ເປີດໂຄງການຕັ້ງຄ້າຍງານແກະສະຫຼັກປະຈຳຊາດ

  ວັນທີ 18 ພະຈິກ 2019 ທີ່ສະຖາບັນວິຈິດສິນແຫ່ງຊາດໄດ້ເປີດສຳມະນາໂຄງການຄ້າຍງານແກະສະຫຼັກປະຈຳຊາດໂດຍເຂົ້າຮ່ວມທ່ານ ໄມສິງ ຈັນບຸດດີ ຜູ້ອຳນວຍ ການສະຖາບັນວິຈິດສິນແຫ່ງຊາດ, ທ່ານ ຄຳພູ ເພຍສັກຂາ ຮອງຫົວໜ້າກົມຮ່ວມມືສາກົນກະຊວງຖະແຫຼ່ງຂ່າວ, ວັດທະນະທຳ ແລະທ່ອງທ່ຽວບັນດາແຂກພາກສ່ວນກ່ຽວຂ້ອງ ແລະຄູ-ອາຈານ, ນັກສຶກສາວິຈິດສິນອາຊຽນເຂົ້າຮ່ວມ.

ສະໜັບສະໜຸນໂດຍ: HONDA

  ທ່ານ ຄຳພູ ເພຍສັກຂາໄດ້ກ່າວໃນວ່າ:ສຳມະນາຄັ້ງນີ້ຈະດຳເນີນເປັນເວລາ 3 ວັນ ແມ່ນພາກສ່ວນໜຶ່ງຂອງກິດຈະກຳພາຍໃຕ້ການກວດກາຂອງຄະນະກຳມາທິການວັດທະນະທຳ ແລະຂໍ້ມູນຂ່າວສານອາຊຽນ (COCI) ທີ່ໄດ້ຮັບທຶນສະໜັບສະໜູນຈາກກອງທຶນວັດທະນະທຳອາຊຽນຊຶ່ງມັນຈະເຮັດໃຫ້ການປະກອບສ່ວນ ແລະຄວາມພະຍາຍາມທີ່ສຳຄັນໃນການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ກໍ່ຄືແຜນງານ ASCC, ໂດຍສະເພາະແຜນຍຸດທະສາດດ້ານວັດທະນະທຳ ແລະສິລະປະອາຊຽນ 2016-2025 ສຳລັບໂຄງການຕັ້ງຄ້າຍງານແກະສະຫຼັກເອກະລັກປະຈຳຊາດຂອງບັນດານັກຮຽນວິຈິດສິນອາຊຽນມີຈຸດປະສົງເພື່ອສົ່ງເສີມຊາວໜຸ່ມມີຄວາມຮູ້ ຄວາມເຂົ້າໃຈກ່ຽວກັບອາຊຽນ ຫຼາຍຂຶ້ນ ແລະຮ່ວມມືກັນປົກປ້ອງ, ປົກປັກຮັກສາ ແລະສົ່ງເສີມຄວາມຫຼາກຫຼາຍດ້ານວັດທະນະທຳໃນພາກພື້ນໃຫ້ມີຄວາມຍືນຍົງໃຫ້ລຸ້ນໜຸ່ມຂອງພວກເຮົາ,ຊຶ່ງມັນມີຄວາມຈຳເປັນທີ່ຈະຕ້ອງດຳເນີນກິດຈະກຳໃນການສົ່ງເສີມການແບ່ງປັນ ແລະແລກປ່ຽນປະສົບການ ແລະ ຄວາມຮູ້ຕົວຈິງໂດຍສະເພາະກ່ຽວກັບວິທີການແກະສະຫຼັກຈາກໄມ້ທີ່ເປັນເອກະລັກຂອງຊາດຂອງເຂົາເຈົ້າທີ່ຖືກຄັດເລືອກຈາກປະເທດສະມາຊິກອາຊຽນ.

  ຈຸດປະສົງເພື່ອເປັນການພົວພັນຮ່ວມມືທາງດ້ານສິລະປະວັດທະນະທຳ ແລະດ້ານວິຈິດສິນທັງເປັນໂອກາດໃຫ້ນັກຮຽນວິຈິດສິນຂອງລາວໄດ້ສ້າງເຄືອຂ່າຍດ້ານວິຈິດສິນກັບບັນດາມະຫາວິທະຍາໄລປະເທດອາຊຽນ, ຊຶ່ງຈະໄດ້ຊ່ວຍເຫຼືອເຊິ່ງກັນ ແລະກັນພ້ອມກັນພັດທະນາສະຖາບັນການສຶກສາວິຈິດສິນໃຫ້ມີຄວາມກ້າວໜ້າຍັບເຂົ້າໃກ້ໃນລະດັບມາດຕະຖານສາກົນ.

--------------------

ພາບ ແລະ ຂ່າວຈາກ: ໜັງສືພິມເສດຖະກິດ-ສັງຄົມ

แชร์