ຕາດຫ້ວຍນໍ້າແກ້ວ ແຫຼ່ງທ່ອງທ່ຽວທາງທໍາມະຊາດ

  ຕາດຫ້ວຍນໍ້າແກ້ວ ຖືເປັນສະຖານທີ່ທ່ອງທ່ຽວທາງທໍາມະຊາດອີກແຫ່ງໜຶ່ງຂອງເມືອງລອງທີ່ໄດ້ຮັບຄວາມສົນໃຈໂດຍການໄປທ່ຽວຊົມຂອງບັນດານັກທ່ອງທ່ຽວທັງພາຍໃນ ແລະຕ່າງປະເທດເປັນຈໍານວນຫຼວງຫຼາຍໃນແຕ່ລະວັນໂດຍສະເພາະວັນພັກການ ແລະວັດເທສະການຕ່າງໆ ເນື່ອງຈາກວ່າເປັນຕາດທີ່ມີຄວາມສວຍງາມ ຕະການຕາຍາມເມື່ອພົບເຫັນ, ອຸດົມສົມບູນໄປດ້ວຍຜືນປ່ານາໆຊະນິດຂຽວກະຈີອັນມີອາກາດສົດຊື່ນບໍລິສຸດ.

  ຊຶ່ງເໝາະສົມທີ່ສຸດໃນການຍ່າງທ່ຽວຊົມທໍາມະຊາດອາກາດບໍລິສຸດຍິ່ງຍາມອາກາດແບບນີ້ຖ້າໄດ້ສໍາຜັດຄືຈະເຢັນສະບາຍຄາຍຄຽດໄດ້ເປັນຢ່າງດີຄວາມອຸດົມສົມບູນດ້ານທໍາມະຊາດ, ອາກາດທີ່ແສນບໍລິສຸດຂອງຕາດດັ່ງກ່າວໄດ້ສ້າງແຮງຈູງໃຈແກ່ບັນດານັກທ່ອງທ່ຽວທັງພາຍໃນ ແລະຕ່າງປະເທດໃຫ້ເດີນທາງມາທ່ຽວຊົມຢ່າງຫຼວງຫຼາຍໃນແຕ່ລະປີ ແລະມີບາດກ້າວເພີ່ມຂຶ້ນເລື້ອຍໆ.

 ຕາມການບອກເລົ່າຂອງຊາວບ້ານໃຫ້ຮູ້ວ່າແຕ່ກ່ອນມີພະຍາຕົນໜຶ່ງສ້າງພະທາດຢູ່ໄກ້ຄຽງບໍລິເວນດັ່ງກ່າວໂດຍບັນຈຸແກ້ວໃສ່ໃນທາດ ແລະເອີ້ນກັນວ່າຕາດນໍ້າພະແກ້ວ, ແຕ່ປະຈຸບັນໄດ້ປ່ຽນຊື່ຈາກຕາດນໍ້າພະແກ້ວມາເປັນຕາດຫ້ວຍນໍ້າແກ້ວຊຶ່ງສະຖານທີ່ດັ່ງກ່າວແມ່ນຕັ້ງຢູ່ທິດໃຕ້ຂອງບ້ານປ່າຄາມີໄລຍະຫ່າງຈາກເທດສະບານເມືອງລອງປະມານ 6 ກິໂລແມັດ.

------------------

ພາບ ແລະ ຂ່າວຈາກ: ໜັງສືພິມເສດຖະກິດ-ສັງຄົມ

• 21/11/2019