ທຸລະກິດບໍລິການສະເໝີລັດປັບຄ່າໄຟລົງ

  ເຖິງແມ່ນວ່າຂະແໜງການບໍລິການ ແລະທ່ອງທ່ຽວຂອງລາວຈະມີບົດບາດສໍາຄັນໃນການສົ່ງເສີມການຂະຫຍາຍຕົວຂອງເສດຖະກິດ ແລະ ເປັນການສ້າງໂອກາດໃຫ້ຄົນລາວເຂົ້າເຖິງວຽກເຮັດງານທໍາກໍຕາມແຕ່ການດໍາເນີນທຸລະກິດຂອງຜູ້ປະກອບການຍັງປະເຊີນກັບຫຼາຍບັນຫາຫຍຸ້ງຍາກ ແລະ ຍັງບໍ່ທັນໄດ້ຮັບບູລິມະສິດເທົ່າທີ່ຄວນ ຈາກລັດຖະບານໃນການພັດທະນາປັບປຸງເພື່ອຍົກລະດັບຄຸນນະພາບການບໍລິການໃນທົ່ວປະເທດໂດຍສະເພາະແມ່ນຕົ້ນທຶນການຜະລິດຊຶ່ງເຫັນວ່າອັດຕາຄ່າໄຟຟ້າແພງບໍ່ເປັນການສົ່ງເສີມຂະແໜງການບໍລິການ.

ສະໜັບສະໜຸນໂດຍ: HONDA

 ໃນກອງປະຊຸມທຸລະກິດລາວຄັ້ງທີ 12 ພາກທຸລະກິດສະເໜີວ່າ: ຍ້ອນຈາກເຫັນໄດ້ຄວາມສໍາຄັນຂອງຂະແໜງການທ່ອງທ່ຽວຕໍ່ການສ້າງລາຍຮັບຂອງປະເທດ, ຊຸກຍູ້ສົ່ງເສີມຂະແໜງການບໍລິການໂດຍສະເພາະທຸລະກິດການບໍລິການຫຼັກທີ່ປິ່ນອ້ອມການທ່ອງທ່ຽວກໍຄວນຈະໄດ້ຮັບການສົ່ງເສີມຈາກພາກລັດຖະບານເພື່ອຫຼຸດຜ່ອນຕົ້ນທຶນລາຄາຜະລິດຕະພັນການທ່ອງທ່ຽວລົງ, ຊຶ່ງຕະຫຼອດໃນໄລຍະຜ່ານມາລັດຖະບານໄດ້ເນັ້ນຢໍ້າຕໍ່ພາກທຸລະກິດບໍລິການຂອງລາວກ່ຽວກັບການພັດທະນາພາກບໍລິການ ໂດຍ ເນັ້ນໃສ່ການພັດທະນາດ້ານບຸກຄະລາກອນ ແລະມາດຕະຖານດ້ານການບໍລິການທີ່ມີຄຸນນະພາບເພື່ອຕອບສະໜອງຕໍ່ຄວາມຕ້ອງການຂອງນັກທ່ອງທ່ຽວພາຍໃນ ແລະຕ່າງປະເທດລວມເຖິງການເພີ່ມຄວາມສາມາດໃນການປະດິດສ້າງຜະລິດຕະພັນ ແລະ ລາຍການທ່ອງທ່ຽວໃໝ່ໆ ບົນພື້ນຖານດ້ານສິລະປະວັດທະນະທໍາ ແລະຊັບພະຍາກອນທໍາມະຊາດທີ່ອຸດົມສົມບູນຂອງລາວເປັນສິ່ງຄໍາຄັນ.

 ແຕ່ສະພາບແວດລ້ອມການດໍາເນີນທຸລະກິດຂອງຜູ້ປະກອບການໂດຍລວມຍັງມີອຸປະສັກຫຼາຍຢ່າງເປັນຕົ້ນແມ່ນອັດຕາຄ່າໄຟຟ້າຊຶ່ງເຫັນວ່າຍັງບໍ່ໄດ້ຮັບການສົ່ງເສີມຈາກພາກລັດຖະບານ ແລະ ໃນປະຈຸບັນຂະແໜງທຸລະກິດດ້ານການບໍລິການເປັນຕົ້ນແມ່ນໂຮງແຮມ, ຮ້ານອາຫານ ແລະ ບັບດາແຫຼ່ງທ່ອງທ່ຽວຕ່າງໆ ແມ່ນບໍ່ໄດຮັບສິດທິພິເສດດ້ານຄ່າໄຟຟ້າຄືກັບຂະແໜງອຸດສາຫະກໍາຈຶ່ງເຮັດໃຫ້ມີຄ່າໃຊ້ຈ່າຍໄຟຟ້າສູງຫຼາຍ.

  ການບໍລິການເປັນຂະແໜງການທີ່ມີບົດບາດສໍາຄັນຫຼາຍຕໍ່ການພັດທະນາເສດຖະກິດເນື່ອງຈາກກວມເອົາເກືອບ 40% ຂອງຜະລິດຕະພັນລວມ ຫຼື ຈີດີພີຂອງປະ ເທດຊຶ່ງຫຼາຍກວ່າຂະແໜງອຸດສາຫະກໍາທີ່ກວມເອົາ 33,2%, ສະນັ້ນພາກທຸລະກິດເຫັນວ່າລັດຖະບານຄວນເອົາໃຈໃສ່ສົ່ງເສີມຂະແໜງການບໍລິການເຊັ່ນດຽວກັບຂະ ແໜງອຸດສາຫະກໍາ, ປະຈຸບັນເຫັນວ່າອັດຕາຄ່າໄຟຟ້າຂອງຂະແໜງການຄ້າ ແລະບໍລິການສູງກວ່າປະເພດອຸດສາຫະກໍາຫຼາຍກວ່າ 40% (ລາຄາໄຟຟ້າແຮງດັນຕໍ່າຕໍ່ກິໂລວັດໂມງອຸດສາຫະກໍາເທົ່າກັບ 779 ກີບ, ການບໍລິການ 1.101 ກີບ ລາຄາປີ 2017), ເມື່ອທຽບໃສ່ປະເທດອ້ອມຂ້າງເຊັ່ນ: ປະເທດໄທທີ່ມີການພັດທະນາດ້ານການບໍລິການ ແລະການທ່ອງທ່ຽວຫຼາຍກວ່າ ສປປ ລາວ ເຫັນວ່າອັດຕາຄ່າໄຟຟ້າສໍາລັບຂະແໜງການຄ້າ ແລະ ການບໍລິການແມ່ນຕໍ່າກວ່າຂະແໜງອຸດສາຫະກໍາເກີນ 30%.

  ຕໍ່ກັບບັນຫາດັ່ງກ່າວພາກທຸລະກິດໄດ້ສະເໜີໃຫ້ລັດຖະບານພິຈາລະນາສົ່ງເສີມຂະແໜງການບໍລິການໂດຍການປັບອັດຕາຄ່າໄຟຟ້າໃຫ້ເທົ່າກັບຂະແໜງອຸດສາຫະກໍາ ເພື່ອເປັນການຫຼຸດຜ່ອນຕົ້ນທຶນຂອງຜູ້ປະກອບການດ້ານການບໍລິການລົງ.

__________

ຂຽນໂດຍ: ພູຂອງ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์