ກອງປະຊຸມໃຫຍ່ຜູ້ແທນອົງຄະນະພັກເມືອງຄອບ ຄັ້ງທີ V

  ກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງຄອບ, ແຂວງໄຊຍະບູລີໄດ້ໄຂຂຶ້ນໃນລະຫວ່າງວັນທີ 20-21 ພະຈິກ 2019, ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ໂດຍການເປັນປະທານຂອງສະຫາຍ ແພງຊ້ອຍ ແພງເມືອງ ວ່າການເລຂາພັກເມືອງ, ວ່າການເຈົ້າເມືອງ-ເມືອງຄອບ, ເຂົ້າຮ່ວມເປັນກຽດມີ ສະຫາຍ ພົງສະ ຫວັນ ສິດທະວົງ ເລຂາຄະນະບໍລິຫານງານພັກແຂວງ, ເຈົ້າແຂວງໄຊຍະບູລີ, ມີຄະນະປະຈຳພັກແຂວງ, ກຳ ະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງປາກທາ, ແຂວງບໍ່ແກ້ວ ແລະບັນດາເມືອງອ້ອມຂ້າງເຂົ້າຮ່ວມ 150 ກວ່າສະຫາຍ.

  ສະຫາຍແພງຊ້ອຍ ແພງເມືອງ ກ່າວວ່າ: ກອງປະຊຸມຄັ້ງນີ້ຈະໄດ້ພ້ອມກັນທົບທວນຕີລາຄືນຜົນງານ ແລະ ໄຊຊະນະທີ່ຍາດມາໄດ້, ຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນໃນການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ມະຕິຜູ້ແທນອົງຄະນະພັກຄັ້ງທີ IV ໃນ 5 ປີຜ່ານມາ, ພ້ອມທັງກໍານົດທິດທາງຄາດ ໝາຍຍຸດທະສາດແຕ່ລະດ້ານໃນການປົກປັກຮັກສາ ແລະ ພັດທະນາເມືອງຄອບແຕ່ນີ້ຮອດປີ 2024, ກອງປະຊຸມຍັງຈະໄດ້ພ້ອມກັນຄົ້ນຄວ້າ ແລະ ຮັບຮອງເອົາບັນດາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກຄັ້ງທີ V, ຄັດເລືອກເອົາຄະນະບໍລິຫານງານພັກເມືອງຊຸດໃໝ່ເພື່ອສືບຕໍ່ຊີ້ນໍາໆພາເມືອງຄອບກ້າວຂຶ້ນຢ່າງບໍ່ຢຸດຢັ້ງດ້ວຍຜົນງານ ແລະ ຊະນະໃໝ່ຍິ່ງໃຫຍ່ກວ່າເກົ່າ.

ສະໜັບສະໜຸນໂດຍ: HONDA

  ໂອກາດດັ່ງກ່າວສະຫາຍແພງຊ້ອຍ ແພງເມືອງ ຍັງໄດ້ຜ່ານບົດລາຍງານການເມືອງທັງສອງພາກຊຶ່ງຍົກໃຫ້ເຫັນຜົນງານຈາກການຊີ້ນໍາໆພາຂອງອົງຄະນະພັກເມືອງຄອບໃນໄລຍະ 5 ປີທີ່ຜ່ານມາ 2015-2019,ໂດຍລວມເມືອງຄອບແມ່ນມີຄວາມສະຖຽນລະພາບທາງດ້ານການເມືອງ,ຮັບປະກັນຄວາມສະຫງົບໂດຍພື້ນຖານ, ເສດ ຖະກິດ-ສັງຄົມສືບຕໍ່ຂະຫຍາຍຕົວຕໍ່ເນື່ອງສະເລ່ຍໃນລະດັບ 10,04% ຕໍ່ປີ, ລວມຍອດລາຍຮັບພາຍໃນບັນລຸ 332,75 ຕື້ກີບ, ສະເລ່ຍຕໍ່ຫົວຄົນ 15,72 ລ້ານກີບ

ຫຼື ເທົ່າກັບ 1.996 ໂດລາສະຫະລັດ, ການຜະລິດກະສິກໍາເປັນ ສິນຄ້າໄດ້ເພີ່ມຂຶ້ນເປັນຕົ້ນແມ່ນ: ການປູກເຂົ້າ, ໝາກເດືອຍ ແລະ ອື່ນໆ, ການພັດທະນາພື້ນຖານໂຄງລ່າງເຊັ່ນ: ເສັ້ນທາງຄົມມະນາຄົມ, ໄຟຟ້າ, ນໍ້າປະປາ ແລະອື່ນໆໄດ້ຮັບການຍົກລະດັບດີຂຶ້ນ, ເປົ້າໝາຍການພັດທະນາແບບຍືນຍົງຂອງວຽກງານສຶກສາ, ສາທາ ລະນະສຸກສ່ວນໃຫຍ່ໄດ້ປະຕິບັດບັນລຸຕາມຄາດໝາຍ, ສາມາດປະກາດເປັນເມືອງຈົບຊັ້ນມັດທະຍົມຕອນຕົ້ນບໍາລຸງ, ຮັບຮອງເປັນບ້ານສາທາລະນະສຸກແບບຢ່າງ 25 ບ້ານ, ບ້ານ ແຮງງານ ແລະ ສະຫວັດດີການ-ສັງຄົມ 2 ບ້ານ, ບ້ານວັດທະນະທໍາ 23 ບ້ານ, ບ້ານພັດທະນາ 16 ບ້ານ, ບ້ານ ສາມັກຄີປອງດອງ 20 ບ້ານ, ສ້າງບ້ານໜັກແໜ້ນເຂັ້ມແຂງ 18 ບ້ານ ແລະ ໄດ້ສຸມໃສ່ແກ້ໄຂຄວາມທຸກຍາກຂອງ ປະຊາຊົນ, ປະຈຸບັນຄອບຄົວທຸກຍາກຍັງເຫຼືອ 30 ຄອບຄົວ, ເທົ່າກັບ 0,71%.

  ຈາກນັ້ນ ສະຫາຍ ສົມນຶກ ສິງຄໍາ ຄະນະປະຈໍາພັກເມືອງ, ຮອງເຈົ້າເມືອງໄດ້ຜ່ານຮ່າງແຜນພັດທະນະເສດຖະກິດ-ສັງຄົມ 5 ຜ່ານມາ ແລະ ທິດທາງແຜນການ 5 ປີຕໍ່ໜ້າ ( 2020-2024 ) ແລະໄດ້ຮັບຟັງການປະກອບຄໍາຄິດຄໍາເຫັນຂອງບັນດາຫ້ອງການ, ກົມກອງ ແລະ ຕົວແບບດ້ານຕ່າງໆ, ກອງປະຊຸມຍັງໄດ້ຮັບຟັງການໂອ້ລົມຂອງສະຫາຍເລຂາພັກແຂວງນຳອີກ.

__________

ຂຽນໂດຍ: ອຸ່ນເຮືອນ ໂພທິລັກ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์