ວຽງຈັນ ກັກຕົວເປົ້າໝາຍພົບຢາບ້າ 66 ພັນເມັດ

  ວັນທີ 10 ກັນຍາຜ່ານມາເຈົ້າໜ້າທີ່ຕໍາຫຼວດພະແນກສະກັດກັ້ນ ແລະຕ້ານຢາເສບຕິດ ປກສ ແຂວງວຽງຈັນ ໄດ້ເຄື່ອນໄຫວວຽກງານວິຊາສະເພາະລົງຕິດຕາມເປົ້າ ໝາຍຊື້-ຂາຍຢາເສບຕິດຢູ່ຂອບເຂດເມືອງໝື່ນຈາກນັ້ນຈຶ່ງໄດ້ລົງຕິດຕາມເປົ້າໝາຍເຫັນວ່າມີມູນຄວາມຈິງໃນທີສຸດກໍ່ສາມາດຈັບຕົວເປົ້າໝາຍໄດ້ 2 ຄົນຄື: ທ້າວ ຕົ່ງກູ້ວ່າງ ອາຍຸ 43 ປີ, ປະຊາຊົນ, ບ້ານນາປ່າໄຜ່, ທ້າວ ຈາວື່ ຫຼື ຊົງວ່າງ ອາຍຸ 32 ປີ ກໍາມະກອນ, ບ້ານນາຍາວ ທັງສອງຢູ່ເມືອງໝື່ນພ້ອມທັງກວດພົບເຫັນຂອງກາງຢາບ້າຈໍານວນ 33 ມັດ ເທົ່າກັບ 66 ພັນເມັດ ແລະປືນສັ້ນ ຍີ່ຫໍ້ GOOK 19 ຈໍານວນ 1 ກະບອກ ພ້ອມດ້ວຍລູກປືນ 14 ລູກ ແລະລົດຈັກ 1 ຄັນ ມາທໍາການສືບ ສວນ-ສອບສວນ.

  ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດໃນເບື້ອງຕົ້ນພວກກ່ຽວໄດ້ໃຫ້ການຮັບສາລະພາບວ່າ: ຢາບ້າຈໍານວນ 66 ພັນເມັດແມ່ນເປັນຂອງພວກກ່ຽວແທ້ ຊຶ່ງໄດ້ຊື້ນໍາຄົນບໍ່ຊາບຊື່ບໍ່ຮູ້ບ້ານມາສົ່ງໃຫ້ຢູ່ເຮືອນ ທ້າວ ຕົ່ງກູ້ວ່າງ ໃນລາຄາ138,6 ລ້ານກີບ ຈຸດປະສົງແມ່ນຈະເອົາໄປຂາຍຕໍ່ເພື່ອເອົາກໍາໄລມາແບ່ງປັນກັນຈາກນັ້ນ ທ້າວ ຈາວື່ ຫຼື ຊົງວ່າງ ໄດ້ໂທລະສັບມາຫາ ທ້າວ ຕົ່ງກູ້ວ່າງ ວ່າ: ມີຄົນຕ້ອງການຊື້ຢາບ້າຈໍານວນຫຼາຍຈະຊື້ມັດລະ 9 ລ້ານກີບພວກກ່ຽວຈຶ່ງໄດ້ຕົກລົງກັນຂາຍຢາບ້າຈໍານວນ 33 ມັດ ເທົ່າກັບ 66 ພັນເມັດ ໃຫ້ຜູ້ຮ່ວມຂະບວນການໃນລາຄາ 297 ລ້ານກີບ ແລ້ວໄດ້ນັດສົ່ງຢາບ້າໃຫ້ຜູ້ຮ່ວມຂະບວນການຢູ່ເຮືອນພັກແຫ່ງໜຶ່ງຂອບເຂດເມືອງໝື່ນໃນຄະນະທີ່ກໍາລັງສົ່ງຢາບ້າຢູ່ນັ້ນຈຶ່ງຖືກເຈົ້າໜ້າທີ່ເຂົ້າປິດລ້ອມ ແລະ ທໍາການກວດຄົ້ນຫ້ອງທີ່ພວກກ່ຽວພັກຢູ່ນັ້ນຈຶ່ງພົບເຫັນຂອງກາງຈຳນວນດັ່ງກ່າວມາ ດໍາເນີນຄະດີຕາມຂັ້ນຕອນຂອງກົດໝາຍ.

  ປະຈຸບັນເຈົ້າໜ້າທີ່ພະແນກສະກັດກັ້ນ ແລະຕ້ານຢາເສບຕິດຫ້ອງຕໍາຫຼວດ ປກສ ແຂວງວຽງຈັນ ກໍາລັງດໍາເນີນການສືບສວນ-ສອບສວນ ພວກກ່ຽວທັງສອງເພື່ອຂະຫຍາຍຜົນຫາກຸ່ມແກ້ງ, ເຄືອຂ່າຍ, ຜູ້ຮ່ວມຂະບວນການມາລົງໂທດຕາມລະບຽບກົດໝາຍຂອງບ້ານເມືອງ.

__________

ຂຽນໂດຍ: ທອງສີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์