ໄຄລີ ເຈນເນີ ຂາຍຮຸ້ນບໍລິສັດເຄື່ອງສຳອາງ ມູນຄ່າ 600 ລ້ານໂດລາ

  ໄຄລີ ເຈນເນີ ຜູ້ມີຊື່ສຽງໃນດ້ານນາງແບບ,ນັກສະແດງ,ນັກລົງທຶນ ແລະນັກສັງຄົມຄົນອາເມລິກາ ຊື່ດັງອາຍຸ 22 ປີ ເຈົ້າຂອງ ຍີ່ຫໍ້ ໄຄລີ ຄອສເມຕິກ ຂາຍຮຸ້ນບໍລິສັດ 51% ໃນມູນຄ່າ 600 ລ້ານ ໂດລາສະຫະລັດໃຫ້ກັບ ໂຄຕີ້ ບໍລິສັດເຄື່ອງສຳອາງໃນນະຄອນຫຼວງ ນີວຢອກ ທີ່ເປັນເຈົ້າຂອງຍີ່ຫໍ້ເຄື່ອງສຳອາງຫຼາຍຍີ່ຫໍ້ຢ່າງໃດກໍຕາມໃນ ສັນຍາຊື້ຂາຍດັ່ງກ່າວ ໄຄລີ ຈະຍັງເປັນຜູ້ອຳນວຍການດ້ານການສ້າງສັນຜະລິດຕະພັນຢູ່.

ທັງສອງບໍລິສັດກ່າວວ່າຄວາມຮ່ວມມືໃນຄັ້ງນີ້ຈະຊ່ວຍໃຫ້ ໄຄລິ ຄອສເມຕິກສາມາດຂະຫຍາຍສະຖານທີ່ການຂາຍໄປໃນລະດັບໂລກ ໄດ້ຫຼາຍຂຶ້ນລວມທັງຍັງເປີດໂອກາດໃຫ້ສິນຄ້າກ້າວເຂົ້າໄປໃນຜະລິດຕະພັນຄວາມງາມອື່ນໆ, ໄຄລີ ກ່າວວ່າຄວາມຮ່ວມມືໃນຄັ້ງນີ້ຈະຊ່ວຍໃຫ້ຂ້ອຍ ແລະທີມງານສາມາດເນັ້ນໜັກໃສ່ກັບການຜະລິດ ແລະພັດທະນາສີນຄ້າຂະນະດຽວ ກັນກໍຊ່ວຍສ້າງຍີ່ຫໍ້ໃຫ້ກາຍເປັນແຫຼ່ງລວບລວມຜະລິດຕະພັນລະດັບນານາຊາດ,ຂະນະທີ່ປະທານ ໂຄຕີ້ກ່າວວ່າການລວບລວມຄັ້ງນີ້ຈະຊ່ວຍເສີມໃຫ້ບໍລິສັດຂອງຕົນມີຄວາມເຂັ້ມແຂງຫຼາຍຂຶ້ນໃນສິນຄ້າທັງນໍ້າຫອມ,ເຄື່ອງສຳອາງ ແລະຄີມບໍາລຸງໂດຍສັນຍານີ້ຈະແລ້ວສຳເລັດໃນໄຕມາ 3 ປີ 2020, ທີ່ຜ່ານມາ ໄຄລີ ໃຊ້ຄວາມໂດ່ງດັງ ຂອງລາວໃນໂລກອອນລາຍເປັນ ເຄື່ອງມືໃນການເຮັດການຕະຫຼາດມາໂດຍຕະຫຼອດ ຊຶ່ງສົ່ງຜົນເຮັດ ໃຫ້ລາວເປັນມະຫາເສດຖີອາຍຸ ນ້ອຍທີ່ສຸດໃນໂລກປະຈຳປີ 2018 ດ້ວຍມູນຄ່າຊັບສິນສູງເຖິິງ 360 ລ້ານໂດລາ, ຂະນະທີ່ລາຍໄດ້ຈາກຍີ່ຫໍ້ເຄື່ອງສຳອາງຂອງລາວປີ 2018 ມີລາຍໄດ້ສູງເຖິງ 177 ລ້ານໂດລາ, ບໍ່ພຽງແຕ່ລາວມີອິດ ທິພົນກັບສິນຄ້າຂອງຕົນເອງ ໄຄລີ ຍັງມີອິດທິພົນຕໍ່ສິນຄ້າຍີ່ຫໍ້ອື່ນໆ ດ້ວຍຂະນະດຽວກັນການປະກາດຂາຍຮຸ້ນໃຫ້ກັບ ໂຄຕີ້ ກໍສົ່ງຜົນເຮັດໃຫ້ຮຸ້ນຂອງບໍລິສັດ ໂຄຕີ້ ເພີ່ມຂຶ້ນທັນທີເຖິງ 4%.

 -----------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 22/11/2019