ສະຫາຍ ທອງລຸນ ສີສຸລິດ ຕ້ອນຮັບປະທານທີ່ປຶກສາການເມືອງທົ່ວປະເທດຈີນ

  ໃນຕອນເຊົ້າຂອງວັນທີ 19 ພະຈິກ 2019 ທີ່ ສຳນັກງານນາຍົກລັດຖະມົນຕີ, ສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະ ມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມພົບປະຂອງ ສະຫາຍ ຫວາງ ຢາງ, ກຳມະການປະຈຳກົມການເມືອງສູນກາງພັກກອມມູນິດຈີນ, ປະທານທີ່ປຶກສາການເມືອງທົ່ວປະເທດຈີນພ້ອມດ້ວຍຄະນະໃນໂອກາດທີ່ມາຢ້ຽມຢາມທາງການ ສປປ ລາວ ຕາມການເຊື້ອເຊີນຂອງສະຫາຍປະທານສູນກາງແນວລາວສ້າງຊາດ.

  ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ກ່າວສະແດງຄວາມຍິນດີຕ້ອນຮັບ ແລະຊົມເຊີຍຕໍ່ການເດີນທາງມາຢ້ຽມຢາມ ສປປ ລາວ ຂອງ ສະຫາຍ ຫວາງ ຢາງ ໃນຄັ້ງນີ້, ຊຶ່ງເປັນການເສີມຂະຫຍາຍສາຍພົວພັນອັນດີງາມ ທີ່ເປັນມູນເຊື້ອມາແຕ່ດົນນານຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ແລະ ໃນຖານະ ທີ່ເປັນຄູ່ຮ່ວມຍຸດທະສາດຮອບດ້ານ ໃຫ້ມີຄວາມແໜ້ນແຟ້ນ, ເກີດດອກອອກຜົນ ແລະ ຈະເລີນງອກງາມ ຢ່າງບໍ່ຢຸດຢັ້ງ. ພ້ອມທັງສະແດງຄວາມຊົມເຊີຍຕໍ່ຜົນການພົບປະສອງຝ່າຍລະຫວ່າງ ສະຫາຍ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ແລະສະຫາຍ ຫວາງ ຢາງ,ກຳມະການປະຈຳກົມການເມືອງສູນກາງພັກກອມມູນິດຈີນ, ປະທານທີ່ປຶກສາການເມືອງທົ່ວປະເທດຈີນໂດຍສະເພາະການແລກປ່ຽນຄວາມຄິດຄວາມເຫັນທີ່ກ່ຽວ ຂ້ອງກັບວຽກງານແນວໂຮມບົນຈິດໃຈເພື່ອນມິດຍຸດທະສາດຮອບດ້ານຕາມທິດ 4 ດີ, ທັງເປັນການເລີ່ມຕົ້ນຈັດຕັ້ງຜັນຂະຫຍາຍເນື້ອໃນຈິດໃຈຂອງແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳສັງຄົມນິຍົມລາວ-ຈີນ ທີ່ການນຳຂັ້ນສູງຂອງສອງປະເທດໄດ້ລົງນາມຮ່ວມກັນໃນທ້າຍເດືອນເມສາ 2019.

