ຄູ່ຮ່ວມເຈລະຈາອາຊຽນບວກສາມ ຫາລືວຽກປົກປ້ອງສັງຄົມ

  ກອງປະຊຸມເຈົ້າໜ້າທີ່ອາວຸໂສອາຊຽນບວກສາມຄັ້ງທີ 14 ຈັດຂຶ້ນໃນວັນທີ 20 ພະຈິກ 2019, ຢູ່ໂຮງແຮມດອນຈັນພາເລດ, ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ທິບພະສອນ ສຸຂະທໍາມະວົງ ຮອງຫົວໜ້າກົມແຜນການ ແລະການຮ່ວມມືສາກົນ, ຫົວໜ້າເຈົ້າໜ້າທີ່ອາວຸໂສສະຫວັດດີການສັງຄົມ ແລະການພັດທະນາອາຊຽນແຫ່ງ ສປປ ລາວ, ມີບັນດາຫົວໜ້າເຈົ້າໜ້າທີ່ອາວຸໂສຈາກປະເທດສະມາຊິກອາຊຽນ, ຜູ້ຕາງໜ້າກອງເລຂາອາຊຽນ ແລະ ຫົວໜ້າເຈົ້າໜ້າທີ່ອາວຸໂສສະຫວັດດີການສັງຄົມ ແລະ ການພັດທະນາອາຊຽນບວກສາມ (ສປ ຈີນ, ຍີ່ປຸ່ນ ແລະ ສ.ເກົາ ຫຼີ) ຄັ້ງທີ 6 ເຂົ້າຮ່ວມ.

  ກອງປະຊຸມຄັ້ງນີ້ແມ່ນເພື່ອປຶກສາຫາລືບັນຫາທີ່ຕິດພັນກັບການຮ່ວມມືເພື່ອຈັດຕັ້ງປະຕິບັດບັນດາກິດຈະກໍາຕ່າງໆກ່ຽວກັບວຽກສະຫວັດດີການສັງຄົມ ແລະການພັດ ທະນາອາຊຽນໂດຍສະເພາະການສ້າງຄວາມເຂັ້ມແຂງວຽກງານປົກປ້ອງສັງຄົມສໍາລັບເດັກດ້ອຍໂອກາດ, ພ້ອມກັນນັ້ນ, ຄະນະຜູ້ແທນເຂົ້າຮ່ວມກອງປະຊຸມຍັງໄດ້ແລກ ປ່ຽນບົດຮຽນກ່ຽວກັບຜົນສໍາເລັດໃນການຈັດຕັ້ງປະຕິບັດກິດຈະກໍາທີ່ເປັນແບບຢ່າງ, ການສ້າງຄວາມອາດສາມາດ, ບົດຮຽນທີ່ຖອດຖອນໄດ້ແລະການສະໜັບ ສະໜູນດ້ານງົບປະມານພາຍໃຕ້ຂອບການຮ່ວມມືອາຊຽນບວກສາມ, ນອກນີ້, ປະເທດຄູ່ຮ່ວມເຈລະຈາອາຊຽນບວກສາມຍັງມີຂໍ້ລິເລີ່ມ ການຮ່ວມມືວຽກງານໃນດ້ານຕ່າງໆທີ່ຕິດພັນກັບສະຫວັດດີການສັງຄົມ ແລະ ການພັດທະນາອາຊຽນ, ພ້ອມທັງໄດ້ແລກປ່ຽນຄຳຄິດຄຳເຫັນກ່ຽວກັບຄວາມຄືບໜ້າຂອງການຮ່ວມມືດ້ານສະຫວັດດີການສັງຄົມ ແລະ ການພັດທະນາໂດຍສະເພາະການສະຫຼຸບບັນດາໂຄງການທີ່ຢູ່ພາຍໃຕ້ແຜນການເຮັດວຽກໃນປະຈຸບັນ ແລະ ບັນດາຂົງເຂດທີ່ມີຄວາມສົນໃຈຮ່ວມກັນຊຶ່ງຈະໄດ້ລວມເຂົ້າໃນແຜນວຽກໃໝ່ໃນໄລຍະປີ 2021-2025.

ສະໜັບສະໜຸນໂດຍ: HONDA

 ນອກນັ້ນກອງປະຊຸມຍັງໄດ້ສັງລວມເອົາບັນຫາສໍາຄັນຕ່າງໆທີ່ກ່ຽວພັນກັບວຽກງານສະຫວັດດີການສັງຄົມ ແລະ ການພັດທະນາອາຊຽນເພື່ອນໍາສະເໜີໃນກອງປະຊຸມລັດຖະມົນຕີສະຫວັດດີການສັງຄົມ ແລະ ການພັດທະນາອາຊຽນບວກສາມຄັ້ງທີ 6 ທີ່ຈັດຂຶ້ນ ໃນວັນທີ 22 ພະຈິກນີ້.

----------------

ໜັງສືພີມເສດຖະກິດ-ສັງຄົມ

แชร์