14 ບ້ານ ເມືອງຫົງສາ ມີຜົນເສຍຫາຍຈາກເຫດແຜ່ນດິນໄຫວ

  ເກີດເຫດແຜນດິນໄຫວຂອບເຂດ ສປປ ລາວ ຢູ່ເມືອງຫົງສາ ແຂວງໄຊຍະບູລີ ຈຳນວນ 33 ຄັ້ງໃນເວລາ 4-14 ໂມງ ຊຶ່ງມີຄວາມແຮງວັດແທກ 3,6-6,4 ຣິກເຕີ ເຫດການດັ່ງກ່າວໄດ້ຮັບຮູ້ການສັ່ນສະເທືອນໃນບັນດາແຂວງພາກເໜືອຈົນມາເຖິງນະຄອນຫຼວງວຽງຈັນ ພ້ອມນັ້ນຍັງໄດ້ສ້າງຄວາມເສຍຫາຍຫຼາຍຕໍ່ຊັບສິນຂອງປະຊາ ຊົນໃນເຂດດັ່ງກ່າວພໍສົມຄວນ.

ກົມອຸຕຸນິຍົມ ແລະອຸກະທົກສາດລາຍງານໃຫ້ຮູ້ວ່າ: ໃນຕອນເຊົ້າວັນທີ 21 ພະຈິກ 2019 ໄດ້ເກີດມີສະພາບ ແຜ່ນດິນໄຫວ18 ຄັ້ງ ຊຶ່ງຄັ້ງທີ 2 ມີ ຄວາມແຮງ 5,9 ຣິກເຕີ ໃນເວລາ 4:30, ຄັ້ງທີ 17 ມີຄວາມແຮງ 6,4 ຣິກເຕີ ເວລາ 6:50 ຊຶ່ງໄດ້ຮັບຮູ້ການສັ່ນສະເທືອນໃນ ບັນດາແຂວງພາກເໜືອຈົນເຖິງນະຄອນຫຼວງວຽງຈັນ ນອກນັ້ນໃນເວລາຕໍ່ມາຍັງມີເຫດການເກີດຂຶ້ນອີກຈຳນວນ 11 ຄັ້ງ ຊຶ່ງມີຄວາມແຮງສັ່ນສະເທືອນສູງສຸດເວລາ 8 ໂມງວັດ

  ແທກໄດ້ 4,8 ຣິກເຕີ, ຄວາມເລິກ 7 ກິໂລແມັດ ແລະເວລາ 10:30 ໂມງ ວັດແທກໄດ້ 3,6 ຣິກເຕີ, ຄວາມເລິກ 6 ກິໂລແມັດ ແລະຕົກມາຮອດຕອນບ່າຍຍັງໄດ້ເກີດເຫດແຜນດິນຂຶ້ນອີກຈຳນວນ 4 ຄັ້ງ ຊຶ່ງມີຄວາມແຮງສູງສຸດແມ່ນເວລາ 14 ໂມງ, ວັດແທກໄດ້ 4,1 ຣິກເຕີ, ຄວາມເລິກ 2 ກິໂລແມັດ.

ສະໜັບສະໜຸນໂດຍ: HONDA

  ຈາກເຫດການແຜນດິນໄຫວຄັ້ງນີ້ຊຶ່ງໄດ້ສ້າງຄວາມເສຍຫາຍເຮືອນຊານ ແລະຊັບສິນຂອງປະຊາຊົນເມືອງຫົງສາຫຼາຍພໍສົມຄວນຕາມການເກັບກຳຂໍ້ມູນຂອງ ຄະນະຮັບຜິດຊອບປ້ອງກັນ ແລະຄວບຄຸມໄພພິບັດຂັ້ນເມືອງໃນເບື້ອງຕົ້ນຕໍ່ກັບເຫດການດັ່ງກ່າວ ສະເພາະຢູ່ເຂດເມືອງຫົງສາມີຈຳນວນ 14 ບ້ານໄດ້ຮັບຜົນເສຍຫາຍ, ມີ89 ຫຼັງຄາເຮືອນ, ເສຍຫາຍສົມຄວນ 4 ຫຼັງຄາເຮືອນ, ປະຊາຊົນໄດ້ຮັບບາດເຈັບເລັກນ້ອຍ 7 ຄົນ, ຍິງ 5 ຄົນນອກນັ້ນຍັງມີວັດ 5 ແຫ່ງ, ໂຮງຮຽນ 3 ແຫ່ງ, ອາຄານ

ຂອງລັດຈຳນວນໜຶ່ງ, ຮ້ານບັນເທີງ, ຮ້ານຂາຍເຄື່ອງ,ຕະຫຼາດ ແລະໂຮງໝໍສຳລັບສະຖານທີ່ໄດ້ຮັບຄວາມເສຍຫາຍຕ່າງໆນັ້ນເປັນຕົ້ນແມ່ນຝາເພພັງ, ຝາແຕກແຫງ, ຫຼັງຄາກະ ເບື້ອງແຕກຫັກ,  ຕີນເສົາເນີ້ງອອກ, ຫົວ ເສົາແຕກ, ເຮັດໃຫ້ໄຟຟ້າດັບກະທັນຫັນໃນເຂດບໍລິເວນເທດສະບານເມືອງ ສ່ວນ ມູນຄ່າການເສຍຫາຍແມ່ນຍັງຢູ່ໃນຄະນະຮັບຊອບເກັບກຳສະຫຼຸບປະເມີນຜົນຕໍ່ກັບເຫດການດັ່ງກ່າວນີ້ປະຊາຊົນທີ່ຢູ່ໃນເຂດດັ່ງກ່າວຕ້ອງມີສະຕິລະມັດລະວັງຕົວຕໍ່ກັບເຫດການແຜ່ນດິນໄຫວ ແລະໃຫ້ຕິດຕາມຂ່າວສານຈາກກົມອຸຕຸນິຍົມ ແລະອຸທົກກະສາດເປັນແຕ່ລະໄລຍະ.

__________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์