ນັກສຶກສາ 21 ຄົນທີ່ຜ່ານການຄັດເລືອກຈະມີພຽງ 5 ຄົນໄດ້ທຶນການສຶກສາ

  ນສພ ເສດຖະກິດ-ສັງຄົມ

   ວັນທີ 28 ມັງກອນ 2019 ທີ່ສະຖາບັນຝຣັ່ງນະຄອນຫຼວງວຽງຈັນພາຍໃຕ້ໂຄງການ“ທຶນການສຶກສາເພື່ອອະນາຄົດ” (Bourses d’Avenir), ໂດຍການໃຫ້ທຶນຮ່ວມກັນລະຫວ່າງສະຖານທູດຝຣັ່ງປະຈຳລາວ ແລະບໍລິສັດໄຟຟ້ານ້້ຳເທີນ 2 (NTPC), ໄດ້ມີການຕ້ອນຮັບນັກຮຽນຈໍານວນ 21 ຄົນຢູ່ທີ່ສະຖາ ບັນຝຣັ່ງຊຶ່ງນັກຮຽນເລົ່ານີ້ແມ່ນໄດ້ຜ່ານການຄັດເລືອກມາໃນຮອບທຳອິດທີ່ໄດ້ຈັດຂື້ນໃນວັນທີ 30 ພະຈິກ 2018 ທີ່ນະຄອນຫຼວງວຽງຈັນ, ແຂວງຫຼວງພະບາງ, ສະຫວັນນະເຂດ ແລະແຂວງຈຳປາສັກຊຶ່ງໄດ້ມີຊາວໜຸ່ມນັກຮຽນ-ນັກສຶກສາຜູ້ ທີ່ສົນໃຈລົງທະບຽນສອບເສັງທັງໝົດຫຼາຍກວ່າ 180 ຄົນ, ໃນນັ້ນຈະ ມີພຽງ 5 ຄົນທີ່ຈະໄດ້ຮັບທຶນການສຶກສາສຳລັບປີ 2019 ແລະປີ 2020.

   ປະຈຸບັນໂຄງການທີ່ໜ້າສົນໃຈດັ່ງກ່າວໄດ້ກາຍເປັນທີ່ຮູ້ຈັກກັນດີໃນໝູ່ນັກຮຽນ-ນັກສຶກສາເລີ່ມແຕ່ການສ້າງຕັ້ງໃນປີ 2015 ເປັນຕົ້ນມາ“ທຶນການສຶກສາເພື່ອອານາຄົດ” ໄດ້ສົ່ງເສີມການຝຶກອົບຮົມໃຫ້ແກ່ນັກສຶກສາລາວທີ່ໄປຮຽນຢູ່ທີ່ປະເທດຝຣັ່ງຈົນໄດ້ສຳເລັດການສຶກສາໄປແລ້ວ 8 ຄົນຊຶ່ງພວກເຂົາກໍ່ໄດ້ກາຍເປັນພະນັກງານເຕັກນິກຂອງ NTPC ໃນປະຈຸບັນ.

   ສຳລັບປີນີ້, ໃນຈຳນວນນັກຮຽນສາຍພາສາຝຣັ່ງທີ່ຜ່ານຮອບຄັດເລືອກຮອບທຳອິດທັງ 9 ຄົນຊຶ່ງສ່ວນໃຫຍ່ແມ່ນມາຈາກໂຮງຮຽນລະບົບສອງພາສາໃນນະຄອນຫຼວງວຽງຈັນ, ແຂວງຫຼວງພະບາງ ແລະແຂວງສະຫວັນນະເຂດ, ຈະມີພຽງ 3 ຄົນເທົ່ານັ້ນທີ່ຈະໄດ້ຮັບການຄັດເລືອກໃນຮອບສຸດທ້າຍທີ່ຈະມີຂຶ້ນໃນຕົ້ນເດືອນກຸມພາທີ່ຈະມາເຖິງນີ້ເພື່ອຈະເດີນທາງໄປປະເທດຝຣັ່ງໃນເດືອນກັນຍາ 2019. ພວກເຂົາຈະໄດ້ໄປສຶກສາເປັນເວລາ 2 ປີຢູ່ທີ່ມະຫາວິທະຍາໄລເຕັກໂນໂລຊີ (University Institutes of Technology) ຂອງປະເທດຝຣັ່ງຈາກນັ້ນພວກເຂົາຍັງສາມາດຮຽນຕໍ່ໄດ້ອີກ 1 ປີເພື່ອໃຫ້ບັນລຸເຖິງລະດັບປະລິນຍາຕີ.

   ໃນຂະນະດຽວກັນ, ນັກຮຽນອີກ 12 ຄົນທີ່ບໍ່ແມ່ນນັກຮຽນສາຍພາສາຝຣັ່ງຊຶ່ງສ່ວນໃຫຍ່ມາຈາກໂຮງຮຽນພອນສະຫວັນ ແລະຄະນະວິສະວະກຳສາດຂອງມະຫາວິທະຍາໄລແຫ່ງຊາດລາວແມ່ນຈະໄດ້ເຂົ້າຮຽນກຽມພາສາຝຣັ່ງຢູ່ທີ່ສະຖາບັນຝຣັ່ງເປັນເວລາໜຶ່ງປີເພື່ອທີ່ຈະເຂົ້າຮ່ວມໃນການຄັດເລືອກຄັ້ງຕໍ່ໄປກໍ່ຄືໃນປີ 2020.

   ໃນອາທິດນີ້ໄດ້ມີການຝຶກອົບຮົມຢ່າງເຂັ້ມຂຸ້ນໃຫ້ແກ່ນັກຮຽນທີ່ລໍຖ້າເພື່ອກຽມຄັດເລືອກເປັນນັກຮຽນທຶນສຳລັບປີ 2019 ຢູ່ທີ່ສະຖາບັນຝຣັ່ງ. ເພື່ອໃຫ້ຄວາມສຳຄັນຕໍ່ກັບການຝຶກອົບຮົມໃນຄັ້ງນີ້, NTPC ໄດ້ພົບປະກັບບັນດານັກຮຽນຜູ້ທີ່ຜ່ານການຄັດເລືອກໃນຮອບທຳອິດສຳລັບການໃຫ້ທຶນການສຶກສາ ທັງສອງຄັ້ງໃນຕໍ່ຫນ້າ ແລະແນະນຳໃຫ້ພວກເຂົາຮູ້ຈັກກັບບໍລິສັດ, ຄ່ານິຍົມຂອງບໍລິສັດ, ຄວາມຕ້ອງການດ້ານຊັບພະຍາກອນມະນຸດພ້ອມທັງສິ່ງອຳນວຍຄວາມສະດວກ ແລະອຸປະກອນຕ່າງໆຢູ່ພາກສະໜາມຂອງບໍລິສັດໄຟຟ້ານ້ຳເທີນ2.

   ໂດຍຜ່ານໂຄງການ“ທຶນການສຶກສາເພື່ອອານາຄົດ” (Bourses d’ Avenir),NTPC ແລະສະຖານທູດຝຣັ່ງປະຈຳລາວແນໃສ່ສ້າງຄວາມເຂັ້ມແຂງໃນການຮ່ວມມືກັບບັນດາໂຮງຮຽນ ແລະສະຖາບັນການສຶກສາຕ່າງໆຂອງລາວ ແລະຮ່ວມກັນປະກອບສ່ວນເຂົ້າໃນການສ້າງຊາວໜຸ່ມລາວໃຫ້ມີຄວາມອາດສາມາດໄປເລື້ອຍໆ.

แชร์