  ໃນໂອກາດນີ້, ສະຫາຍ ທອງລຸນ ສີສຸລິດ ຍັງໄດ້ຕີລາຄາສູງຕໍ່ນະໂຍບາຍເປີດປະຕູສູ່ໂລກພາຍນອກຂອງ ສປຈີນ ລວມທັງນະໂຍບາຍໜຶ່ງແລວໜຶ່ງເສັ້ນທາງຊຶ່ງລາວກໍ່ໄດ້ຮັບຜົນປະໂຫຍດຕົວຈິງ ຈາກນະໂຍບາຍດັ່ງກ່າວ, ພ້ອມກັນນີ້ ກໍ່ຕີລາຄາສູງຕໍ່ສາຍພົວພັນ ແລະ ໝາກຜົນຂອງການຮ່ວມມືລະຫວ່າງ ສປປ ລາວ ແລະ ສປ ຈີນ ໃນໄລຍະຜ່ານມາ ໂດຍສະເພາະ ໝາກຜົນ ແລະ ຄວາມຄືບໜ້າ ໃນການຈັດຕັ້ງປະຕິບັດບັນດາໂຄງການຮ່ວມມື ເປັນຕົ້ນ ໂຄງການກໍ່ສ້າງທາງລົດໄຟ ລາວ-ຈີນ, ໂຄງການກໍ່ສ້າງທາງດ່ວນ ວຽງຈັນ-ວັງວຽງ, ການທ່ອງທ່ຽວ ລາວ-ຈີນ ແລະ ອື່ນໆ ຊຶ່ງລ້ວນແຕ່ມີຄວາມຄືບໜ້າດີ, ພ້ອມທັງ ສະແດງຄວາມຂອບໃຈ ສປ ຈີນ ຕໍ່ການຊ່ວຍເຫຼືອ ແລະສະໜັບສະໜູນແກ່ ສປປ ລາວ ຕະຫຼອດໄລຍະຜ່ານມາເປັນຕົ້ນ, ການຊ່ວຍເຫຼືອທາງດ້ານເສດຖະກິດ-ສັງຄົມ, ການພັດທະນາຊັບພະຍາກອນມະນຸດ, ການແກ້ ໄຂໄພພິບັດທຳມະຊາດ ແລະ ອື່ນໆ.

  ນອກຈາກນີ້ສອງຝ່າຍຍັງໄດ້ສະເໜີ ແລະ ແລກປ່ຽນຄຳຄິດຄຳເຫັນຕໍ່ບາງບັນຫາທີ່ສອງຝ່າຍມີຄວາມສົນໃຈ.

ໃນຕອນທ້າຍ,ສະຫາຍ ທອງລຸນ ສີສຸລິດ ຍັງໄດ້ກ່າວເຊື້ອເຊີນສະຫາຍນາຍົກລັດຖະມົນຕີແຫ່ງ ສປ ຈີນ ມາຢ້ຽມຢາມ ສປປ ລາວ ໃນປີໜ້າຜ່ານສະຫາຍ ຫວາງ ຢາງ.

  ໃນໂອກາດດຽວກັນ, ສະຫາຍ ຫວາງ ຢາງ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງສະຫາຍ ທອງລຸນ ສີສຸລິດ ແລະ ພາກສ່ວນທີ່ກ່ຽວຂ້ອງຂອງ ສປປ ລາວ ໃນຄັ້ງນີ້. ພ້ອມທັງ ສະແດງຄວາມຍ້ອງຍໍຊົມເຊີຍ ຕໍ່ພັກ ແລະ ລັດຖະບານ ທີ່ສາມາດຍາດໄດ້ຜົນສຳເລັດຫຼາຍດ້ານ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກໍ່ຄືການປົກປັກຮັກສາ ແລະ ສ້າງສາພັດທະນາປະເທດ ໃນໄລຍະຜ່ານມາຈົນຮອດປະຈຸບັນ. ຝ່າຍຈີນຈະສືບຕໍ່ສະໜັບສະໜູນຊຸກຍູ້ໂຄງການຮ່ວມມືທາງດ້ານເສດຖະກິດ, ສັງຄົມ, ການລົງທຶນ, ບັນດາໂຄງການຊ່ວຍເຫຼືອຂອງ ສປ ຈີນ ແລະວຽກງານ ຫຼືບັນຫາຕ່າງໆ ທີ່ສະຫາຍ ທອງລຸນ ສີສຸລິດ ໄດ້ຍົກຂຶ້ນມາແລກ ປ່ຽນຄວາມຄິດເຫັນໃນຄັ້ງນີ້ໃຫ້ໄດ້ຮັບການຈັດຕັ້ງປະຕິບັດ ແລະຜົນໄດ້ຮັບດີ.

___________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์