ຫຼວງນໍ້າທາກຽມສະຫຼຸບການຈັດຕັ້ງປະຕິບັດກົດລະບຽບຂອງພັກ

  ເມື່ອວັນທີ 18 ພະຈິກ 2019 ນີ້ ທີ່ສະໂມສອນແຂວງຫຼວງນໍ້າທາໄດ້ຈັດກອງປະຊຸມເຜີຍແຜ່ແນະນໍາການກະກຽມສະຫຼຸບຕີລາຄາການຈັດຕັ້ງປະຕິບັດກົດລະບຽບຂອງພັກສະໄໝທີ X ຕິດພັນກັບການຊຸກຍູ້ສ້າງຂະບວນການແຂ່ງຂັນຮັກຊາດ, ສ້າງບ້ານພັດທະນາ ຜັນຂະຫຍາຍວຽກງານ 3 ສ້າງເຂົ້າສູ່ລວງເລິກໃນຂອບເຂດທົ່ແຂວງໂດຍການເປັນປະທານຂອງ ທ່ານ ເພັດຖາວອນ ວິລະວັນ ເລຂາພັກແຂວງເຈົ້າແຂວງໆຫຼວງນໍ້າທາ, ມີບັນດາກໍາມະການພັກແຂວງ, ຫົວໜ້າພະແນກ-ຮອງຫົວໜ້າພະແນກການອ້ອມຂ້າງແຂວງ, ເຈົ້າເມືອງ-ຮອງເຈົ້າ ເມືອງເຂົ້າຮ່ວມ.

 ໃນພິທີໄດ້ເຜີຍແຜ່ແນະນໍາການກະກຽມສະຫຼຸບຕີລາຄາການຈັດຕັ້ງປະຕິບັດກົດລະບຽບ ຂອງພັກສະໄໜທີ X ຕິດພັນກັບການຊຸກຍູ້ສ້າງຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງ ເຂົ້າສູ່ລວງເລິກໃນຂອບເຂດທົ່ວແຂວງ, ໄດ້ກໍານົດມາດຕະຖານວຽກງານຂອງຂະແໜງການເພື່ອຊ່ວຍສ້າງແຂວງເປັນຫົວໜ່ວຍຍຸດທະສາດ,ຊ່ວຍສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ, ໄດ້ປັບປຸງລະບອບກົນໄກໃນການຫັນພະນັກ ງານຈາກກະຊວງ-ອົງການຂັ້ນສູນກາງລົງຊ່ວຍຂັ້ນແຂວງ, ຈາກຂັ້ນແຂວງລົງຊ່ວຍຂັ້ນເມືອງ ແລະ ຈາກຂັ້ນເມືອງລົງຊ່ວຍຂັ້ນບ້ານເພື່ອໃຫ້ຂັ້ນເມືອງ ແລະ ຂັ້ນບ້ານມີພະນັກງານບໍລິການ ແລະ ຮັບໃຊ້ປະຊາຊົນຢ່າງພຽງພໍໂດຍສະເພາະແມ່ນພະນັກງານຜູ້ປູກ-ຜູ້ລ້ຽງໄດ້ມີການຊ່ວຍພະນັກງານກັບທີ່ຢູ່ຂັ້ນບ້ານກ່ຽວກັບການສ້າງບ້ານພັດທະນາຕາມ 4 ເນື້ອໃນ 4 ຄາດໝາຍ, ການສ້າງນາຍບ້ານໃຫ້ມີມາດຕະຖານສາມາດເປັນທັງຜູ້ນໍາພາຊ່ວຍບ້ານ, ເປັນທັງຜູ້ປົກຄອງບ້ານ ແລະ ເປັນທັງຜູ້ບໍລິຫານຮັບໃຊ້ຊາວບ້ານ.

  ການສຶກສາອົບຮົມດ້ານການເມືອງ-ແນວ ຄິດໃຫ້ປະຊາຊົນໄດ້ເສີມຂະຫຍາຍນໍ້າໃຈຮັກຊາດຕິດພັນກັບຮັກລະບອບປະຊາທິປະໄຕປະຊາຊົນ, ການສ້າງວຽກດີຄົນເດັ່ນໃນຂະບວນການພັດທະນາຢູ່ຂັ້ນບ້ານເພື່ອຕີລາຄາບຸກຄົນ, ຄອບຄົວ, ບ້ານພັດທະນາ, ກົມກອງລວມໝູ່ທີ່ມີຜົນງານດີເດັ່ນ, ເພື່ອເລືອກເຟັ້ນໃຫ້ໄດ້ຕົວແບບທີ່ຈະນໍາໄປເຜີຍແຜ່ຢ່າງກວ້າງຂວາງ ແລະ ປະຕິບັດນະໂຍບາຍຍ້ອງຍໍ, ສົ່ງເສີມຕໍ່ບຸກຄົນ-ຄອບຄົວ, ວິສາຫະກິດຂອງພາກສ່ວນຕ່າງໆໃນການພັດທະນາຊົນນະບົດ, ລຶບລ້າງຄວາມທຸກຍາກ, ສ້າງບ້ານພັດທະນາ, ຊຸກຍູ້ການຜະລິດເປັນສິນຄ້າ ແລະ ການບໍລິການສ້າງລາຍຮັບເຂົ້າຄອບຄົວ, ການສົ່ງເສີມການເຮັດກະເສດສຸມຍົກສະມັດຖະພາບ ແລະ ການກະສິກໍາສະອາດປອດສານພິດຕິດພັນກັບການຈັດຕັ້ງກຸ່ມການຜະລິດ ແລະເສດຖະກິດຮ່ວມມືຂອງປະຊາຊົນຕາມທິດຍືນຍົງ ແລະສີຂຽວ ແລະ ເສີມຂະຫຍາຍມູນເຊື້ອວັດທະນະທໍາ-ປະເພນີອັນດີງາມຂອງທ້ອງຖິ່ນ ແລະ ຂອງເຜົ່າ.

----------

ຂຽນໂດຍ: ມຸນຕີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์