ມະຫະກຳບຸນຊ້າງໄຊຍະປີ 2020 ຈະມີຊ້າງເຂົ້າຮ່ວມ 71 ໂຕ

  ສຳລັບການຈັດງານມະຫະກຳບຸນຊ້າງໄຊຍະບູລີໃນປີ 2020 ນີ້ຖືວ່າເປັນຄັ້ງທີ 14 ຊຶ່ງຈະປະກອບມີກິດຈະກຳຕ່າງໆເພື່ອໃຫ້ບັນດາຜູ້ມາທ່ຽວຊົມໂດຍສະເພາະການວາງສະແດງ ແລະ ຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນສິນຄ້າກະສິກຳ, ຫັດຖະກຳ, ອຸດສາຫະກຳປຸງແຕ່ງທີ່ເປັນເອກະລັກຂອງທ້ອງຖິ່ນພາຍໃນແຂວງຕ່າງແຂວງ ແລະສິນຄ້າຕ່າງໆ ຈາກປະເທດໃກ້ຄຽງ.

  ທ່ານ ຍັນຍົງ ສີປະເສີດ ຮອງເລຂາ ພັກແຂວງຮອງເຈົ້າແຂວງທັງເປັນປະທານຈັດງານມະຫະກຳບຸນຊ້າງແຂວງໄຊຍະບູລີເປັນຜູ້ຖະແຫຼງວ່າ:

  ງານດັ່ງກ່າວຈະເລີ່ມເປີດໃຫ້ບໍລິການເລີ່ມແຕ່ວັນທີ 18 ກຸມພາ 2020 ເປັນຕົ້ນໄປ ແລະໃນວັນທີ 21 ກຸມພາ ໄດ້ຈັດພິທີເຮັດບຸນຕັກບາດອຸທິດກຸສົນໃຫ້ຊ້າງສໍາລັບພິທີເປີດເປັນທາງການແມ່ນຈະໄດ້ຈັດຂຶ້ນ ໃນວັນທີ 22 ກຸມພາ ເປັນຕົ້ນໄປຈົນເຖິງວັນທີ 28 ກຸມພາ 2020 ໂດຍຈະມີຊ້າງເຂົ້າຮ່ວມທັງໝົດ 71 ໂຕ ຊຶ່ງມີຄວາມໝາຍ ແລະມີຄວາມຜູກພັນກັບວັນສ້າງຕັ້ງກອງທັບປະຊາຊົນລາວຄົບຮອບ 71 ປີ.

ສະໜັບສະໜຸນໂດຍ: HONDA

  ພິເສດປີນີ້ມີຊ້າງເຜືອກເຂົ້າຮ່ວມຊຶ່ງເປັນຊ້າງມິ່ງຂວັນທີ່ຄູ່ບ້ານຄູ່ເມືອງຂອງຊາດລາວເຮົາສ່ວນກິດຈະກຳຫຼັກໃນງານມະຫະກຳບຸນຊ້າງປີ2020 ແມ່ນຈະເນັ້ນໜັກກິດ ຈະກຳທີ່ຕິດພັນກັບຊ້າງ ແລະການອະນຸລັກຊ້າງໂດຍສະເພາະແມ່ນການສະແດງຂອງຊ້າງຄຳຮູ້, ພິທີບາສີສູ່ຂວັນຊ້າງ, ການໃຫ້ອາຫານຊ້າງ, ຂີ່ຊ້າງຊົມເມືອງ ແລະກິດຈະກຳອື່ນໆອີກ.

  ພ້ອມນັ້ນໃນແຕ່ລະວັນໄລຍະການຈັດງານແມ່ນຈະຈັດໃຫ້ມີກິດຈະກໍາທ່ອງທ່ຽວແຫຼ່ງທໍາມະຊາດທີ່ສວຍງາມ, ວັດທະນະທໍາຂອງປະຊາຊົນ 8 ເຜົ່າທີ່ເປັນເອກະລັກຂອງຊາວແຂວງໄຊຍະບູລີ ໃນຄໍ່າຄືນຈັດໃຫ້ມີການຄົບງັນ, ການສະແດງຄອນເສີດສີລະປະວັນນະຄະດີຂອງພາກສ່ວນຕ່າງໆ, ແຂວງໄຊຍະບູລີເປັນແຂວງໜຶ່ງຕັ້ງຢູ່ພາກເໜືອຂອງ ສປປ ລາວມີເສັ້ນທາງຄົມມະນາຄົມທີ່ສະດວກໃນການເຊື່ອມຕໍ່ກັບບັນດາແຂວງຕ່າງໆ ແລະສາມາດເຊື່ອມຕໍ່ກັບປະເທດໃກ້ຄຽງ ແລະອານຸພາກພື້ນທີ່ສໍາຄັນ, ມີປ່າສະຫງວນແຫ່ງຊາດທີ່ອຸດົມສົມບູນໄປດ້ວຍຊີວະນາໆພັນ ແລະເປັນແຂວງດຽວທີ່ມີປະຊາກອນຊ້າງຫຼາຍກວ່າໝູ່ຖ້າທຽບໃສ່ກັບແຂວງອື່ນໆຂອງລາວ.

  ດ້ວຍເຫດນີ້ເພື່ອເປັນການອະນຸລັກຮັກສາຊ້າງບໍ່ໃຫ້ສູນພັນ ແລະທັງເປັນການສືບຕໍ່ປົກປັກຮັກສາວັດທະນະທໍາຮີດຄອງປະເພນີອັນດີງາມ, ວິຖີການດໍາລົງຊີວິດຂອງປະຊາຊົນລາວບັນດາເຜົ່າທີ່ຕິດພັນກັບຊ້າງມາແຕ່ອາດີດຕະການໃຫ້ຍືນຍົງຄົງຕົວ ແລະຢູ່ກັບປະຊາຊົນລາວເວົ້າສະເພາະປະຊາຊົນຊາວແຂວງໄຊຍະບູລີ ຈຶ່ງໄດ້ພ້ອມພຽງກັນຈັດງານມະຫະກໍາບຸນຊ້າງຂຶ້ນໃນແຕ່ລະປີດັ່ງນັ້ນຂໍເຊີນຊວນບັນດາແຂກທ່ານຍິງທ່ານຊາຍ, ນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວຊົມງານມະຫະ ກໍາບຸນຊ້າງຢູ່ແຂວງໄຊຍະບູລີຂອງພວກເຮົາແລ້ວບັນດາທ່ານຈະບໍ່ຜິດຫວັງ.

__________

ຂຽນໂດຍ: ບຸນທີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์