ເປີດໂຄງການກໍ່ສ້າງນໍ້າປະປາ ແລະສຸຂະພິບານເມືອງຊຳເໜືອ

 ພິທີເປີດໂຄງການກໍ່ສ້າງນໍ້າປະປາ ແລະສຸຂາພິບານເມືອງຊຳເໜືອ ແຂວງຫົວພັນ ໄດ້ຈັດຂຶ້ນໃນວັນທີ 20 ພະຈິກ 2019 ທີ່ພະແນກ ຍທຂ ແຂວງຫົວພັນ ໂດຍການເຂົ້າຮ່ວມຂອງທ່ານນາງ ວິໄລຄຳ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ພູໂຊນ ທຳມະວິໄຊ ຮອງເຈົ້າແຂວງຫົວພັນ, ທ່ານຫົວໜ້າພະ ແນກ ຍທຂ ການນຳເມືອງຊຳເໜືອ, ຫົວໜ້າ-ຮອງພະແນກການກ່ຽວຂ້ອງອ້ອມຂ້າງແຂວງ, ເມືອງຊຳເໜືອ ແລະນາຍບ້ານ 12 ບ້ານເທດສະບານເມືອງຊຳເໜືອເຂົ້າ ຮ່ວມນຳ.

  ໂຄງການກໍ່ສ້າງນໍ້າປະປາ ແລະສຸຂາພິບານຢູ່ເທດສະບານ ເມືອງຊຳເໜືອ ແຂວງຫົວພັນເປັນໂຄງການຊ່ວຍເຫຼືອຈາກທະນາຄານພັດທະນາອາຊີ (ADB) ມີມູນຄ່າກໍ່ສ້າງທັງໝົດ 4,9 ລ້ານໂດລາ ໂດຍແມ່ນກະຊວງ ຍທຂ ເປັນເຈົ້າຂອງໂຄງການໄດ້ເລີ່ມລົງມືກໍ່ສ້າງມາແຕ່ຕົ້ນເດືອນກໍລະກົດ 2019 ໂດຍແມ່ນກຸ່ມບໍລິສັດດີເອັມກໍ່ສ້າງເປັນຜູ້ຮັບເໝົາ.

  ໜ້າວຽກຫຼັກປະກອບມີ: ສ້າງສະຖານີດູດນໍ້າພ້ອມດ້ວຍປໍ້າສູບສົ່ງ ແລະສາຍທໍ່ສົ່ງຂຶ້ນໂຮງງານ, ສ້າງໂຮງງານຜະລິດນໍ້າປະປາປະກອບມີ: (ສ້າງອ່າງຕົກຕະກອນເບື້ອ ງຕົ້ນ, ເຄື່ອງສີດສານເຄມີ, ອ່າງກວນນໍ້າ, ອ່າງນໍ້ານອນ, ອ່າງຕອງຊາຍແບບໄວ, ອ່າງລ້າງກັບ, ອ່າງນໍ້າສະອາດ ມີຂະໜາດ  2 ພັນແມັດກ້ອນ, ເຮືອນປະສົມສານເຄ ມີ, ຫ້ອງທົດລອງ, ຫ້ອງການສາຂານໍ້າປະປາ, ສ້າງມ້ຽນເຄື່ອງ ແລະອ່າງຖິ້ມຕົມ)ຄວາມຍາວສາຍທໍ່ສົ່ງທັງໝົດ 2,8 ພັນແມັດ ແລະ ສາຍທໍ່ແຈກ 17,9 ພັນແມັດ, ກໍ່ສ້າງວິດຖ່າຍສາທາລະນະ 11 ຫຼັງ, ຄາດຄະເນ ຕິດ ຕັ້ງໝໍ້ແທກນໍ້າເຂົ້າເຮືອນປະຊາຊົນ 710 ໜ່ວຍ, ຕິດຕັ້ງກັອກນໍ້າດັບເພີງຈຳນວນ 15 ໜ່ວຍ; ກໍ່ສ້າງຮ່ອງລະບາຍນໍ້າແຄມທາງຊະນິດເປີດ 666 ແມັດ ພ້ອມທັງຕິດຕັ້ງທໍ່ລອດທາງ, ປັບປຸງເສັ້ນທາງຈຳນວນ 8 ເສັ້ນ, ຍາວ 607 ແມັດ ແລະຈັດຊື້ວັດສະດຸຈຳນວນໜຶ່ງໃຫ້ຄອບຄົວທຸກຍາກເພື່ອສ້າງວີດຖ່າຍຈຳນວນ 34 ຄອບຄົວ ຮອດປະຈຸບັນນີ້ການກໍ່ສ້າງຄືບໜ້າແລ້ວ 13% ຂອງໜ້າວຽກທັງໝົດ.

  ໂຄງການກໍ່ສ້າງນໍ້າປະປາ ແລະສຸຂາພິບານເມືອງຊຳເໜືອຈະໃຊ້ເວລາ 36 ເດືອນໃຫ້ສຳເລັດເມື່ອໂຄງການນີ້ສຳເລັດຈະສາມາດຜະລິດນໍ້າໄດ້ 8,8 ພັນແມັດກ້ອນຕໍ່ມື້ ແລະຈະສາມາດສະໜອງນໍ້າໃຫ້ປະຊາຊົນ 12 ບ້ານເທດສະບານເມືອງຊຳເໜືອ ຊຶ່ງມີ 3.265 ຄອບຄົວຈະໄດ້ຊົມໃຊ້ນໍ້າປະປາ.

__________

ຂຽນໂດຍ: ງຸດ ວິໄລຄຳ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์