ເທສະການຮູບເງົາເອີຣົບຄັ້ງທຳອິດໃນລາວ ຈະຈັດຂຶ້ນທ້າຍເດືອນນີ້

 

 ເມື່ອວັນທີ 19 ພະຈິກ 2019 ທີ່ນະຄອນຫຼວງວຽງຈັນ, ສະຫະພາບເອີຣົບປະຈຳ ສປປ ລາວ ຮ່ວມກັບບັນດາປະເທດສະມາຊິກເອີຣົບໄດ້ຖະແຫຼງການກ່ຽວກັບງານເທສະການຮູບເງົາເອີຣົບ ຄັ້ງທຳອິດໃນ ສປປ ລາວ ຊຶ່ງຈະຈັດຂຶ້ນໃນລະຫວ່າງວັນທີ 26-30 ພະຈິກ ທີ່ມາເຖິງນີ້.

 ທ່ານ ລີໂອ ຟາເບີ ເອກອັກຄະລັດຖະທູດສະຫະພາບເອີຣົບ ປະຈຳ ສປປ ລາວ ກ່າວວ່າ: ງານເທສະການຮູບເງົາເອີຣົບ ຈະເປັນພິທີ ແລະເຫດການສຳຄັນອັນໜຶ່ງຂອງສະຫະພາບເອີຣົບ ທີ່ໄດ້ຈັດຂຶ້ນຢູ່ ສປປ ລາວ, ງານຮູບເງົາ ຄັ້ງປະຖົມມະເລີກນີ້ຈະປະກອບດ້ວຍຮູບເງົາເອີຣົບຫຼາຍສິບເລື່ອງທີ່ສະທ້ອນໃຫ້ເຫັນເຖິງທັດສະນະທີ່ຫຼາກຫຼາຍ, ປະຫວັດສາດ ແລະວັດທະນະທຳໃນທົ່ວຂົງເຂດເອີຣົບ, ຊຶ່ງການສາຍຮູບເງົານີ້, ສະຫະພາບເອີຣົບ ຈະນຳສະເໜີຮູບເງົາຫຼາກຫຼາຍເລື່ອງທີ່ໄດ້ຮັບລາງວັນຫຼາຍລາຍການເພື່ອໃຫ້ຄົນລາວໄດ້ຮັບຊົມ ແລະເຊື່ອວ່າບໍ່ເຄີຍເຫັນມາກ່ອນໃນນະຄອນຫຼວງວຽງຈັນ ແນ່ນອນຊຶ່ງທຸກຄົນສາມາດເຂົ້າຮ່ວມງານດັ່ງກ່າວໂດຍບໍ່ເສຍຄ່າ.

ສະໜັບສະໜຸນໂດຍ: HONDA

  ງານເທສະການຮູບເງົາຄັ້ງນີ້ຈະເລີ່ມຈັດຂຶ້ນແຕ່ວັນທີ 26 ພະຈິກ ເປັນຕົ້ນໄປຢູ່ຫ້ອງການສະຖານເອກອັກຄະລັດຖະທູດສະຫະພາບເອີຣົບປະຈຳ ສປປ ລາວ, ຕາມດ້ວຍການສາຍຮູບເງົາທີ່ສະຖາບັນຝຣັ່ງໃນລະຫວ່າງວັນທີ 27-28 ພະຈິກ ຢູ່ສະຖານເອກອັກຄະລັດຖະທູດອັງກິດ ແລະຢູ່ແຄມຂອງເຂດສວນເຈົ້າອານຸວົງໃນວັນທີ 29-30 ພະຈິກ.

  ທ່ານ ລີໂອ ຟາເບີ ຍັງໃຫ້ຮູ້ອີກວ່າ: ຄຽງຄູ່ກັບງານເທສະການຮູບເງົາ, ຍັງຈະມີງານເທສະການອາຫານເອີຣົບຄັ້ງທີ 8 ອີກຊຶ່ງຈະຈັດຂຶ້ນໃນລະຫວ່າງວັນທີ 29-30 ພະຈິກທີ່ແຄມຂອງເຊັ່ນດຽວກັນໂດຍຈະເລີ່ມຕັ້ງແຕ່ເວລາ 11:00 ໂມງ-22:00 ໂມງ, ພາຍໃນງານຈະມີຜູ້ປະກອບການດ້ານອາຫານທີ່ມີຊື່ສຽງຫຼາຍສິບຮ້ານທີ່ເດີນທາງມາຈາກປະເທດຝຣັ່ງ, ແອັດສະປາຍ, ອີຕາລີ, ເຢຍລະມັນ, ເບວຢ້ຽມ ແລະຣັດເຊຍ ເຂົ້າຮ່ວມງານນໍາອີກ, ຊຶ່ງທ່ານສາມາດທ່ຽວຊົມຊິມຣົດຊາດອາຫານທີ່ແຊບ ແລະໜ້າປະທັບໃຈໃນລາຄາທີ່ສະບາຍກະເປົ໋າ.

------------

 ໜັງສືພິມເສດຖະກິດ-ສັງຄົມ

แชร์