ເປີດການແຂ່ງຂັນກີລາຊີງຂັນເຈົ້າແຂວງຫຼວງນໍ້າທາ

  ວັນທີ 19 ພະຈິກ ຜ່ານມາຢູ່ສະໜາມກີລາໃໝ່ຂອງແຂວງຫຼວງນໍ້າທາ, ພະແນກສຶກສາທິການ ແລະກີລາໄດ້ເປີດການແຂ່ງຂັນກີລາບານເຕະຊີງຂັນທ່ານເຈົ້າແຂວງປະຈໍາປີ 2019, ໂດຍການເຂົ້າຮ່ວມຂອງທ່ານ ບຸນຈັນ ຫຼວງລືໄຊ ຫົວໜ້າພະແນກສຶກສາທິການ ແລະກີລາແຂວງ, ທ່ານ ທອງແດງ ສິດທິສົນ ສະມາຊີກສະພາປະຊາ ຊົນແຂວງ, ປະທານສະຫະພັນບານເຕະແຂວງ, ມີຫົວໜ້າ-ຮອງຫົວ ໜ້າພະແນກອອ້ມຂ້າງແຂວງ, ກຳມະການ, ຄູຝຶກຕະຫຼອດຮອດນັກກີລາເຂົ້າຮ່ວມ.

  ພະແນກສຶກສາທິການ ແລະກີລາສົມທົບກັບສະຫະພັນບານເຕະແຂວງໄດ້ຈັດການແຂ່ງຂັນກີລາບານເຕະລຸ້ນທົ່ວໄປເພື່ອເປັນການຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 44 ປີ ແລະວັນຄ້າຍວັນເກີດທ່ານປະທານໄກສອນພົມວິຫານ ຜູ້ນໍາທີ່ແສນເຄົາລົບຮັກ, ທັງເປັນການຄັດເລືອກເອົານັກກີລາເຂົ້າຮ່ວມງານມະຫາກຳກີລາແຫ່ງ ຊາດທີ່ຈະຈັດຂຶ້ນຢູ່ແຂວງ ຊຽງຂວາງ ໃນຕົ້ນປີ 2020 ທີ່ຈະມາເຖິງນີ້, ການແຂ່ງຂັນບານເຕະໃນ ຄັ້ງນີ້ມີທີມເຂົ້າຮວ່ມແຂ່ງຂັນ 12 ທີມ, ໄດ້ແບ່ງອອກເປັນ 4 ສາຍ, ຄັດເອົາທີ 1 ແລະທີ 2 ຂອງແຕ່ລະກຸ່ມເຂົ້າຮອບຕໍ່ໄປຊຶ່ງໄດ້ເລີ່ມການແຂ່ງຂັນແຕ່ວັນທີ 4 ພະຈິກ ເຖິງວັນທີ 2 ທັນວາ ຈຶ່ງຈະສໍາເລັດ.

  ການແຂ່ງຂັນກີລາບານເຕະຊີງຂັນທ່ານເຈົ້າແຂວງຫຼວງນໍ້າທາປະຈໍາປີ 2019 ໃນຄັ້ງນີ້ປະເພດລາງວັນມີຄື: ລາງວັນທີ 1 ໄດ້ຮັບຂັນເງິິນ 1 ໜວ່ຍ, ຫຼຽນຄຳພ້ອມດ້ວຍເງິນສົດ 5 ລ້ານກີບ, ທີ 2 ໄດ້ຮັບຫຼຽນເງິນພ້ອມດ້ວຍເງິນສົດ 4 ລ້ານກີບ , ທີ 3 ໄດ້ຮັບຫຼຽນທອງພ້ອມດ້ວຍເງິນສົດ 3 ລ້ານກີບ ແລະລາງວັນທີ 4 ແມ່ນລາງວັນຊົມເຊີຍໄດ້ຮັບເງິນສົດ 2 ລ້ານກີບ.

------------------

ໜັງສືພິມເສດຖະກິດ-ສັງຄົມ

แชร์