ສາລະວັນທຳລາຍສິນຄ້າຜິດກົດໝາຍຫຼາຍລາຍການ

  ພາຍຫຼັງເຈົ້າໜ້າທີ່ໆກ່ຽວຂ້ອງຂອງແຂວງສາລະວັນໄດ້ລົງເຄື່ອນໄຫວກວດກາສິນຄ້າປະເພດຕ່າງໆທີ່ຈຳໜ່າຍຕາມທ້ອງຕະຫຼາດເພື່ອປ້ອງກັນຜູ້ອຸປະໂພກ ແລະບໍລິ ໂພກ, ຊຶ່ງສາມາດກວດພົບເຫັນໝົດອາຍຸ, ເສື່ອມຄຸນນະພາບ ແລະຈຳໜ່າຍນອກລະບົບ, ທັງໄດ້ກັກຢຶດສິນຄ້າຈຳນວນ 7 ລາຍການມູນຄ່າຫຼາຍກວ່າ 10 ລ້ານກີບ.

 ທ່ານ ສຸກໄຊ ຈັນທະນາຄອນ ຫົວໜ້າຂະແໜງການຄ້າພາຍໃນພະແນກອຸດສາຫະກຳ ແລະ ການຄ້າແຂວງໃຫ້ຮູ້ວ່າ: ສິນຄ້າທີ່ນຳມາທຳລາຍໃນຄັ້ງນີ້ຊຶ່ງເຈົ້າໜ້າທີ່ພະ ແນກອຸດສາຫະກໍາ ແລະ ການຄ້າຮ່ວມກັບພາກສ່ວນທີ່ກ່ຽວຂ້ອງໄດ້ລົງກວດກາຕາມທ້ອງຕະຫຼາດ, ຮ້ານຄ້າ ແລະ ສະຖານທີ່ຈຳໜ່າຍຂອບເຂດທົ່ວແຂວງໄດ້ກວດພົບເຫັນ ແລະຮ່ວມກັນກັກຢຶດ ສິນຄ້າທີ່ໝົດອາຍຸ, ເສື່ອມຄຸນນະພາບ ແລະສິນຄ້າຈຳໜ່າຍນອກລະບົບທີ່ວາງຂາຍໃນຕະຫຼາດຈຳນວນ 47 ຮ້ານ, ກວດພົບເຫັນ ແລະກັກຢຶດໄດ້ 7 ລາຍການຄື: ສິນຄ້າປະເພດຈານດາວທຽມ ແລະ ຊິ້ນສ່ວນຂອງຈານທີ່ນຳເຂົ້ານອກລະບົບຈຳນວນ 243 ກ່ອງໃບກັບມູນຄ່າ 14 ລ້ານກວ່າກີບ, ສິນຄ້າປະ ເພດເຂົ້າໜົມ ມີ 196 ແຟັກ ມູນຄ່າ 1 ລ້ານກວ່າກີບ, ອາຫານ ແລະເຄື່ອງດື່ມຈຳນວນ 671 ຖົງຕໍ່ປ໋ອງ ມູນຄ່າ 8 ລ້ານກວ່າກີບ, ເຄື່ອງສຳອາງຈຳນວນ 255 ກັບ ມູນຄ່າ 4 ລ້ານກວ່າກີບ, ສິນຄ້າປະເພດຢາສູບຈຳນວນ 6 ຕຸດ ແລະຊິ້ນສ່ວນສັດ (ແຊ່ແຂງ) ທີ່ມີສານປົນເປື້ອນເກີນຄ່າມາດຕະຖານຈຳນວນ 358.9 ກິໂລ ມູນຄ່າ 6 ແສນກວ່າກີບ.

  ນອກນີ້ຍັງໄດ້ນຳເອົາສິນຄ້າຫ້າມຈຳໜ່າຍທີ່ໄດ້ກັກຢຶດໃນສົກປີຜ່ານມາທຳລາຍຮ່ວມກັນເປັນຕົ້ນ: ຈັກສະຕິນ, ຊິ້ນສ່ວນຂອງຈັກ ແລະອາໄຫຼ່ຈຳນວນ 274 ຊິ້ນສ່ວນ ມູນ ຄ່າ 101 ລ້ານກວ່າກີບລວມມູນຄ່າການທຳລາຍປະເພດສິນຄ້າດັ່ງກ່າວນີ້  116 ລ້ານກວ່າກີບ.

  ນອກຈາກການກັກຢຶດແລ້ວຍັງໄດ້ປຸກລະດົມພໍ່ຄ້າຊາວຂາຍໃຫ້ຜູ້ປະກອບຕ້ອງເຄົາລົບລະບຽບກົດໝາຍແນໃສ່ສົ່ງເສີມ ແລະປົກປ້ອງບັນດາຫົວໜ່ວຍທຸລະກິດການຄ້າທີ່ເຄື່ອນໄຫວຢ່າງຖືກຕ້ອງ, ສອດຄ່ອງກັບລະບຽບກົດໝາຍໃຫ້ເປັນໄປຕາມກົນໄກເສດຖະກິດຕະຫຼາດທີ່ມີການດັດສົມຂອງລັດສົ່ງເສີມການຜະລິດສິນຄ້າ ແລະປົກປ້ອງສິດຜົນປະໂຫຍດຂອງຜູ້ຊົມໃຊ້.

ສະໜັບສະໜຸນໂດຍ: HONDA

  ພິທີທຳລາຍສິນຄ້າດັ່ງກ່າວໄດ້ຈັດຂຶ້ນໃນວັນທີ 20 ພະຈິກ 2019 ທີ່ເດີ່ນບິນແຂວງສາລະວັນ, ເຂົ້າຮ່ວມມີທ່ານ ບຸນຊູ ລັດສະໝີ ຮັກສາການຫົວໜ້າພະແນກອຸດ ສາຫະກຳ ແລະການຄ້າ, ທ່ານ ສົມຄິດ ວົງສາລີ ຕາງໜ້າຫ້ອງວ່າການປົກຄອງແຂວງພ້ອມດ້ວຍແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງ, ພະນັກງານວິຊາການ ແລະຜູ້ປະກອບການຈຳນວນໜຶ່ງເຂົ້າຮ່ວມ.

___________

ຂຽນໂດຍ: ທິດລານີ ໂຄດໂຍທາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์