໃຊ້ຫຼັກການ 3Rs ຄື: ຫຼຸດຜ່ອນ, ການນຳໃຊ້ຄືນໃໝ່ ແລະ ການນຳມາຜະລິດຄືນໃໝ່ພ້ອມທັງສົ່ງເສີມການຕະຫຼາດໃຫ້ຄົບວົງຈອນໄປຕາມນະໂຍບາຍ ແລະລະບຽບຫຼັກການ, ພ້ອມນັ້ນກໍ່ໄດ້ຜ່ານຂໍ້ກຳນົດວ່າດ້ວຍການຮັບຮອງຫົວໜ່ວຍຈັດເກັບຄ່າບໍລິການຄຸ້ມຄອງສິ່ງເສດເຫຼືອ ແລະບໍລິການພັດທະນາຕົວເມືອງຕື່ມອີກ.

  ໃນພິທິດັງກ່າວກໍ່ໄດ້ເຊັນບົດບັນທຶກສັນຍາ ແລະແລກປ່ຽນຄຳຄິດຄຳເຫັນລະຫວ່າງຄະນະກຳມະການ ແລະບໍລິສັດແກ້ວທະວີຊັບເພື່ອເຮັດໃຫ້ຂອບເຂດສະທາລະນະຊຸມ ຊົນພາຍໃນເມືອງທ່າແຕງມີຄວາມສະອາດຖືກຕ້ອງຕາມຫຼັກວິຊາການ.

__________

ຂຽນໂດຍ: ລັດຕະນາ ຄຳສົມພູ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์