ເຈົ້າໜ້າທີ່ອາວຸໂສອາຊຽນ ຮ່ວມຫາລືພັດທະນາສະຫວັດດີການສັງຄົມ

  ກະຊວງແຮງງານ ແລະສະຫວັດດີການສັງຄົມໃນນາມຮັບຜິດຊອບວຽກງານສະຫວັດດີການສັງຄົມ ແລະການພັດທະນາອາຊຽນໄດ້ເປັນເຈົ້າພາບຈັດກອງປະຊຸມເຈົ້າ ໜ້າທີ່ອາວຸໂສສະຫວັດດີການສັງຄົມ ແລະ ການພັດທະນາອາຊຽນຄັ້ງທີ 15 ຂຶ້ນໃນວັນທີ 19 ພະຈິກ ທີ່ນະຄອນຫຼວງວຽງຈັນ ເພື່ອກະກຽມໃຫ້ແກ່ກອງປະຊຸມລັດ ຖະມົນຕີສະຫວັດດີການສັງຄົມແລະການພັດທະນາອາຊຽນຄັ້ງ ທີ 10 ທີ່ລາວເປັນເຈົ້າພາບໂດຍເປັນປະທານຂອງ ທ່ານ ທິບພະສອນ ສຸຂະທໍາມະວົງ ຮອງຫົວໜ້າກົມແຜນການ ແລະການຮ່ວມມືສາກົນຫົວໜ້າເຈົ້າໜ້າທີ່ອາວຸໂສສະຫວັດດີການສັງຄົມ ແລະການພັດທະນາອາຊຽນແຫ່ງ ສປປ ລາວ, ມີບັນດາຫົວໜ້າເຈົ້າໜ້າທີ່ອາວຸໂສຈາກປະເທດສະມາຊິກອາຊຽນ ແລະຜູ້ຕາງໜ້າກອງເລຂາອາຊຽນເຂົ້າຮ່ວມ.

  ທ່ານ ທິບພະສອນ ສຸຂະທໍາມະວົງ ກ່າວວ່າ: ກອງປະຊຸມຄັ້ງນີ້ສືບຕໍ່ຈາກປະເທດສິງກະໂປ ແລະດໍາເນີນພາຍໃຕ້ຫົວຂໍ້“ການສ້າງຄວາມເຂັ້ມແຂງວຽກປົກປ້ອງສັງຄົມສໍາລັບເດັກດ້ອຍໂອກາດໃນອາຊຽນ”, ຊຶ່ງກອງປະຊຸມແມ່ນໝູນວຽນກັນເປັນເຈົ້າພາບ 1 ປີຕໍ່ຄັ້ງ ແລະ ທີ່ຜ່ານມາລາວໄດ້ເປັນເຈົ້າພາບມາແລ້ວ 2 ຄັ້ງ ຄືໃນປີ 2003 ແລະປີ 2014.

ສະໜັບສະໜຸນໂດຍ: HONDA

 ກອງປະຊຸມໄດ້ສຸມໃສ່ປຶກສາຫາລືບັນຫາທີ່ຕິດພັນກັບການຮ່ວມມືເພື່ອຈັດຕັ້ງປະຕິບັດກິດຈະກໍາຕ່າງໆກ່ຽວກັບວຽກສະຫວັດດີການສັງຄົມ ແລະການພັດທະນາອາຊຽນ ໂດຍສະເພາະການສ້າງຄວາມເຂັ້ມແຂງວຽກປົກປ້ອງສັງຄົມສໍາລັບເດັກດ້ອຍໂອກາດ,ຄວາມຄືບໜ້າໃນການຈັດຕັ້ງປະຕິບັດແຜນຍຸດທະສາດສະຫວັດດີການສັງຄົມ ແລະການພັດທະນາອາຊຽນ(2016-2020) ແລະແຜນໃນຕໍ່ໜ້າ.

   ພ້ອມນີ້ຄະນະຜູ້ແທນຍັງໄດ້ແລກປ່ຽນບົດຮຽນກ່ຽວກັບຜົນສໍາເລັດໃນການຈັດຕັ້ງປະຕິບັດກິດຈະກໍາທີ່ເປັນແບບຢ່າງ,ການສ້າງຄວາມອາດສາມາດ ແລະ ບົດຮຽນທີ່ຖອດຖອນໄດ້ພາຍໃຕ້ຂອບການຮ່ວມມືວຽກສະຫວັດດີການສັງຄົມ ແລະການພັດທະນາອາຊຽນ, ອາຊຽນກັບບັນດາອົງການຈັດຕັ້ງສາກົນ ແລະອົງການຈັດຕັ້ງບໍ່ສັງກັດລັດຖະບານ ໂດຍການສະໜັບສະໜູນ ແລະຮ່ວມມືຂອງບັນດາຄະນະຜູ້ແທນຈາກແຕ່ລະປະເທດສະມາຊິກອາຊຽນ.

  ກອງປະຊຸມຄັ້ງນີ້ສາມາດສັງລວມເອົາບັນຫາສໍາຄັນຕ່າງໆທີ່ກ່ຽວພັນກັບວຽກງານສະຫວັດດີການສັງຄົມ ແລະ ການພັດທະນາອາຊຽນເພື່ອນໍາສະເໜີໃນກອງປະຊຸມລັດຖະມົນຕີ ສະຫວັດດີການສັງຄົມ ແລະການພັດທະນາອາຊຽນຄັ້ງທີ 10 ທີ່ຈະຈັດຂຶ້ນໃນວັນທີ 21 ພະຈິກ 2019 ນີ້.

__________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์